جاڭادان اشىلعان وڭالتۋ كەشەنىندە ساپالى قىزمەت كورسەتۋگە بارلىق جاعداي جاسالعان
كەشە ەلباسى نۇرسۇلتان نازارباەۆ پرەزيدەنتتىڭ ءىس باسقارماسى مەديتسينالىق ورتالىعىنىڭ كلينيكالىق وڭالتۋ كەشەنىنىڭ اشىلۋ راسىمىنە قاتىستى. مەملەكەت باسشىسى كوپسالالى جاڭا كەشەندى ارالاپ كورىپ, ونداعى ۇجىم مۇشەلەرىمەن اڭگىمەلەستى.
ءوز سوزىندە نۇرسۇلتان نازارباەۆ ءتيىستى كاسىبي پەرسونالى, جوعارى ساپالى قۇرال-جابدىقتارى, قاجەتتى سەكتسيالارى تۇگەل قامتىلعان مەديتسينالىق مەكەمە بارلىق زاماناۋي تالاپتارعا ساي ەكەنىن اتاپ ءوتتى. سونداي-اق, قازاقستان پرەزيدەنتى دەنساۋلىق ساقتاۋ سالاسىنىڭ ودان ءارى دامۋى ماڭىزدى ەكەنىنە, بۇل ەل تۇرعىندارىنىڭ دەنساۋلىق ساپاسىنا وڭ اسەرىن تيگىزەتىنىنە توقتالدى. «قازاقستاندىقتار ەم الۋ ءۇشىن شەتەلدەرگە بارادى. وسىنداي كەشەندەردىڭ پايدا بولۋىمەن مەديتسينالىق تۋريستەر لەگى ءبىزدىڭ ەلگە باعىت الاتىن بولادى. مۇندا تولىققاندى جۇمىسقا قاجەتتى جاعدايدىڭ ءبارى جاسالعان, ەندى سىزدەرگە ءوز ءمىندەتتەرىڭىزدى ساپالى ورىنداپ, حالىق دەنساۋلىعىن جاقسارتۋ كەرەك», – دەدى مەملەكەت باسشىسى كەشەن ماماندارىمەن اڭگىمەلەسۋ كەزىندە.
ال مەكەمە قىزمەتكەرلەرى ءوز كەزەگىندە نۇرسۇلتان نازارباەۆقا دەنساۋلىق ساقتاۋ سالاسىن دامىتۋ ماسەلەلەرىنە نازار اۋدارىپ وتىرعانى ءۇشىن العىس ايتىپ, وسىنداي بىرەگەي كەشەندە جۇمىس ىستەۋ زور قۇرمەت ەكەنىن ءارى ۇلكەن جاۋاپكەرشىلىك جۇكتەيتىنىن اتاپ ءوتتى. ولار حالىققا ساپالى مەديتسينالىق كومەك كورسەتۋگە دايىن ەكەندىكتەرىنە ەلباسىن سەندىردى. ەرەكشە كوڭىل-كۇيگە بولەنگەن اق جەلەڭدىلەر مەملەكەت باسشىسىنا دەگەن العىستارىن وزگەشە جەتكىزىپ, «ءومىر, مەن سەنى جاقسى كورەمىن!» دەگەن ءاندى ورىنداپ بەردى.
كلينيكالىق وڭالتۋ كەشەنىندە ەمدەلۋشىلەرگە مەديتسينالىق كومەك كورسەتۋدىڭ بارلىق ساتىسى قاراستىرىلعان ەكەن. مۇنداعى ەمدەۋ بولىمشەلەرى شەتەلدىڭ وزىق مەديتسينالىق تەحنيكالارىمەن جابدىقتالعان. 13 عيماراتتى قامتيتىن, ءبىر اۋىسىمدا 1000 ادام قابىلدايتىن 4 ەمحاناسى, 35 قۇرىلىمدىق بولىمشەسى, سونداي-اق, 200 ورىندىق ستاتسيونارى بار كەشەننىڭ جالپى اۋماعى 84 مىڭ شارشى مەتردى الىپ جاتىر.
كەشەن قۇرامىنا بىرەگەي دياگنوستيكالىق بلوك جانە يادرولىق مەديتسينا ءبولىمشەسى كىرەدى. عيمارات پەن ونىڭ ينفراقۇرىلىمىنىڭ جۇمىسىن قامتاماسىز ەتەتىن نەگىزگى جۇيەلەردىڭ مونيتورينگى مەن باسقارىلۋى اۆتوماتتاندىرىلعان. سونداي-اق, بۇل ورتالىق جاڭا زاماننىڭ يننوۆاتسيالىق جەتىستىكتەرىنە سايكەس رەسۋرس ۇنەمدەۋشى تەحنولوگيالارمەن قامتاماسىز ەتىلگەن.
