كوپ جىلعى ىزدەنىس ناتيجەسى

كەيىنگى جىلدارى تسيفرلىق قۇزىرەتتەر مەن نەيروجەلىلىك تەحنولوگيالار سالاسىن زەرتتەپ, ءبىلىم سالاسىن جاڭعىرتۋ, وقۋ ۇدەرىسىن اۆتومات­تاندىرۋ, يننوۆا­تسيا­لىق تەح­نو­لو­گيالاردى ەنگىزۋ باعىتىنداعى مەم­­لە­كەتتىك باسىمدىقتارعا ۇلەس قوسىپ كەلەمىز. عىلىمي زەرت­تەۋ­لەرىم كوگنيتيۆتىك لينگۆيس­تيكا, لينگۆو­مادە­نيەتتانۋ, سالىستىرمالى فرازەولوگيا, شەت ءتىلىن وقىتۋ ادىستەمەسى جانە مادەنيەتارالىق كوممۋنيكاتسيا سالالارىن قامتيدى.

200-دەن استام عىلىمي ەڭبەكتىڭ اۆتورىمىن. ولاردىڭ قاتارىندا حالىقارالىق دەڭگەيدەگى, «Scopus»,  «Web of Science» بازالارىنا ەنگەن ماقالالار, سونداي-اق ىرگەلى مونوگرافيالار مەن وقۋلىقتار بار. فرانتسۋز ءتىلىن ەكىنشى شەت ءتىلى رەتىندە وقىتۋ­عا ارنالعان وقۋ-ادىستەمەلىك ەڭبەكتەرىم ەلىمىز­دىڭ بىرقاتار جوعارى وقۋ ورىندارىنىڭ باعدار­لامالارىنا ەنگىزىلگەن. سونىمەن بىرگە ابايدىڭ «قارا سوزدەرىن» قازاق تىلى­نەن تىكەلەي فرانتسۋز تىلىنە اۋدارىپ, وسى نەگىزدە ما­دەني كودتارعا قاتىستى زەرتتەۋلەر جۇرگىزدىم.

عىلىمي كادرلار دايارلاۋ ىسىنە دە ەرەكشە ءمان بەرەمىن. مەنىڭ جەتەكشىلىگىممەن PhD, عىلىم كانديداتتارى, ماگيسترلەر دايارلاندى. سونىمەن قاتار عىلىمي-ساراپتامالىق, حالىقارالىق قىزمەتكە بەلسەندى قاتىسامىن. ءۇش عىلىمي جۋرنالدىڭ رەداكتسيالىق القاسىنىڭ مۇشەسىمىن, شۆەيتسارياداعى فريبۋر ۋنيۆەرسيتەتى مەن فرانتسياداعى ەكس-مارسەل ۋنيۆەرسيتەتىنىڭ ديسسەرتاتسيالىق كەڭەستەرىنە شاقىرىلعان مۇشەسى بولدىم. سونداي-اق ەلىمىزدەگى بىرقاتار ديسسەرتاتسيالىق كەڭەستەردىڭ جۇمىسىنا قاتىسىپ, عىلىمي زەرتتەۋلەرگە رەسمي وپپونەنت رەتىندە باعا بەرەمىن.

كاسىبي قىزمەتىم بارىسىندا دەكان, پرورەكتور, رەكتوردىڭ ەۋروپالىق ءبىلىم بەرۋ باعدارلامالارى جونىندەگى كەڭەسشىسى قىزمەتتەرىن اتقاردىم. بۇگىنگى ماراپات – كوپ جىلعى ەڭبەكتىڭ ەلەنگەنىنىڭ ايعاعى دەپ بىلەمىن. ازدى-كوپتى ەڭبەگىمىزدىڭ باعالانعانىنا شىن جۇرەكتەن قۋانىشتىمىن. بۇل سەنىم الداعى ۋاقىتتا دا ايانباي ەڭبەك ەتۋگە جىگەر بەرەدى.

كۇلاش دۇيسەكوۆا,

فيلولوگيا عىلىمدارىنىڭ دوكتورى, ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ شەتەل فيلولوگياسى كافەدراسىنىڭ پروفەسسورى