وكلەند ۋنيۆەرسيتەتىنىڭ پروفەسسورى, نەۆرولوگيا, كوگنيتيۆتى پسيحولوگيا جانە ءبىلىم سالاسىنىڭ تانىمال ساراپشىسى, «قالاي وقۋدى ۇيرەنەمىز؟» اشىق ونلاين كۋرسىنىڭ اۆتورى باربارا واكلي قازىر قوعامدا اشىق قولدانىلىپ جاتقان جاساندى ينتەللەكتىنىڭ ءرولى مەن ونىڭ ءبىلىم جۇيەسىندەگى قولدانىلۋى تۋرالى «Zoom» قوسىمشاسى ارقىلى سەمينار وتكىزدى. ول وسى سالادا ۇزاق جىل جۇمىس ىستەپ كەلە جاتقانىن ايتىپ, قازىر زامانعا ساي جارىققا شىققان قوسىمشالاردا تىلدىك مودەلدىڭ وتە كرەاتيۆتى ەكەنىن جەتكىزدى.
سونىمەن بىرگە پروفەسسور ءار كومپانيانىڭ جاساندى زەردە سالاسىنداعى ءساتتى جاساعان قوسىمشالارىن تانىستىردى. مىسالى, «Google» كومپانياسىنىڭ «Gemeni», «Amazon» كومپانياسىنىڭ «Cloude», «Microsoft» كومپانياسىنىڭ «Open AI», «ChatGPT» ونىمدەرىنىڭ ءبىر-بىرىنەن ەرەكشەلىگى مەن ونى ءتيىمدى پايدالانۋدىڭ قاجەتتىلىگىن تىلگە تيەك ەتتى.
«ادام قاشاندا بىردەڭە بىلسەم دەگەن نيەتپەن ءومىر سۇرەدى. ال ول ەشتەڭە ۇيرەنبەسە, دامي المايدى. قازىر بۇل جاعداي تىپتەن وزگەردى. كۇندەلىكتى تىرشىلىكتە مىڭداعان نەيروننىڭ ءوز ءرولى بار ەكەنىن ايتامىن. ءبىر نارسەنى ۇيرەنۋگە كوپ ۋاقىت كەتۋى مۇمكىن. بىراق ءبىز ودان ءلاززات الامىز. بۇل قازاقستان قوعامىنا دا ءتيىستى كومەگىن تيگىزەدى دەپ ويلايمىن», دەدى بىلىكتى ساراپشى.
قالاي دەسەك تە, جاساندى ينتەللەكت قوسىمشالارى ءومىرىمىزدى كوپ جەڭىلدەتەدى. بىراق كۇندەلىكتى ومىردە وعان تاۋەلدى بولۋدىڭ دا ءتيىمسىز ەكەنىن ءبىلۋ ماڭىز. باربارا واكليدىڭ ايتۋىنشا, اسىرەسە ستۋدەنتتەر جاساندى زەردەنى كوپ پايدالانادى, بۇل ولاردىڭ ءبىلىم الۋ بارىسىنداعى قيىندىقتى ءسال دە بولسا جەڭىلدەتكەنىمەن, ءبىر جاعىنان, ولارعا كەرى اسەرىن تيگىزۋى مۇمكىن. سوندىقتان پروفەسسور قانداي ىستە بولسىن مىڭ ويلانىپ, ءجۇز تولعانۋدىڭ پايداسى زور ەكەنىن ءتۇسىندىردى.