پاراسات ورداسى ۇلتتىق كىتاپحانادا «شالقار» راديوسىنىڭ 60 جىلدىق مەرەيتويىنا ارنالعان تاعىلىمدى جيىن ءوتتى. 1966 جىلدىڭ 1 قاڭتارىندا كەشكى ساعات 19.00-دە داۋىلپاز ديكتور انۋاربەك بايجانباەۆتىڭ حابارلاۋىمەن اۋە تولقىنىنا شىققان «شالقار» باعدارلاماسى ۋاقىت بەدەرىندە اۋقىمىن كەڭەيتىپ ۇلتتىق راديوعا اينالعان ەدى. تاۋلىگىنە 18 ساعات بويى تولىقتاي قازاق تىلىندە حابار تاراتاتىن راديو ۇلتتىق اقپارات كەڭىستىگىندە ءوز ورنىن قالىپتاستىرعان ىرگەلى ۇجىم رەتىندە ۇزدىكسىز قىزمەت ەتىپ كەلەدى.
حالىق جۇرەگىن تەربەگەن راديونىڭ مەرەيتويىنا ءومىرىن وسى سالاعا ارناعان ارداگەر جۋرناليستەر ارنايى شاقىرىلىپ, ولارعا قۇرمەت كورسەتىلدى. كەش شىمىلدىعىن اشقان پرەزيدەنت كەڭەسشىسى مالىك وتارباەۆ «شالقار» راديوسىنىڭ ۇجىمىن مەرەيلى بەلەسىمەن قۇتتىقتاپ, مەملەكەت باسشىسىنىڭ ىزگى لەبىزىن جەتكىزدى.
«ۇلتتىڭ ۇنبايراعى اتانعان «شالقار» راديوسى – قازاق رۋحانياتى مەن ەل تاريحىندا ورىن العان ەرەكشە قۇبىلىس. تاۋەلسىزدىككە دەيىنگى كەزەڭدە قازاق تىلىندە حابار تاراتىپ, ۇلتتىق قۇندىلىقتاردى پاش ەتكەن «شالقار» اتتى باعدارلاما, ودان كەيىن ۇلتتىق راديونىڭ ومىرگە كەلۋى – سول زامانداعى ۇلتىن سۇيگەن, ەلىنىڭ قادىر-قاسيەتىن, بولاشاعىن ويلاعان ارداقتى اعا-اپالارىمىزدىڭ ەرلىگى. وسى ورايدا اعا بۋىن وكىلدەرىنە زور العىس ايتامىز. «شالقار» راديوسى بۇگىندە ۇلتىمىزعا قالتقىسىز قىزمەت ەتىپ كەلەدى. قازاقتىڭ ءداستۇرلى مۋزىكاسى مەن ءتول ونەرىن, ۇلتتىق مادەنيەتى مەن ادەبيەتىن, ساعىندىرعان رەترو مۋزىكاسىن, وتكەنىمىزدەن سىر شەرتەتىن التىن قورداعى اسىل قازىنالارىمىزدى ناسيحاتتاپ, مەملەكەتتىك تىلدە حابار تاراتاتىن ناعىز ۇلتتىق ارناعا اينالىپ وتىر. بۇل بەلەسكە راديو قىزمەتكەرلەرى ۇزاق جىلعى قاجىرلى ەڭبەگىمەن, ۇزدىكسىز ىزدەنۋىمەن جەتكەنى انىق. راديوجۋرناليستيكا – قىزىعى مەن قيىندىعى مول, زور جاۋاپكەرشىلىكتى قاجەت ەتەتىن بىرەگەي كاسىپ. سوندىقتان دا اقپارات ايدىنىندا جۇرگەن سىزدەردى ايتۋلى ساتپەن قۇتتىقتايمىن», دەدى م.وتارباەۆ.
ءوز كەزەگىندە پرەزيدەنت كەڭەسشىسى بىرقاتار راديو ارداگەرى مەن قىزمەتكەرىنە قازاقستان پرەزيدەنتىنىڭ توسبەلگىسى مەن العىسحاتىن تابىستادى. ولاردىڭ قاتارىندا تۇتاس عۇمىرناماسىن راديو ومىرىمەن ورگەن بەلگىلى ديكتورلار مەن ارنانىڭ بۇگىنگى تاڭداعى بەلدى قىزمەتكەرلەرى بار.
