ۇلتىمىزدىڭ مادەنيەتىن الەمگە تانىتىپ جۇرگەن قازاقستاننىڭ حالىق ءارتىسى, ءانشى ديماش قۇدايبەرگەن ونەرىنىڭ قۇرمەتىنە استاناداعى №87 مەكتەپ-گيمنازيادا ارنايى كابينەت اشىلدى. ءىس-شاراعا ءانشىنىڭ اكە-شەشەسى قانات جانە سۆەتا ايتباەۆتار, مەكتەپ وقۋشىلارىنىڭ اتا-انالارى, انسۇيەر قاۋىم قاتىستى.
اتالعان كابينەتتى اشۋ بارىسى تۋرالى ءسوز العان مەكتەپ ديرەكتورى ايگۇل وڭداعانقىزى: ء«بىز بۇل كابينەتتى جاساقتاۋعا كوپ دايىندالدىق. سونداعى ماقساتىمىز – مەكتەپ وقۋشىلارىنىڭ مۋزىكالىق ءبىلىمىن جەتىلدىرىپ, ولاردى ەركىن ويلى ورەندەر رەتىندە جان-جاقتى دامىتۋ. جاپونياعا بارعان ساپارىمدا ولاردىڭ ءبىلىم سالاسىندا مۋزىكاعا ەرەكشە كوڭىل بولەتىنىن ءتۇسىندىم. ءبىز دە مەكتەبىمىزدە ساباق ۇزىلىسىندە ون مينۋتتىق ءان ايتۋ جوباسى سياقتى باستامالاردى قولعا الدىق. مىنە, بۇگىن ديماش سىندى تالانتىمىزدىڭ اتىندا مۋزىكا كابينەتىن اشىپ وتىرمىز. ءبىز وقۋشىلارىمىزدىڭ وي-ءورىسىن كەڭەيتىپ, مەكتەپتەن الەمدىك دەڭگەيگە ۇمتىلسىن دەگەن نيەتتەمىز», دەگەن اقجارما ءسوزىن ايتتى.
ال ديماش قۇدايبەرگەننىڭ اكەسى اتالعان كابينەتتىڭ اشىلۋى مەكتەپ وقۋشىلارىنا شابىت سىيلاپ, ولاردىڭ دا اراسىنان الەمگە تانىلعان تالانتتار شىعۋىنا تىلەكتەستىك ءبىلدىردى ءارى وسى كابينەتكە انشىگە تارتۋ ەتىلگەن سىيلىقتاردان سارالاپ, جادىگەرلەر بەرۋگە دە كومەكتەسەتىنىن ايتتى.