پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين اقتوبە وبلىسىنا جۇمىس ساپارى اياسىندا ءوڭىردىڭ شارۋالارىمەن كەزدەستى.
كەزدەسۋگە كەڭەيتىلگەن فورماتتا ونلاين بايلانىس ارقىلى اۋداندارداعى شارۋا قوجالىقتارىنىڭ باسشىلارى دا قاتىستى. وبلىس اكىمى اسحات شاحاروۆ ءوڭىر اۋىل شارۋاشىلىعىنىڭ نەگىزگى باعىتى مال شارۋاشىلىعى بولىپ قالا بەرەتىنىن اتاپ ءوتتى. بۇل رەتتە ايتەكە بي, قارعالى, حرومتاۋ, مارتوك اۋداندارىندا ەگىن شارۋاشىلىعى دا قارقىندى دامىپ كەلەدى.
بىلتىر وبلىستا اۋىل شارۋاشىلىعى ءونىمىنىڭ كولەمى 412 ملرد تەڭگەنى قۇراپ, وتكەن جىلمەن سالىستىرعاندا 2,5%-عا ءوستى. 2026–2028 جىلدارى ءوڭىردىڭ اگروونەركاسىپ كەشەنىندە جالپى سوماسى 94,9 ملرد تەڭگەنى قۇرايتىن 11 ينۆەستيتسيالىق جوبانى جۇزەگە اسىرۋ جوسپارلانىپ وتىر. ونىڭ ىشىندە 4 جوبا بيىل ىسكە قوسىلادى. ولاردىڭ قاتارىندا «جاننۇر» شق مەن «Agroproduct development» جشس بورداقىلاۋ الاڭدارىن سالۋ مەن كەڭەيتۋ, «رامازان قۇس» جشس قۇس فابريكاسىن ىسكە قوسۋ, سونداي-اق «ايس» جشس ءسۇت-تاۋار فەرماسىن اشۋ بار.
بىلتىر وڭىردە 554 مىڭ توننا ءداندى داقىل مەن 72,4 مىڭ توننا مايلى داقىل جينالدى. سونداي-اق كوكونىستەن, سونىڭ ىشىندە كارتوپتان مول ءونىم الىندى. ەگىس القاپتارىن ءارتاراپتاندىرۋ اياسىندا مايلى جانە مال ازىقتىق داقىلداردىڭ كولەمى ۇلعايتىلدى.
كەزدەسۋ بارىسىندا اۋىل شارۋاشىلىعى ۆيتسە-ءمينيسترى امانعالي بەردالين قاتىسۋشىلاردى مال شارۋاشىلىعىن دامىتۋ جونىندەگى جاڭا كەشەندى جوسپاردىڭ نەگىزگى پارامەترلەرى تۋرالى حاباردار ەتتى.
تالقىلاۋ كەزىندە شارۋالار بىرقاتار ماسەلە كوتەردى. اتاپ ايتقاندا, قازاقستان فەرمەرلەرى قاۋىمداستىعى وبلىستىق فيليالىنىڭ جەتەكشىسى قۇسايىن سارسەمباي «يگىلىك», «بەرەكە», «جايلاۋ» باعدارلامالارى بويىنشا «دامۋ» كاسىپكەرلىكتى دامىتۋ قورى ارقىلى كەپىلدىك بەرۋ مۇمكىندىگىن قاراستىرۋدى ۇسىندى.
سەرىك جۇمانعارين قازىر وسى باعدارلامالار بويىنشا «دامۋ» قورى ارقىلى كەپىلدىكتەر بەرۋ تەتىگى پىسىقتالىپ جاتقانىن ايتتى. بۇل قۇرالدى ەنگىزۋ جونىندەگى الدىن الا كەلىسىمگە قول جەتكىزىلگەن. الايدا جەكەلەگەن شارتتار مەن تەحنيكالىق پارامەترلەر ءالى دە كەلىسۋ ساتىسىندا تۇر.
سونىمەن قاتار نەسيە مەن ليزينگكە قاتىستى پايىزدىق مولشەرلەمەلەردى سۋبسيديالاۋدىڭ قولجەتىمدىلىگى ماسەلەسى كوتەرىلدى. «ايس پليۋس» جشس ديرەكتورى قۋانىش يششانوۆ بيۋدجەت قاراجاتىنىڭ جوقتىعىنا بايلانىستى پورتال جۇمىسى توقتاتىلعانىن, سوندىقتان ءوتىنىم بەرۋ مۇمكىن ەمەستىگىن مالىمدەدى.
سونداي-اق وڭىردەگى «ستەپنوە» جشس, «قۇمقۇدىق» جشس, «پريگورودنوە» جشس, «مەڭدىباي-قاراعاش» شق وكىلدەرى دە ءوز سۇراقتارىن قويدى. بارلىق كوتەرىلگەن ماسەلەگە قاتىستى جيىن بارىسىندا تۇسىندىرمە بەرىلدى.
كەزدەسۋ قورىتىندىسىندا ۆيتسە-پرەمەر اقتوبە وبلىسى – 25,3 ملن گەكتار جايىلىمدىق جەرى بار ەلىمىزدەگى ەڭ ءىرى ءوڭىر ەكەنىن اتاپ ءوتتى. مەملەكەت شارۋالارعا قولداۋ كورسەتۋدى جالعاستىرادى, سونىمەن قاتار قارسى تالاپتار دا كۇشەيتىلەدى. ونىڭ نەگىزگىسى – اۋىل شارۋاشىلىعى جەرلەرىن ءتيىمدى پايدالانۋ. وسى باعىتتا جەردى پايدالانۋدىڭ تيىمدىلىك كورسەتكىشتەرىن ەنگىزۋ, سونداي-اق ەگىن شارۋاشىلىعىمەن اينالىساتىن شارۋاشىلىقتاردىڭ مال شارۋاشىلىعىن دا قاتار الىپ ءجۇرۋ مۇمكىندىگى قارالىپ جاتىر.
سونىمەن قاتار سەرىك جۇمانعارين بيۋدجەت ماسەلەلەرى تۋرالى بولەك جيىن وتكىزىپ, وندا قارجىلاندىرۋدىڭ نەگىزگى پارامەترلەرى مەن شىعىستاردىڭ باسىم باعىتتارى قاراستىرىلدى. تالقىلاۋ قورىتىندىسىندا بيۋدجەت قاراجاتىن ءتيىمدى پايدالانۋ مەن ونىڭ يگەرىلۋىنە باقىلاۋدى كۇشەيتۋ جونىندە تاپسىرمالار بەرىلدى.
جۇمىس ساپارى اياسىندا ۆيتسە-پرەمەر «KAZFELTEC» جشس-نىڭ ءجۇن وڭدەۋ زاۋىتىنىڭ جۇمىسىمەن دە تانىستى. كاسىپورىن يتاليالىق تەحنولوگيالاردى پايدالانىپ, تابيعي قوي جۇنىنەن جىلۋ جانە دىبىس وقشاۋلاعىش ماتەريالدار وندىرۋگە ماماندانعان.