پرەمەر-ءمينيستردىڭ ءبىرىنشى ورىنباسارى رومان سكليار ەلىمىزگە ىسساپارمەن كەلگەن شانحاي قالاسى حالىق ۇكىمەتىنىڭ توراعاسى گۋن چجەنمەن كەزدەسۋ وتكىزدى. تاراپتار ساۋدا-ەكونوميكالىق جانە ينۆەستيتسيالىق ىنتىماقتاستىقتىڭ قازىرگى جاعدايى مەن ونى تەرەڭدەتۋ كەلەشەگىن تالقىلادى, سونداي-اق ءىرى مەگاپوليستەر دەڭگەيىندەگى ءوزارا ءىس-قيمىلعا ەرەكشە نازار اۋداردى.
كەلىسسوز بارىسىندا ەكى مەملەكەت كوشباسشىلارىنىڭ ديپلوماتياسىنىڭ ارقاسىندا قازاق-قىتاي قاتىناستارى بۇرىن-سوڭدى بولماعان جوعارى دەڭگەيدە ەكەندىگى اتاپ ءوتىلدى. رومان سكليار شانحايدىڭ يننوۆاتسيالار, قارجى جانە «جاسىل» ەنەرگەتيكا سالاسىنداعى الەمدىك كوشباسشىلاردىڭ ءبىرى رەتىندەگى جوعارى الەۋەتىنە توقتالىپ, ەكى ەلدىڭ قارجى مەن ىسكەرلىك ورتالىقتارى اراسىنداعى پراكتيكالىق ارىپتەستىكتى كەڭەيتۋدىڭ ماڭىزدى ەكەنىن ايتتى.
ءوز كەزەگىندە گۋن چجەن شانحاي كومپانيالارىنىڭ ەلىمىزدە بىرلەسكەن جوبالاردى, سونىڭ ىشىندە ماشينا جاساۋ, لوگيستيكا, جوعارى تەحنولوگيالار, تسيفرلاندىرۋ سالالارىندا جۇزەگە اسىرۋعا قىزىعۋشىلىعىن راستادى.
پرەمەر-ءمينيستردىڭ ءبىرىن-ءشى ورىنباسارى الماتى مەن شانحاي اراسىنداعى بىلتىر قۇرىلعان باۋىرلاس قالالار قارىم-قاتىناستارىنىڭ الەۋەتىن جوعارى باعالاپ, بۇل فورمات ساۋدا, ينۆەستيتسيا, مادەنيەت, ءبىلىم بەرۋ سالالارىنداعى تاجىريبە الماسۋدا پراكتيكالىق ىنتىماقتاستىقتى ورنا-تۋعا ىقپال ەتەتىنىن اتاپ ءوتتى.
كەزدەسۋ سوڭىندا تاراپتار ستراتەگيالىق ارىپتەستىكتى ودان ءارى نىعايتۋعا, سونداي-اق ەل ەكونوميكاسىن ارتاراپتاندىرۋعا, قىتاي بيزنەسىنىڭ ورتالىق ازيا نارىقتارىنا شىعۋىنا ىقپال ەتەتىن بىرلەسكەن باستامالاردى ىسكە اسىرۋعا ءوزارا دايىندىعىن راستادى.