مۋزىكا الەمىندەگى حاس تالانتتار كوپ وتپەي-اق بيىك بەلەستى باعىندىرارى انىق. ولار ۇلتتىق مادەنيەتىمىزدى الەمدىك دەڭگەيدە تانىتىپ, تالعامى جوعارى كوشەلى كورەرمەن جۇرەگىنەن جول تاباتىنى ءسوزسىز. سوڭعى ۋاقىتتا وتاندىق جاس مۋزىكانتتار الەمدىك ساحنالاردا ۇلكەن جەتىستىككە قول جەتكىزىپ, ەلىمىزدىڭ مارتەبەسىن ارتتىرىپ كەلەدى.
بۇگىنگى ءسوز تانىمال سكريپكاشى ەراسىل حاميت تۋرالى. ونىڭ ونەرىنە ريم پاپاسى فرانتسيسك ەرەكشە ريزا بولىپتى. قازاق بالاسىنىڭ پاپامەن كەزدەسۋ ساپارى ءبىر جىل بۇرىن جوسپارلانىپتى. ۆاتيكان وكىلى ونىڭ ۆەناداعى جەكە كونتسەرتىنە ارنايى بارىپ, تۋما تالانتتىڭ ونەرىنە ءتانتى بولىپ قايتقاننان كەيىن كوپتەگەن كەزدەسۋ ۇيىمداستىرىلىپتى.
«ۆەنادا جەكە كونتسەرتىم ءوتتى, وعان ۆاتيكان ەلشىسى قاتىستى. ونىڭ ماقۇلداۋىنان كەيىن ءبىز قىركۇيەك ايىندا ريمگە سوڭعى كەزدەسۋگە باردىق, سول جەردە كاردينال مەن ونىڭ كومەكشىسىنە شاعىن جەكە كونتسەرت بەردىك. تەك وسىدان كەيىن كونتسەرتتىڭ وتەتىنى تولىق شەشىلدى. كەزدەسۋ كەرەمەت ءوتتى. ريم پاپاسىمەن تىلدەسۋ ءساتى دە ءتۇستى. ول وتە قاراپايىم جانە مەيىرىمدى كىسى ەكەن. ءداستۇر بويىنشا, جۇزدەسۋ بارىسىندا ونىڭ جۇزىگىن ءسۇيىپ, تىزە بۇگۋ كەرەك ەدى. بىراق ول مۇنداي ءراسىمنىڭ قاجەتى جوعىن ايتىپ, قول الىسۋدىڭ جەتكىلىكتى ەكەنىن ءبىلدىردى. كونتسەرت بارىسىندا پاپا فرانتسيسك ويناعان مۋزىكانى مۇقيات تىڭداپ, بىرنەشە رەت باسىن يزەدى. مۇنى ونىڭ ريزا بولعانىنىڭ بەلگىسى دەپ قابىلدادىم. مەن وعان ارگەنتينالىق كومپوزيتور ا.پياتستسولانىڭ «ليبەرتانگوسى» ورىندادىم. ريم پاپاسى قاتتى اسەرلەنىپ, بۇل تۋىندى وعان تۋعان جەرىن ەسكە سالعانىن ايتتى. كەزدەسۋ سوڭىندا ماعان پاپانىڭ قولىنان ايقىش بەلگىسى مەن باتاسىن الۋ قۇرمەتى بۇيىردى. بۇل مەن ءۇشىن ساۋلەلى ءساتتىڭ ءبىرى بولماق», دەيدى ەراسىل حاميت اعىنان اقتارىلىپ.
كەيىپكەرىمىز م.ۆەنگەروۆ, ن.تسنايدەر, م.مارتين, ت.سامۋيل سياقتى الەمگە ايگىلى مۋزىكانتتاردان جەكە ساباق پەن شەبەرلىك ءدارىسىن العان مۋزىكا مامانى. ەراسىلدىڭ تىنىمسىز قۇلشىنىسى وعان ءوز سالاسىندا كەرەمەت ناتيجە سىيلادى. ايتالىق, ول كرونبەرگ (گەرمانيا), سان-جان-دە-ليۋزدەگى «راۆەل» فەستيۆالى (فرانتسيا), «لاك لەمان» فەستيۆالى (شۆەيتساريا), بولتسانو فەستيۆالى (يتاليا), گرافەنەگگ فەستيۆالى (اۋستريا) سەكىلدى حالىقارالىق مۋزىكالىق فەستيۆالدەرگە قاتىسىپ, ءوز ونەرىن كورسەتتى. سونىمەن قاتار گۋستاۆ مالەر اتىنداعى اكادەميانىڭ قاتىسۋشىسى بولىپ, گرافەنەگگ اكادەمياسىنا ەكى رەت قاتىسقان.
ەراسىل حاميت الماتى قالاسىندا دۇنيەگە كەلگەن. ريمسكي-كورساكوۆ اتىنداعى كونسەرۆاتوريا جانىنداعى ارنايى ورتا مۋزىكالىق مەكتەپتە ءبىلىم العان. سانكت-پەتەربۋرگتە وقىعان كەزىندە ول مراۆينسكي بايقاۋى, «ۆيۆات تالانت» جانە باسقا دا حالىقارالىق بايقاۋلاردىڭ لاۋرەاتى اتاندى. سونداي-اق ول سانكت-پەتەربۋرگتىڭ كامەرالىق جانە سيمفونيالىق وركەسترلەرىمەن بىرگە بىرنەشە رەت ونەر كورسەتتى. 2013 جىلى ءبىلىمىن جالعاستىرۋ ءۇشىن ماسكەۋدەگى پ.چايكوۆسكي اتىنداعى كونسەرۆاتوريانىڭ ورتالىق مۋزىكا مەكتەبىنە پروفەسسور, كافەدرا مەڭگەرۋشىسى سەرگەي كراۆچەنكونىڭ سىنىبىنا قابىلداندى.
وسىدان كەيىنگى ەراسىل ءحاميتتىڭ ونەر ساپارى زالتسبۋرگ قالاسىنداعى موتسارتەۋم ۋنيۆەرسيتەتىندە جالعاستى. وندا ونەرپاز ورەن پروفەسسور پ.امويالدىڭ سىنىبىنا وقۋعا ءتۇسىپ, ءبىلىمىن شىڭدادى. قازىرگى ۋاقىتتا ەراسىل ۆەناداعى مۋزىكا جانە ورىنداۋشىلىق ونەر ۋنيۆەرسيتەتىندە پروفەسسور ا.دانايلوۆانىڭ سىنىبىندا وقىپ جاتىر. مۋزىكا مەملەكەتتەردىڭ مادەني بايلانىسىن دامىتۋعا سەپتىگىن تيگىزەتىن سالانىڭ ءبىرى. دۇنيەجۇزىلىك دەڭگەيدەگى وقۋ وردالارىنان ءبىلىم الىپ, ەلارالىق مادەني بايلانىستى نىعايتۋعا ۇلەس قوسىپ جۇرگەن ەراسىلعا ونەرىڭ ورلەي بەرسىن دەيمىز.