ءىس-شاراعا ارنايى كەلگەن مادەنيەت جانە اقپارات ۆيتسە-ءمينيسترى قانات ىسقاقوۆ راديو ۇجىمىنا ىزگى لەبىزىن ءبىلدىرىپ, پرەمەر-مينيستر ولجاس بەكتەنوۆ, مەملەكەتتىك كەڭەسشى ەرلان قارين, سونداي-اق پرەمەر- ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆانىڭ قۇتتىقتاۋ حاتىن وقىپ بەردى.
قۇتتىقتاۋ سوزىندە قانات ىسقاقوۆ كۇنى بۇگىن ەلىمىزدە 60-تان اسا راديوستانسا اقپارات تاراتىپ وتىرعانىن, بۇل رەتتە ۇلتتىق قۇندىلىقتارىمىزدى دارىپتەپ, تاريحىمىز بەن مادەنيەتىمىزدى پاش ەتكەن ۇلتتىق راديونىڭ ورنى بولەك ەكەنىن اتاپ ءوتتى. ونىڭ ايتۋىنشا, «شالقار» راديوسىنىڭ قازىرگى تارالىم اۋقىمى ەلىمىزدىڭ 73 پايىزىن قۇرايدى. الداعى ۋاقىتتا مينيسترلىكتىڭ باستاماسىمەن وسى اۋقىمدى 95 پايىزعا جەتكىزىپ, «شالقار» راديوسىنىڭ ءۇنىن شالعاي اۋداندارعا جەتكىزۋ كوزدەلىپ وتىر.
ۆيتسە-مينيستر راديو ارداگەرلەرى مەن ۇجىمدا تاباندى ەڭبەك ەتىپ جۇرگەن بىرقاتار ارىپتەسىمىزدى ۆەدومستۆا باسشىسىنىڭ اتىنان «ەڭبەك ارداگەرى», «اقپارات سالاسىنىڭ ۇزدىگى» توسبەلگىلەرىمەن, سونداي-اق مادەنيەت جانە اقپارات ءمينيسترىنىڭ قۇتتىقتاۋ حاتىمەن ماراپاتتادى. سونىمەن قاتار جيىندا راديو ۇجىمىنا سەنات جانە ءماجىلىس توراعالارىنىڭ, بىرقاتار قالا اكىمدەرى مەن قوعامدىق ۇيىم باسشىلارىنىڭ قۇتتىقتاۋ حاتتارى تاپسىرىلدى. سالتاناتتى جيىندا ارنانىڭ 60 جىلدىعىنا وراي «ۇلتتىڭ ۇنبايراعى» اتتى كىتاپتىڭ تۇساۋى كەسىلدى.
«راديودا ۋاقىتتىڭ ءۇنى بار. مۇندا ءداۋىر شەجىرەسى قاتتالعان. «الماتىدان سويلەپ تۇرمىز, ەفيردە – شالقار!» دەگەن داۋىس بۇكىل دۇنيەجۇزىندەگى قازاقتىڭ جۇرەگىن تەبىرەنتكەنى انىق. «شالقار» راديوسى – قازاق راديوجۋرناليستيكاسىنىڭ التىن دىڭگەگى. ءومىرىمىزدىڭ ەڭ ءبىر شۋاقتى كەزەڭدەرى وسىندا ءوتتى», دەيدى راديو ارداگەرى بۇركىت بەكماعامبەتوۆ.
ۇلتتىق راديونىڭ بۇگىنگى تاڭداعى التىن داۋسىنا اينالعان بەلگىلى جۋرناليستەر باقىت جاعىپار ۇلى مەن گۇلميرا ءنالىباي تىزگىندەگەن مەرەيتويلىق ءىس-شارا اسەم اۋەن قالىقتاعان كونتسەرتتىك باعدارلاماعا ۇلاستى.