استانا. 16 ماۋسىم. بيىل ءپىتىر ساداقا ەلىمىز بويىنشا جان باسىنا 200 تەڭگە بولىپ بەكىتىلدى. بۇل تۋرالى قازاقستان مۇسىلماندارى ءدىني باسقارماسىنىڭ نايب ءمۇفتيى, «نۇر استانا» ورتالىق مەشىتىنىڭ باس يمامى ناۋرىزباي قاجى تاعان ۇلىنىڭ مالىمدەمەسىنە سىلتەمە جاساعان «قازاقپارات» حابارلادى.
«ءپىتىر ساداقانى رامازان ايىنىڭ باسىنان ايت نامازىنا دەيىن بەرۋگە بولادى. بيىل ءپىتىر ساداقا ەلىمىز بويىنشا جان باسىنا 200 تەڭگە بولىپ بەكىتىلدى», – دەدى نايب ءمۇفتي.
سونىمەن قاتار, ول استانا قالاسىنداعى بارلىق مەشىتتەر رامازان ايىنا قولدان كەلگەنشە دايىندالىپ جاتقانى ايتتى.
«ازىرەت سۇلتان» جانە «نۇر استانا» مەشىتتەرى 400-500 ادامعا ارنالعان اۋىزشارلار ۇيىمداستىرادى. ودان بولەك, ءاربىر مەشىت ءوز دەڭگەيىندە قايىرىمدىلىق شارالارىمەن اينالىساتىن بولادى. بۇل شارا نەگىزىنەن قارتتار ۇيىنە, جەتىمدەر ۇيىنە, بولماسا, كوپ بالالى ۇيلەرگە باعىتتالادى. سونداي-اق, قاتتى سىرقات, بىراق ەمىنە قاراجات جەتپەگەن جاندارعا كومەكتەسۋ دە جوسپاردا بار», – دەدى ناۋرىزباي قاجى تاعان ۇلى.
ايتا كەتەيىك, بيىل قاسيەتتى رامازان ايى 18 ماۋسىمدا باستالادى.
تالعات رايىمبەك.
دەرەك: «قازاقپارات».
سۋرەت: ihsan.kz.