جاۋىنگەرلىك ازىرلىكتى «جەدەل تەستىلەۋ»

«وڭتۇستىك» وڭىرلىك قولباسشىلىعى اسكەري قىزمەتشىلەرىنىڭ جاۋىنگەرلىك ازىرلىگىن «ەكسپرەسس-تەست» ارقىلى تەكسەرۋدە. جەكە قۇرامنىڭ كاسىبي دايىندىعىن, دالالىق ماشىعىن تەكسەرۋ, دەنە دايارلىعى مەن جاۋىنگەرلىك داعدىلارىن ارتتىرۋ ءۇشىن «وڭتۇستىك» وڭىرلىك قولباسشىلىعىندا ارنايى «ەكسپرەسس-تەست» ەنگىزىلدى. ول اتىس جانە دەنە دايارلىعى بويىنشا تۇتاس جاتتىعۋلار كەشەنىن قامتيدى. اتاپ ايت­قاندا ولار: ءجاجم-2, ت-72 جانە اك-74 قارۋ-جاراعىنان جەكە جانە ۆزۆود قۇرامىندا ۇزاق قاشىقتىققا وق اتۋ, قول گراناتالارىن لاقتىرۋ, ارد كەدەرگىلەر جولاعىن ەڭسەرۋ, ۆزۆود قۇرامىندا جاۋىنگەرلىك ماشينانى باسقارۋ, بەلتەمىرگە تارتىلۋ, 24 كيلو گىر تاسىن جۇلقي كوتەرۋ, 5 شاقىرىمعا جۇگىرۋ. «ەكسپرەسس-تەست» «ءما­تى­بۇلاق» (01098 ءا/ب) جانە «وتار» 40-شى اسكەري بازاسىنىڭ (30212 ءا/ب) وقۋ-جاتتىعۋ پو­لي­گوندارىنىڭ بازاسىندا ءتورت كۇن وتكىزىلدى. بۇل ۋاقىت ىشىندە موتواتقىش, تانكتى, ينجەنەرلىك-ساپەرلىك ۆزۆودتار, مينااتقىش باتارەيالار مەن مەرگەندىك جۇپتار قۇرامىنا قاراستى بولىمدەردىڭ 350-دەن استام ءاس­كەري قىزمەتشىسى تەكسەرىستەن ءوتتى. تەستىلەۋ قو­رىتىندىسى بويىنشا ءبىر­قاتار موتواتقىش, تانكتى, ينجەنەرلىك-ساپەرلىك ۆزۆودتار مەن مينااتقىش باتارەياسى بەلگىلەندى. «ەگەمەن-اقپارات».