پرەزيدەنت ۇكىمەتتىڭ كەڭەيتىلگەن وتىرىسىندا 2025 جىل «جۇمىسشى ماماندىقتار جىلىنا» ارنالاتىنىن تاعى دا ەسكە سالىپ ءوتتى. وسى ورايدا جۇمىسشى ماماندىقتارىن يگەرگەن ازاماتتاردىڭ بەدەلىن, الەۋمەتتىك الەۋەتىن كوتەرۋ ماسەلەسى باستى نازاردا بولماق.
ستاتيستيكالىق زەرتتەۋ مالىمەتتەرىنە كوز جۇگىرتسەك, 2021 جىلدان باستاپ 2024 جىلعى 1 قاراشاعا دەيىن اتاۋلى الەۋمەتتىك كومەك الۋشىلار قۇرىلىمىن تالداۋ بارلىق سانات بويىنشا ايتارلىقتاي قىسقارعانىن اڭعارۋعا بولادى. كومەك الاتىن وتباسىلاردىڭ جالپى سانى ءۇش ەسە ازايدى, ولاردىڭ اراسىندا ايەلدەر مەن بالالار سانى كەمىگەن. اتاۋلى الەۋمەتتىك كومەك الاتىن كوپبالالى وتباسىلاردىڭ سانى دا ەكى ەسە قىسقارعان, بۇل سوڭعى 3,5 جىلدا تولەمگە قاتىسۋشىلاردىڭ جالپى ازايعانىن كورسەتەدى.
جۇمىسپەن قامتىلعان حالىقتىڭ قۇرىلىمىندا جالدامالى جۇمىسشىلار باسىم. بۇل سانات وتباسى جاعدايى بويىنشا بارلىق توپتاردا, ونىڭ ىشىندە بۇرىن-سوڭدى نەكەگە تۇرماعان, نەكەدە تۇراتىن, اجىراسقان جانە جەسىر/تۇل قالعانداردى قوسا كورسەتەدى. ءوزىن-ءوزى جۇمىسپەن قامتىعاندار مەن ەڭبەك قىزمەتىنىڭ باسقا تۇرلەرى وكىلدەرىنىڭ سانى ايتارلىقتاي از. ستاتيستيكالىق مالىمەتتەرگە سۇيەنسەك, ەل ازاماتتارىنىڭ 7,8%-ىنىڭ تابىسى جوق. حالىق قۇرىلىمىندا تابىسى ورتاشا ءۇي شارۋاشىلىقتارى ەڭ كوپ, ال تابىسى تومەن توپتار ازىراق ۇلەستى قۇرايدى. حالىقتىڭ ىشىندە اۋقاتتى توپتار ماڭىزدى ورىن الادى, بىراق ەڭ از ۇلەس ەڭ جوعارى تابىس ساناتىنا جاتادى.
ەلىمىزدە بالالارى بار, ەڭبەككە جارامدى جاستاعى ايەلدەر ەڭبەك نارىعىندا قالۋعا تالپىنىپ جاتىر. ەكونوميكاداعى وزگەرىستەر بالانىڭ دۇنيەگە كەلۋىنە بايلانىستى بىلىكتى مامانداردىڭ ەڭبەك نارىعىنان كەتپەۋىن تالاپ ەتەدى. سوندىقتان وتباسىلاردىڭ بالانى ەرتە وقىتۋ جانە تاربيەلەۋ ساپاسىنا زيان كەلتىرمەۋ ءۇشىن جۇمىس ىستەۋ جانە بالالارعا قاراۋ مۇمكىندىگىن قامتاماسىز ەتۋ قاجەت.
بەكزات قۇرمانقىزى,
ساراپشى