كەزىندە وبلىس تاراعاندا قالالىق اۆتوپاركتەر دە جەكەنىڭ يەلىگىندە كەتىپ, جۇيتكىگەن كولىكتەردىڭ ءبىرشاما «جۇرىسىنەن جاڭىلعانى» بەلگىلى. ايتكەنمەن كەيىنگى ءبىر جىلدىڭ بەدەرىندە سەمەي قالاسىنداعى قوعامدىق كولىك قاتىناسىنىڭ جۇمىسى قايتا جاندانا باستاعانى بايقالادى.
تاياۋدا سەمەيدە جاڭا اۆتوبۋستار ەل يگىلىگىنە بەرىلدى. وبلىس اكىمىنىڭ تاپسىرماسىنا سايكەس بىلتىردان باستاپ قالاداعى تاسىمالداۋشىلار اۆتوپاركتەرىن جاڭارتۋ جۇمىسى جۇرگىزىلىپ جاتىر. سونىڭ اياسىندا «اۆتوترانسسەمەي», «سەماۆتوپارك» جاۋاپكەرشىلىگى شەكتەۋلى سەرىكتەستىكتەرى سەمەيدە قۇراستىرىلعان زاماناۋي 32 اۆتوبۋس ساتىپ الدى.
«جاڭا كولىكتەر جولاۋشىلارعا قولايلى ءارى قاۋىپسىز. اۆتوبۋستىڭ سىيىمدىلىعى 100 ادامعا دەيىن, بارلىق كولىكتە سالقىنداتۋ قۇرىلعىسى ورناتىلعان. سونىمەن قاتار قيمىل-قوزعالىسى شەكتەۋلى ازاماتتارعا ىڭعايلى بولۋ ماقساتىندا اۆتوبۋستار رەتتەلەتىن وتىرعىزۋ الاڭىمەن, ارنايى اپپارەلمەن جابدىقتالعان», دەلىنگەن اكىمدىكتىڭ مالىمەتىندە.
وبلىس اكىمى بەرىك ءۋالي وڭىردە قوعامدىق كولىك جۇيەسىن جاڭعىرتۋ جۇمىسى كەزەڭ-كەزەڭىمەن جالعاساتىنىن جەتكىزدى. «اۆتوبۋستاردىڭ بارلىعى زامان تالابىنا ساي جابدىقتالعان. جولاۋشىلارعا وتە قولايلى. بۇل باعىتتاعى جۇمىستى جۇيەلى تۇردە جالعاستىرامىز. جولاۋشى تاسىمالداۋشىلارعا اكىمدىك تاراپىنان ءتيىستى قولداۋ كورسەتىلەدى», دەدى ءوڭىر باسشىسى.
اكىمدىكتىڭ مالىمەتىنشە, بيىل قالاعا 70-كە جۋىق جاڭا اۆتوبۋس ساتىپ الۋ جوسپارلانعان. قازىر 46 اۆتوبۋس ساتىپ الىندى. ونىڭ 14-ءى جىلدىڭ باسىندا بەرىلگەن. بىلتىر قوعامدىق كولىك پاركىن جاڭارتۋ ماقساتىندا 62 اۆتوبۋس ساتىپ الىنعان بولاتىن. قازىر سەمەيدە 43 قالالىق مارشرۋتتا 329 اۆتوبۋس جۇمىس ىستەيدى. قالا تۇرعىندارىنا 5 تاسىمالداۋ-شى قىزمەت كورسەتىپ وتىر. الايدا بۇل وسى سالاداعى جۇمىس تۇبەگەيلى شەشىلدى دەگەندى بىلدىرمەسە كەرەك.
