2-4 مامىر ارالىعىندا ەل اۋماعىنىڭ باسىم بولىگىندە اۋا رايى قۇبىلمالى بولادى. سينوپتيكتەردىڭ بولجامىنشا, ەل وڭىرلەرىندە نايزاعاي ويناپ, جاڭبىر جاۋادى, دەپ جازادى Egemen.kz.
مامانداردىڭ مالىمەتىنشە, وڭتۇستىك پەن وڭتۇستىك-شىعىستا جاۋىن-شاشىن ءۇش كۇن بويى تولاسسىز جاۋى مۇمكىن. ال 4 مامىر كۇنى نوسەر جاڭبىر سولتۇستىك-باتىس ايماقتارعا دا جەتەدى دەپ بولجانعان. كەي وڭىرلەردە بۇرشاق ءتۇسىپ, ەكپىندى جەل سوعۋى ىقتيمال. تۇنگى جانە تاڭعى ۋاقىتتاردا رەسپۋبليكا كولەمىندە تۇمان ءتۇسۋى ىقتيمال.
سونىمەن قاتار بىرقاتار وڭىردە ۇسىك ساقتالادى. اتاپ ايتقاندا, تۇندە باتىس, سولتۇستىك-باتىس, سولتۇستىك جانە ورتالىق ايماقتاردا اۋا تەمپەراتۋراسى -3 گرادۋسقا دەيىن تومەندەۋى مۇمكىن.
اپتاپ ىستىق, نوسەر, بۇرشاق: مامىر ايىندا اۋا رايى قۇبىلمالى بولادى
ال كۇندىز اۋا تەمپەراتۋراسى جىلىنا باستايدى. باتىستا اۋا تەمپەراتۋراسى +17…+32 گرادۋسقا دەيىن كوتەرىلسە, سولتۇستىك-باتىستا +15…+30, سولتۇستىكتە +15…+23, ال ورتالىقتا +17…+27 گرادۋس شاماسىندا بولادى.
ال شىعىس پەن وڭتۇستىك-شىعىستا, كەرىسىنشە, كۇندىزگى تەمپەراتۋرا +14…+25 جانە +13…+23 گرادۋسقا دەيىن تومەندەيدى.