ۇكىمەتتىڭ كەڭەيتىلگەن وتىرىسىندا مەملەكەت باسشىسى سۋبسيدياعا ارنايى توقتالىپ, جەرمەن, مالمەن جۇمىس ىستەيتىن ناعىز شارۋالار تۋرالى ماسەلەنى كوتەردى. راسىندا, سۋبسيديا دەگەندى شارۋاشىلىققا كولدەنەڭ كەلىپ قالعان كەيبىرەۋلەر تازا بيزنەسكە اينالدىرىپ العان. ەكپەگەن ەگىنىن ەكتىم دەپ, جوق مالدى بار دەيدى. ءسويتىپ, سۋبسيديانى سىپىرىپ الىپ وتىرادى.
ال سول سۋبسيديانى الۋعا ءتيىس ادامدار وعان قول جەتكىزە المايدى. ويتكەنى قاراپايىم شارۋاعا ۇنەمدەگەن اقشا جەتپەي قالادى. قارجىسى جەتپەگەندىكتەن شارۋا دىتتەگەن ويىن جۇزەگە اسىرا المايدى. جۇزەگە اسىرعانىنىڭ ءوزىن بازار مەن شارۋا اراسىندا جۇرگەن دەلدالدار پايدالانىپ كەتەدى. دەلدالداردىڭ دەنىندە زاماناۋي تەحنولوگيامەن جاراقتانعان قويمالارى بار. دايىن ءونىمدى ارزانعا ساتىپ الادى دا, قىمباتتاعانشا ساقتاپ وتىرادى.
ءبىر تامشى تەر توكپەي جيناعان ءونىمىن قىمباتتاعان كەزدە بازارعا شىعارادى. سوندىقتان جەرمەن جۇمىس ىستەپ جاتقان ادامدارعا, ءونىمىنىڭ ءبىر بولىگىن بەلگىلى ءبىر ۋاقىتقا دەيىن ساقتاي الاتىن جاعداي تۋدىرۋ كەرەك. ياعني ءار اۋىلدا قويما بولسا قۇبا-قۇپ. سوندا عانا ازىق-ت ۇلىك ءونىمى قولدان قىمباتتاتىلمايدى. ءوزىم دە شارۋامىن, ديقاننىڭ ءوز ءونىمىن قىمباتقا ساتىپ جاتقانىن كورگەن ەمەسپىن.
پرەزيدەنت تۋرا ايتىپ وتىر. بۇدان بىلاي قاي ءوڭىردىڭ باسشىسى بەرىلگەن تاپسىرمانى ورىندامادى ما, شارا قولدانىلادى. كەيبىر الاياقتار بيۋدجەت اقشاسىن جۇمساۋعا قابىلەتى جەتەدى, ال وڭىرگە, ەگىس دالاسىنا ينۆەستور تارتۋدى قالامايدى. سوندىقتان ءوڭىر باسشىلارىنىڭ ءىسى ينۆەستور تارتۋ جاعىنان دا باعالانۋى كەرەك. اۋدانعا, وبلىسقا ينۆەستور مەن جۇمىسشى كۇشى تارتىلسا, شارۋاعا ودان ارتىق نە كەرەك؟
كەرىمقۇل بەگاليەۆ,
«زىليحا» شارۋا قوجالىعىنىڭ باسشىسى