پاۆلوداردا ادام ءولتىرىپ, جازادان قۇتىلىپ كەتكەن قىلمىسكەر ءتورت جىلدان كەيىن ۇستالدى. بۇل تۋرالى ىشكى ىستەر مينيسترلىگى مالىمدەدى, دەپ حابارلايدى Egemen.kz.
پوليتسيا مالىمەتىنشە, 2022 جىلدىڭ قىركۇيەگىندە شارباقتى كەنتىندەگى جەكە ۇيلەردىڭ بىرىنەن جەرگىلىكتى تۇرعىننىڭ ءمايىتى تابىلعان. تەرگەۋ ءىس-شارالارىنىڭ جۇرگىزىلۋىنە قاراماستان, قىلمىستى جەدەل اشۋ مۇمكىن بولماعان.
«2026 جىلى پوليتسيا قىزمەتكەرلەرىنىڭ مۇقيات جۇمىسى, قوسىمشا جەدەل-ىزدەستىرۋ شارالارىن جۇرگىزۋى جانە مارقۇمنىڭ بايلانىس ورتاسىن تولىق تەكسەرۋى ناتيجەسىندە كۇدىكتى انىقتالدى. ول قازا تاپقان ازاماتتىڭ تانىسى بولىپ شىقتى. تەرگەۋ بارىسىندا وقيعا كۇنى ەر ادامداردىڭ بىرگە سپيرتتىك ىشىمدىك ىشكەنى انىقتالدى. ارالارىندا تۋىنداعان جانجال كەزىندە كۇدىكتى جابىرلەنۋشىگە دەنە جاراقاتتارىن سالعان, سونىڭ سالدارىنان ول كوز جۇمعان», دەلىنگەن حابارلامادا.
اقپان ايىندا كۇدىكتى ءوز كىناسىن مويىنداپ, ۋاقىتشا ۇستاۋ يزولياتورىنا قامالدى. ناۋرىز ايىندا پاۆلودار وبلىسى شارباقتى اۋداندىق سوتى قىلمىسكەرگە 8 جىلعا باس بوستاندىعىنان ايىرۋ جازاسىن تاعايىنداعان.
پاۆلوداردا ەر ادام جەدەل جاردەم قىزمەتكەرلەرىنە شابۋىل جاسادى
ىشكى ىستەر مينيسترلىگىنىڭ حابارلاۋىنشا, بيىل جەدەل-ىزدەستىرۋ ءىس-شارالارىنىڭ ناتيجەسىندە دەنساۋلىققا قاساقانا اۋىر زيان كەلتىرۋدىڭ 17 دەرەگى اشىلعان. ولاردىڭ ىشىندە ءتورت كىسى ءولىمى تىركەلگەن.
ەسكە سالا كەتەيىك, بۇعان دەيىن باس پروكۋراتۋرا پاۆلودار وبلىسىندا اليمەنت تولەمەگەن ازاماتتارعا ارنايى ىزدەۋ جاريالانعانىن مالىمدەدى. ايماقتا «توپ-100 ىزدەستىرىلىپ جاتقان بورىشكەرلەر» رەسپۋبليكالىق تىزبەسىنە ەنگىزىلگەن ازاماتتاردى انىقتاۋ ماقساتىندا جۇمىس توپتارى قۇرىلعان. بۇگىندە تىزىمگە ەنگەن التى بورىشكەردىڭ بەسەۋىنىڭ ورنالاسقان جەرى انىقتالعان.