30 ءساۋىر كۇنى س. سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتىندە ەكونوميكا عىلىمدارىنىڭ دوكتورى, پروفەسسور ميحايل داۆيدوۆيچ سپەكتوردىڭ ەسىمى بەرىلگەن اۋديتوريا سالتاناتتى تۇردە اشىلدى, دەپ جازادى Egemen.kz.
ميحايل داۆيدوۆيچ سپەكتور – ەكونوميكا عىلىمدارىنىڭ دوكتورى, پروفەسسور, اگرارلىق عىلىمنىڭ دامۋىنا ەلەۋلى ۇلەس قوسقان كورنەكتى عالىم. ول جەرگە ورنالاستىرۋ, اۋىل شارۋاشىلىعى ەكونوميكاسى جانە اۋىلدىق اۋماقتاردى جوسپارلاۋ سالالارىندا ىرگەلى عىلىمي ەڭبەكتەردىڭ اۆتورى رەتىندە عىلىمي مەكتەپ قالىپتاستىرىپ, جوعارى بىلىكتى ماماندار دايارلاۋعا زور ۇلەس قوستى.
ءىس-شاراعا باسقارما توراعاسى – رەكتور, قر ۇعا اكادەميگى, پروفەسسور قانات مارات ۇلى تىرەۋوۆ, قازاقستان رەسپۋبليكاسى عىلىم جانە جوعارى ءبىلىم ۆيتسە-ءمينيسترى تالعات ەشەنقۇلوۆ, عالىمنىڭ قىزى يرينا سپەكتور مەن تالاي جىلدار ءبىلىم جانە عىلىم سالاسىندا بىرگە ەڭبەك ەتكەن ارىپتەستەرى, ۋنيۆەرسيتەتتىڭ پروفەسسور-وقىتۋشىلار قۇرامى, ستۋدەنتتەر جانە ارنايى شاقىرىلعان قوناقتار قاتىستى.
سالتاناتتى جيىنعا قاتىسۋشىلار ميحايل ءداۆيدوۆيچتىڭ وتاندىق ەكونوميكالىق عىلىمنىڭ دامۋىنا, جوعارى ءبىلىم بەرۋ جۇيەسىنە جانە جوعارى بىلىكتى كادرلار دايارلاۋعا قوسقان وراسان زور ۇلەسىن ەرەكشە اتاپ ءوتتى.
جاڭا اۋديتوريا جەر رەسۋرستارىن باسقارۋ جانە ارحيتەكتۋرا ينستيتۋتىندا ورنالاسقان. بۇل ورىن بولاشاق ماماندار ءۇشىن ماڭىزدى ءبىلىم بەرۋ كەڭىستىگىنە اينالادى. اتاۋلى اۋديتوريانىڭ اشىلۋى ميحايل داۆيدوۆيچ سپەكتوردىڭ عىلىمي مۇراسىنا, كوپجىلدىق ەڭبەگىنە جانە ۋنيۆەرسيتەتتىڭ دامۋىنا قوسقان ۇلەسىنە دەگەن قۇرمەتتىڭ بەلگىسى بولدى.
مۇنداي ءبىلىم بەرۋ كەڭىستىكتەرىن قۇرۋ تاريحي جادىنى ساقتاۋعا, ۇرپاقتار ساباقتاستىعىن نىعايتۋعا جانە اكادەميالىق داستۇرلەردى دامىتۋعا ىقپال ەتەدى.