وقۋ-اعارتۋ مينيسترلىگىنىڭ ءباسپاسوز قىزمەتى اتالعان سالا سايتىندا مۇعالىمدەر مەن دارىندى وقۋشىلاردىڭ جەتىستىكتەرىن ناسيحاتتاپ وتىراتىن «100 جاڭا ەسىم» اتتى ايدار اشقان. سونداي-اق مۇندا مەكتەپ ومىرىندەگى قىزىقتى وقيعالار دا باياندالادى.
ايداردىڭ العاشقى كەيىپكەرى – اقتوبە وبلىسى قارعالى اۋدانى الىمبەت اۋىلىنداعى ورتا مەكتەپتىڭ 4-سىنىپ وقۋشىسى نۇرتالاپ باقىتجانوۆ. ول ەنەرگيا وندىرۋگە ارنالعان جوبا ازىرلەگەن. ونىڭ جۇمىسى اتوم ەلەكتر ستانسالارىنىڭ (اەس) ەلەكتر ەنەرگياسىن وندىرۋدەگى تيىمدىلىگىن زەرتتەۋگە باعىتتالعان.
جاس ونەرتاپقىش قۇراستىرعان ماكەت سۋدى قايناتىپ, 2-2,5 اتموسفەرالىق قىسىمدا بۋ ەنەرگياسىن الادى. بۇل ەنەرگيا تۋربينا ارقىلى مەحانيكالىق ەنەرگياعا, ودان ءارى ەلەكتر ەنەرگياسىنا اينالادى. ماكەت رەاكتور, بۋ تۋربيناسى, گەنەراتور, ەنەرگيا تاراتۋ قۇبىرلارى, گراديرنيا, سۋىتۋ باسسەينى سەكىلدى قۇرامداس بولىكتەردەن تۇرادى.
جەتكىنشەك جوبانى ازىرلەۋ بارىسىندا اەس قۇرىلىسىن زەرتتەپ, ەلەكتر ەنەرگياسىن ءتيىمدى ءوندىرۋدىڭ جولدارىن ىزدەستىرگەنىن ايتادى. «الەمدەگى اەس-تىڭ جۇمىس قاعيداتتارى مەن قۇرىلىمىنا تالداۋ جاساپ, شاعىن ماكەت جاساۋ ءۇشىن فيزيكا مەن عارىش سالاسىنداعى دەرەكتەردى زەرتتەدىم», دەيدى ول.
تالاپتى ورەن «زەردە» عىلىمي جوبالار بايقاۋىنا تۇراقتى قاتىسادى. ەكى جىل قاتارىنان وسى بايقاۋدىڭ وبلىستىق كەزەڭىندە ءى دارەجەلى ديپلوم يەلەنگەن. سونىمەن قاتار رەسپۋبليكالىق «اقبوتا» زياتكەرلىك وليمپياداسىندا ءى دارەجەلى ديپلوممەن ماراپاتتالسا, رەسپۋبليكالىق «باستاۋ» ماتەماتيكا وليمپياداسىندا ءۇشىنشى ورىن, اۋداندىق «التىن ساقا» ماتەماتيكا بايقاۋىندا ءبىرىنشى ورىن جەڭىپ العان.
بولاشاقتا جاس ونەرتاپقىش ينجەنەر ماماندىعىن الىپ, ءارتۇرلى ەنەرگيا كوزدەرىندە جۇمىس ىستەيتىن قۇرىلعى جاساۋدى ارماندايدى.
قايسار قۇسايىن