رەسپۋبليكا كۇنى الەمنىڭ كوپتەگەن ەلىندە ۇلتتىق مەرەكە رەتىندە تويلانادى. سايكەسىنشە, بۇل ەرەكشە كۇننىڭ تاريحى ءار ەلدە ءارتۇرلى. ال قازاقستاندا 1990 جىلى 25 قازاندا قازاق كەڭەستىك سوتسياليستىك رەسپۋبليكاسىنىڭ مەملەكەتتىك ەگەمەندىگى تۋرالى دەكلاراتسيا قابىلداندى. بىراق بۇل كۇن ۇلتتىق مەرەكە مارتەبەسىنە 2022 جىلدىڭ 29 قىركۇيەگىندە يە بولدى. سودان بەرى 25 قازان كۇنى ەلىمىزدىڭ باستى ۇلتتىق مەرەكەسىنە اينالدى. رەسپۋبليكا كۇنى تەك ەلىمىزدە عانا ەمەس, سونداي-اق شەت مەملەكەتتەردە دە اتاپ وتىلەدى.
ارينە, ديپلوماتيالىق ورتادا ءارتۇرلى ەلدەردىڭ ەگەمەندىك الۋىنا وراي ۇلتتىق مەرەكەگە اسا قۇرمەتپەن قاراعاندىقتان وسىنداي جاعدايدا قۇتتىقتاۋ جولداۋ ءداستۇرى قالىپتاسقان. ۇلتتىق مەرەكە قارساڭىندا ەل پرەزيدەنتى مەن حالقىنىڭ اتىنا كوپتەگەن قۇتتىقتاۋ جەدەلحاتتارى كەلىپ تۇسەدى.
بۇدان بولەك, رەسپۋبليكا كۇنىنە وراي شەت مەملەكەتتەردە قابىلداۋلار وتكىزىلىپ, ەلدىك كورمەلەر اشىلىپ, كونتسەرتتەر مەن باسقا دا ماڭىزدى ءىس-شارالار وتەدى. بۇل ءىس-شارالارعا سىرتقى ساياسي ۆەدومستۆولارىنىڭ, باسقا مەملەكەتتىك ورگاندارىنىڭ باسشىلارى, اككرەديتتەلگەن شەتەلدىك ديپلوماتتار, ىسكەر قاۋىم وكىلدەرى, ينۆەستورلار, سونداي-اق ەكىجاقتى قاتىناستاردى دامىتۋعا ەلەۋلى ۇلەس قوسقان شەتەل ازاماتتارى, قازاق ۇلتتىق مادەني ورتالىقتارىنىڭ وكىلدەرى, عىلىم جانە مادەنيەت قايراتكەرلەرى قاتىسادى. ۇيىمداستىرىلعان ءىس-شارالاردى تەك رەسمي پروتوكولدىق نەمەسە فورمالدىق شارالار دەپ اتاۋعا بولمايدى. ولار ەكىجاقتى قاتىناستاردى نىعايتۋعا, قازاقستان مەن شەتەلدىك ارىپتەس ەلدەر حالىقتارىنىڭ ورتاق ماقساتتارىن كورسەتىپ, ەلىمىزدىڭ ىشكى جانە سىرتقى ساياسي باسىمدىقتارى تۋرالى اقپارات بەرۋگە, سونداي-اق مادەني مۇرامىزدى, جەتىستىكتەرىمىز بەن ۇلتتىق داستۇرلەرىمىزدى تانىستىرۋعا مۇمكىندىك بەرەدى.
ەڭ العاش رەت رەسپۋبليكا كۇنى قازاقستاننىڭ بۇۇ-عا مۇشەلىك ەتكەنىنە 30 جىلدىعىندا وسى ۇيىمنىڭ نيۋ-يوركتەگى شتاب-پاتەرىندە اتاپ ءوتىلدى. جالپى, شەتەلدە ەلىمىزدىڭ رەسپۋبليكا كۇنىن مەرەكەلەۋ ەلىنەن جىراقتا جۇرگەن وتانداستارىمىزدى قولداۋدىڭ ماڭىزدى اسپەكتىسى دەسەك تە ارتىق ەتپەس. سونىمەن قاتار مۇنداي مەرەكەلىك ءىس-شارالاردى ۇيىمداستىرۋعا ءجيى قاتىساتىن قازاق ستۋدەنتتەرى اراسىندا وتانشىلدىق سەزىمىن تاربيەلەۋدىڭ ماڭىزدى بولىگى.
وسىلايشا, رەسپۋبليكا كۇنى تەك تاۋەلسىزدىك سيمۆولى عانا ەمەس, سونىمەن قاتار مادەني كورىنىس پەن قوعام بىرلىگىنىڭ تۇعىرىنا اينالدى. بۇل ايتۋلى كۇن بۇگىنگى تاڭدا قازاقستان حالقىن بىرىكتىرىپ, ارىپتەس مەملەكەتتەر مەن ءتۇرلى حالىقارالىق ۇيىمدارمەن ەكىجاقتى قاتىناستاردى نىعايتۋعا, ەلدە جوسپارلانعان رەفورمالاردى جۇزەگە اسىرۋعا زور ىقپال ەتەدى.