ءورت – ءتىل-قۇلاعى جوق ءتىلسىز جاۋ. تاڭعى ساعات ءتورتتىڭ شاماسىندا باستالعان ءورت كەنتاۋداعى التىنسارين كوشەسىندەگى №1 ءۇي يەلەرىنىڭ اپتەر-تاپتەرىن شىعاردى. ءۇش پاتەر تۇگەلدەي جانىپ كەتتى. قۇداي ساقتاپ وسىندا تۇرىپ جاتقان ادامداردىڭ دەنساۋلىعىنا اۋىر زارداپ اكەلگەن جوق.
– بىزگە 21 ادام كەلىپ كورىندى, – دەيدى كەنتاۋ قالالىق اۋرۋحانا ءبولىمىنىڭ ءدارىگەرلەرى. – سولاردىڭ 17-سىنە دەرەۋ جەدەل كومەك بەرىپ ۇيلەرىنە قايتاردىق. ءورت بولعاننان كەيىن زاردابى بولماي قويمايدى. ءتورت ادام اۋرۋحاناعا تۇسسە, ەكەۋى جان ساقتاۋ بولىمىندە جاتىر. ەكەۋى حيرۋرگيا ءبولىمىندە. ۋلانىپ قالعاندار بار. ولاردى ساۋىقتىرۋدىڭ بار شاراسى قولعا الىنىپ جاتىر.
تۇرعىندار توتەنشە جاعداي ءجونىندەگى ءبولىمنىڭ قىزمەتكەرلەرىنە العىس ايتادى. ولار دەر كەزىندە كەلىپ, تۇرعىنداردى قاۋىپسىز ايماققا كوشىرۋدى ۇيىمداستىرعان. كۋالەردىڭ مالىمەتىنشە ءۇشىنشى قاباتتا تۇتانعان ءورت اۋا تارتقىش قۇبىرى ارقىلى جوعارى ورلەگەن.
ءتىلسىز جاۋ ءبىر ساتتە ۋايىمسىز وتىرعان ءۇش پاتەردەگى وتباسىلاردى ەستەن تاندىرار كۇيگە جەتكىزدى. وقيعا ورنىنا جەتكەن وبلىس اكىمىنىڭ ورىنباسارى ساكەن قالىبەكوۆ: «مۇمكىندىگىنشە ءورت شالعان پاتەر يەلەرىن ۋاقىتشا تۇرعىن ۇيمەن قامتاماسىز ەتىپ جاتىرمىز. ءبىرازى وسىنداعى اعايىندارىنىڭ ۇيلەرىنە بارىپ جايعاستى. قالا اكىمدىگى ىستىق تاماقپەن قامتاماسىز ەتۋدىڭ جاعدايىن شەشتى. تۇرعىنداردى دالادا قالدىرمايمىز. ءورت شالعان پاتەرلەرگە جوندەۋ جۇمىستارىن جۇرگىزىپ جاتىرمىز», دەدى.
شەتەلدەردە توسىن جاعدايدا ادامداردى قۇتقارىپ العانى بولماسا ۇكىمەت باسپانا سالىپ بەرۋدى نەمەسە كۇردەلى جوندەۋدەن وتكىزۋدى موينىنا المايدى. ال قازاقستاندا ازاماتتارىن كوشەدە ءوز مۇڭىمەن ارپالىسۋىنا جول بەرمەيدى.
وبلىس اكىمى اسقار مىرزاحمەتوۆ وسى جاعىن نىقتاپ جاتىر. قۇداي قوس كورسە, پاتەرلەرىنىڭ استان-كەستەڭى شىعىپ ابدىراپ قالعان وتباسىلار دەمەۋشىلەر كومەگىمەن جوندەۋدەن وتكەن سايلى پاتەرلەرىنە قايتا ورالادى.
باقتيار تايجان,
«ەگەمەن قازاقستان».
وڭتۇستىك قازاقستان وبلىسى.