بۇل ىستە جەرگىلىكتى ءوندىرىستىڭ ءرولى ەرەكشە. 2025–2026 جىلدارداعى رەسمي حابارلامالاردا اۆتوبۋستاردىڭ سەمەيدە قۇراستىرىلعانى ايتىلدى. دەمەك, ماسەلە تەك دايىن كولىك اكەلۋمەن شەكتەلمەيدى. قالادا كولىك جاڭارتۋ ءوندىرىس, جۇمىس ورنى جانە ينفراقۇرىلىمدىق ساياساتپەن ساباقتاسىپ وتىر. وسى تۇرعىدان العاندا, سەمەيدەگى اۆتوبۋس پاركىن جاڭارتۋ كولىك سالاسىنداعى عانا ەمەس, جەرگىلىكتى ەكونوميكانى قولدايتىن قادامداردىڭ ءبىرى دەۋگە بولار.
راسىندا, بىلتىردان بەرى جولاۋشىلار كولىگى ماسەلەسى كۇن تارتىبىنەن تۇسكەن جوق. قوعام تاراپىنان اتالعان ماسەلە ءجيى كوتەرىلدى. وبلىستىق اكىمدىك تە اۆتوپاركتىڭ جاڭارۋىنا باسىمدىق بەردى. جاڭا اۆتوبۋستاردى كوبەيتۋ, تاسىمالداۋشىلارعا قولداۋ كورسەتۋ, جاڭعىرتۋدى كەزەڭ-كەزەڭىمەن جالعاستىرۋ سەكىلدى ۇستانىمدار رەسمي دەڭگەيدە بىرنەشە رەت ايتىلدى.
بۇل سالادا ىلكىمدى جاڭالىقتار قالا ىشىندە عانا ەمەس, وبلىس كولەمىندە دە جۇرگىزىلىپ جاتىر. ماسەلەن, اياگوزدە بىلتىر 10 جاڭا اۆتوبۋس بەرۋ كوزدەلگەنى, العاشقى لەگى جەتكىزىلگەنى, بىرنەشە مارشرۋتقا شىعارىلعانى ايتىلدى. سونىمەن قاتار الەۋمەتتىك ينفراقۇرىلىمعا قاجەت كولىكتەر دە نازاردان تىس قالعان جوق.
ارينە, سالاداعى شەشىمىن كۇتكەن تۇيتكىلدەر دە از ەمەس. كەيىنگى ايلاردا تۇرعىندار تاراپىنان قوعامدىق كولىكتىڭ ءجۇرۋ ارالىعىنىڭ ۇزاقتىعى, كەي اۆتوبۋستىڭ ايالدامادان توقتاماي ءوتۋى, ديسپەتچەرلىك جاۋاپتىڭ باياۋلىعى جونىندە شاعىم ايتىلدى. بۇعان قوسا, كولىك جۇرگىزۋشىلەردىڭ جالاقىسى مەن ولارعا ورىندى-ورىنسىز ايىپپۇل سالۋ, ونى ايلىقتان ۇستاپ قالۋ سىندى ماسەلەلەر ءجيى كوتەرىلەدى. بۇل ولقىلىقتار دا كەزەگى كەلگەندە تۇزەلەر دەپ سەنەمىز.
ەندى ءبىر وزەكتى ماسەلە, قالاداعى 500-دەن اسا ايالدامانىڭ ەداۋىر بولىگىنىڭ جاعدايى ايانىشتى, تالاپقا ساي كەلە بەرمەيدى. سىرى تۇسكەن, بوياۋى وڭعان, اتاۋى وشكەن, كۇتىمى كەم, كەي تۇستا ءتىپتى قوس-قوستان ورنالاسقان ايالدامالار دا كەزدەسەدى. ارينە, قوعامدىق كولىك جاڭارىپ جاتىر, بىراق جۇيە تۇتاس وزگەردى دەۋگە ەرتە. اۆتوبۋستاردىڭ جاڭارۋى ماسەلەنىڭ ءبىر جاعى, ال قىزمەت ساپاسى, قوزعالىس ءتارتىبى مەن ايالداما ينفراقۇرىلىمى قاتار كوركەيۋدى قاجەت ەتەدى.
اباي وبلىسى