وسىدان ەكى جىل بۇرىن 2 اقپان ەلىمىزدە ۇلتتىق ءباسپاسوز كۇنى بولىپ بەكىتىلگەن ەدى. بارشا گازەت-جۋرنالدىڭ كاسىبي مەرەكەسى رەتىندە بۇل كۇن كەزدەيسوق تاڭدالعان جوق.
قازاق ءباسپاسوزىنىڭ تاريحىنا كوز جۇگىرتسەك, 1913 جىلدىڭ 2 اقپانىندا احمەت, ءاليحان, مىرجاقىپ باستاعان ۇلت زيالىلارىنىڭ ۇيىتقى بولۋىمەن, الاش ۇراندى داۋلەتتى ازاماتتاردىڭ دەمەۋشىلىگىمەن قازاقتىڭ تۇڭعىش ۇلتتىق قوعامدىق-ساياسي جانە ادەبي-مادەني باسىلىمى «قازاق» گازەتىنىڭ العاشقى سانى جارىق كورگەن. سول كۇننەن باستاپ حالىقتىڭ كوزى, قۇلاعى ءھام ءتىلى بولىپ قالىپتاسقان ۇلتتىق ءباسپاسوز سالاسى ودان كەيىن دە بىرقاتار گازەت-جۋرنالدارمەن تولىعىپ وتىردى. ساياسي قىسىمعا ۇشىراعان ولاردىڭ عۇمىرى قىسقا بولسا دا, كەيىنگى بۋىنعا ايتارلىقتاي رۋحاني مۇرا قالدىردى.
مادەنيەت جانە اقپارات مينيسترلىگىنىڭ مالىمەتىنە سۇيەنسەك, بۇگىندە ەلىمىزدە 4 802 باق تىركەلگەن ەكەن (4 499 – وتاندىق, 303 – شەتەلدىك). سولاردىڭ ىشىندەگى 2 981-ءى, ياعني جارتىسىنان استامى – مەرزىمدى باسىلىم. ونىڭ ىشىندەگى 1 922-ءسى – گازەت, 1 059-ى – جۋرنال.
ارينە, كەيىنگى جىلدارى اقپارات ايدىنىنداعى ونىمدەردىڭ تەحنولوگيالىق, تاقىرىپتىق تۇرلەنۋىنە بايلانىستى بۇقارالىق اقپارات قۇرالدارىنىڭ تسيفرلىق دامۋ ءداۋىرى قارقىن الدى. بۇل – الەمدىك ءۇردىس, زاماناۋي ۇدەرىس. گازەت-جۋرنالداردىڭ باسىمدىعىنىڭ بۇرىنعىداي ەمەس ەكەنى راس. دەگەنمەن گازەت-جۋرنالدىڭ ءوز ميسسياسى بار. اقپاراتتىق تسيفرلىق جۇيەنىڭ العا وزعانى اقيقات دەسەك تە, ءباسپاسوزدىڭ ادامزاتقا ءالى تالاي قىزمەت ەتەرى دە حاق.