پاۆلودار وبلىسىنداعى اقتوعاي اۋدانىنىڭ پروكۋراتۋراسى اۋماعىندا سۋ وبەكتىلەرى مەن سۋ قورعاۋ ايماقتارى ورنالاسقان اۋىل شارۋاشىلىعى ماقساتىنداعى جەر ۋچاسكەلەرىن زاڭسىز بەرۋ ارەكەتىنىڭ جولى كەسىلدى, دەپ حابارلايدى Egemen.kz.
وبلىس پروكۋراتۋراسىنىڭ مالىمدەۋىنشە, تەكسەرۋ بارىسىندا تۇششى جانە تۇزدى كولدەر, سونداي-اق تۇز وندىرۋگە پايدالانىلاتىن سۋ ايدىندارى ورنالاسقان 3 جەر ۋچاسكەسىنىڭ كونكۋرسقا شىعارىلعانى انىقتالدى. الايدا كونكۋرس قۇجاتتاماسىن ازىرلەۋ كەزىندە مەملەكەتتىك ورگان تاراپىنان ارنايى راسىمدەردى وتكىزۋدى جانە قاجەتتى كەلىسىمدەردى الۋدى كوزدەيتىن سۋ كودەكسىنىڭ مىندەتتى تالاپتارى ساقتالماعان.
82 ملن تەڭگە: اقمولادا جەر تەلىمى مەملەكەتكە قايتارىلدى
«ناتيجەسىندە مۇددەلى تۇلعالارعا تەك جەر ۋچاسكەلەرىنە عانا ەمەس, جالپى اۋماعى 60 گەكتاردان اساتىن, ەرەكشە ماڭىزعا يە جانە مەملەكەت قورعاۋىنداعى سۋ رەسۋرستارىنا دا قول جەتكىزۋ مۇمكىندىگىن بەرۋ ارەكەتى جاسالعان.
پروكۋرورلىق قاداعالاۋ اكتىسى بويىنشا زاڭسىز كونكۋرس ناتيجەلەرى جويىلىپ, انىقتالعان زاڭ بۇزۋشىلىقتار جويىلدى. تابيعي رەسۋرستاردى ۇتىمدى پايدالانۋ سالاسىنداعى مەملەكەتتىك مۇددەلەر قورعالدى», دەلىنگەن حابارلامادا.
كىنالى لاۋازىمدى تۇلعالار تارتىپتىك جاۋاپكەرشىلىككە تارتىلدى.
بۇعان دەيىن شقو-نىڭ كاتونقاراعاي اۋدانىنىڭ پروكۋراتۋراسى اۋىل شارۋاشىلىعى ماقساتىنداعى جەرلەردى ءتيىمسىز پايدالانۋ فاكتىلەرىن انىقتاعانى تۋرالى حابارلاعان ەدىك.