وتاندىق كوللەدج وقىتۋشىسى وزىق تاجىريبەسى ءۇشىن حالىقارالىق سىيلىق يەلەندى. بۇل ماراپات – ءبىلىم سالاسىنداعى ۇزدىك جۇمىستار مەن ناتيجەلەردى باعالاپ, ونى كەڭ ارەنادا ناسيحاتتاۋدى ماقسات ەتەتىن جوبا. ETF NEW LEARNING AWARD – وقۋ ۇدەرىسىندەگى ءساتتى شىققان جوبالاردى ىرىكتەپ, جاھاندىق دەڭگەيدە تاراتۋعا باعىتتالعان بەدەلدى باستاما.
بايقاۋعا الەمنىڭ ءتۇرلى ەلدەرىنەن پەداگوگتەر قاتىسىپ, وزدەرىنىڭ يننوۆاتسيالىق ادىستەمەلەرىن ۇسىنادى. SCAFFOLD تەحنولوگياسى 2024 جىلدان بەرى, بەيسەن احمەتوۆ اتىنداعى جوعارى پەداگوگيكالىق كوللەدجدە وقۋ ۇدەرىسىندە قولدانىلىپ كەلەدى. گۇلميرا مەشىتباەۆا ۇسىنعان جوبا «باستاۋىش ءبىلىم بەرۋ» ماماندىعى ستۋدەنتتەرىن دايارلاۋدا قولدانىلاتىن SCAFFOLD كارتالارىنا نەگىزدەلگەن. بۇل ادىستەمە ستۋدەنتتەردىڭ تسيفرلىق تەحنولوگيالاردى ءتيىمدى قولدانۋىنا مۇمكىندىك بەرىپ, وقۋ ۇدەرىسىن جاڭا دەڭگەيگە كوتەرگەن. ناتيجەسىندە, بولاشاق مۇعالىمدەر بەينەماتەريالدار مەن ءارتۇرلى دەڭگەيدەگى تاپسىرمالاردى قامتيتىن ءبىلىم بەرۋ جوبالارى مەن سايتتار ازىرلەۋدى مەڭگەرگەن.
اتالعان جوبالار باستاۋىش سىنىپ وقۋشىلارىن وقىتۋدا زاماناۋي تاسىلدەردى ەنگىزۋگە جول اشىپ قانا قويماي, پەداگوگتەرگە ادىستەمەلىك قولداۋ كورسەتۋگە, اتا-انالارعا پراكتيكالىق ۇسىنىمدار بەرۋگە دە باعىتتالعان. حالىقارالىق ساراپشىلار قازاقستاندىق پەداگوگتىڭ تاجىريبەسىن جوعارى باعالاپ, جۇمىستى «Scaffold قۇرالدارىن پايدالانۋ ارقىلى مۇعالىمدەردىڭ مۇمكىندىكتەرىن كەڭەيتۋ» نوميناتسياسى بويىنشا «INSPIRATION AWARD» سىيلىعىنا لايىق دەپ تانىدى. سونىمەن قاتار گۇلميرا مەشىتباەۆاعا ءوز تاجىريبەسىن بەلگيانىڭ بريۋسسەل قالاسىندا وتەتىن حالىقارالىق كونفەرەنتسيادا تانىستىرۋ مۇمكىندىگى بەرىلدى.
ارۋجان دوسىمحان,
قارۇزۋ ستۋدەنتى