اتالعان مەكەمەدە جوعارى بىلىكتى ماماندار, سونىڭ ىشىندە مەديتسينا عىلىمدارىنىڭ 11 دوكتورى مەن 24 كانديداتى جۇمىس ىستەيتىن كورىنەدى. دارىگەرلەردىڭ جارتىسىنان استامى جوعارى ساناتقا يە. ارينە, ەمدەۋدىڭ جوعارى دەڭگەيدەگى ستاندارتى ءاردايىم كاسىبي بىلىكتىلىكتى جەتىلدىرىپ وتىرۋدى تالاپ ەتەتىنى بەلگىلى. سول سەبەپتى, مەكەمە قىزمەتكەرلەرى الىس جانە جاقىن شەتەلدەردىڭ جەتەكشى كلينيكالارىنداعى ماماندارمەن تاجىريبە الماسىپ قايتقان ەكەن. ماسەلەن, اتالعان كلينيكالىق وڭالتۋ كەشەنى باسشىسىنىڭ ءبىرىنشى ورىنباسارى, مەديتسينا عىلىمدارىنىڭ دوكتورى ساۋلە دۇيسەبەكقىزى ەڭبەك ۇجىمىنىڭ وسىنداي زاماناۋي عيماراتتا جۇمىس ىستەۋگە تولىقتاي ءازىر ەكەندىگىن ايتا كەلە, مامانداردىڭ ساقاداي-ساي قىزمەت كورسەتۋ دەڭگەيىنە جەتۋگە ءبىرشاما ۋاقىت كەتكەندىگىن جەتكىزدى.
«ءبىزدىڭ دايىندىعىمىز ءبىرنەشە جىل بۇرىن باستالعان ەدى. ەڭ ۇلكەن جەتىستىگىمىز – ول ءبىزدىڭ تاجىريبەلى ماماندارىمىز. ماماندارىمىزدى 2-3 جىل بويى قازاقستاندا جانە يزرايل, كورەيا, گەرمانيا, بەلگيا سەكىلدى شەتەلدەردە تاجىريبەدەن وتكىزدىك. تەك 2014 جىلى عانا 37 مامان شەتەلدەردە بولىپ, كاسىبي ءبىلىكتىلىكتەرىن ارتتىرىپ قايتتى. بۇل – وتە جاقسى كورسەتكىش. سوندىقتان, بىزدە دارىگەر-مامانداردىڭ سانى جەتكىلىكتى دەۋىمىزگە تولىقتاي نەگىز بار. ەندىگى كەزەكتە ءبىزدىڭ الدىمىزدا تۇرعان باستى ماقسات – ول حالىققا جوعارى ساپالى مەديتسينالىق قىزمەت كورسەتۋ. كلينيكالىق وڭالتۋ كەشەنىندە ەمحانالىق بولىمدەر بار. ولارعا كۇنىنە 1200-گە جۋىق ادام كەلە الادى. ستاتسيونارلىق بولىمشەلەر دە ەمدەلۋشىلەردى قابىلداۋعا, ولارعا جاردەم كورسەتۋگە دايىن تۇر. ياعني, بۇل كەشەننەن تەك مەملەكەتتىك قىزمەتكەرلەردىڭ عانا ەمەس, قازاقستان حالقىنىڭ كەز كەلگەن ەم تۇرلەرىن الۋىنا تولىقتاي مۇمكىندىگى بار. ءماسەلەن, يادرولىق مەديتسينا, ساۋلەمەن ەمدەۋ بولىمشەلەرىندەگى مەديتسينالىق قىزمەتتەردىڭ ساپاسى وتە جوعارى», دەدى س.دۇيسەبەكقىزى.
ال وسى كەشەندەگى تاعى ءبىر بىلىكتى مامان تالاپبەك اجەنوۆ 1-ءشى حيرۋرگيالىق بولىمشەنىڭ مەڭگەرۋشىسى ەكەن. بۇل ءبولىمشەگە جۇكتەلگەن مىندەت – قۇلاق, مۇرىن, تاماق اۋرۋلارىن ەمدەۋ. «ءبىزدىڭ بولىمشە سوڭعى ۇلگىدەگى مەديتسينالىق تەحنيكالارمەن جابدىقتالعان. مۇندا كۆوتا نەگىزىندە ناۋقاستارعا جوعارى مەديتسينالىق قىزمەتتەر تەگىن كورسەتىلەدى. ماسەلەن, ءبىز وتە سوزىلمالى مۇرىن اۋرۋلارى اسقىنۋلارىنىڭ الدىن الامىز. سونداي-اق, كومەي اۋرۋلارىن لازەرمەن ەمدەۋ دە وسى بولىمشەدە جۇزەگە اسىرىلادى. بىزگە كەلىپ تۇسكەن ناۋقاستاردىڭ جاعدايىن جاقسارتۋ ايرىقشا نازاردا تۇر. مۇنداعى پالاتالار 1-2 ورىندىق. بۇل ەمدەلۋشىلەردىڭ جاعدايىن تۇزەۋگە اسەر ەتىپ قانا قويماي, ولاردىڭ وزگە اۋرۋ تۇرلەرىن جۇقتىرۋ قاۋپىن ازايتادى. ءبىزدىڭ نەگىزگى ماقساتىمىز – حالىققا جوعارى مەديتسينالىق قىزمەت كورسەتىپ, ولاردىڭ جاعدايىن جاقسارتۋ. الداعى ۋاقىتتا وزىمىزگە جۇكتەلگەن مىندەتتەردى ابىرويمەن اتقارامىز دەپ ويلايمىن», دەدى مامان.
ءلايلا ەدىلقىزى,
«ەگەمەن قازاقستان».
سۋرەتتەردى تۇسىرگەندەر
س.بوندارەنكو, ب.وتارباەۆ.