زاڭ ۇستەمدىگى قاعيداتىن نىعايتۋ جانە ايەلدەر مەن بالالاردى زاڭنامالىق قورعاۋ – رەفورمانىڭ ءارى مەملەكەت ساياساتىنىڭ ماڭىزدى باعىتتارىنىڭ ءبىرى. مەملەكەت باسشىسى وسى باعىتقا, ياعني بالا قۇقىقتارىنا بارىنشا نازار اۋدارىپ كەلەدى.
وسىلايشا, بىرنەشە جىلدىڭ ىشىندە پرەزيدەنت باستاماسىمەن بالالارعا ارنالعان بىرقاتار رەفورمالىق وزگەرىستەر, زاڭدار, باعدارلامالار قابىلداندى. مىسال رەتىندە «ۇلتتىق قور بالالارعا» باعدارلاماسىن, «جايلى مەكتەپ» جوباسىن, «قازاقستان حالقىنا» قورىنىڭ 67 الەۋمەتتىك ماڭىزى بار جوبالارىن ايتا الامىز. بىرنەشە جىلدىڭ ىشىندە «قازاقستان حالقىنا», «سامۇرىق-قازىنانىڭ» قامقورلىق قورلارى 52 وڭالتۋ ورتالىعىن اشتى. سونىمەن قاتار ايەلدەر مەن بالالار قۇقىقتارىنا قاتىستى زاڭ قابىلداندى. زاڭداعى تۇزەتۋلەردىڭ 60 پايىزى بالالارعا باعىتتالعان.
ەكىنشىدەن, قامقورشىلىق قىزمەتتەرىنە قاتىستى زاڭعا دا وزگەرتۋلەر مەن تۇزەتۋلەر ەنگىزىلدى. ەگەر ايەلدەر مەن بالالار قۇقىقتارىن قورعاۋعا, قاۋىپسىزدىگىن قامتاماسىز ەتۋگە قاتىستى زاڭنىڭ بەرىپ جاتقان ناتيجەسىنە كوز جۇگىرتسەك, زاڭنىڭ قابىلدانعانىنا دا كوپ بولا قويماعانىنا قاراماستان, بىرقاتار وڭ وزگەرىستى اتاپ وتۋگە بولادى. ماسەلەن, ەل اۋماعىندا قازىردىڭ وزىندە 87 وتباسىن قولداۋ ورتالىعى اشىلدى. ولارعا بالالار قۇقىقتارىنىڭ بۇزىلۋىنىڭ الدىن الۋدا, وتباسىلارعا الەۋمەتتىك, زاڭدىق, پسيحولوگيالىق قولداۋ كورسەتۋدە وتە ماڭىزدى مىندەتتەر جۇكتەلگەن. جالپى, تاعى دا وسىنداي 125 ورتالىق اشۋ باعىتىندا جۇمىستار قولعا الىندى. مۇنىڭ تۇپكى ماقساتى – قىسىمعا ۇشىراعان, كومەككە مۇقتاج بارلىق وتباسىنى قولداۋ شارالارىمەن تولىق قامتۋ. ياعني قولداۋعا ءزارۋ وتباسىلاردىڭ ەشقايسىسى مەملەكەت ۇسىنىپ جاتقان جوبالاردان, باعدارلامالاردان تىس قالماۋى كەرەك.
پروبلەمالىق وتباسىلاردى باقىلاۋ ماقساتىندا 45 مىڭ رەيد ۇيىمداستىرىلدى. بارلىق وبلىستا پسيحولوگيالىق قولداۋ ورتالىقتارى اشىلدى. جاقىندا بالالاردىڭ قۇقىقتارىن قورعاۋ بولىمدەرى دە اشىلماق.
سونداي-اق يۋنيسەف-تە قازاقستاننىڭ بالالاردى قورعاۋ جونىندەگى جۇمىستارىن جوعارى باعالاپ وتىر.
دينارا زاكيەۆا,
بالا قۇقىقتارى جونىندەگى ۋاكىل