اقتاۋ. 16 ماۋسىم. اقتاۋدا استانالار مەن ءىرى قالالاردىڭ حالىقارالىق اسسامبلەياسى ۇيىمى باسقارماسىنىڭ وتىرىسى ءوتتى. بۇل تۋرالى egemen.kz ءتىلشىسى حابارلادى.
وتىرىسقا اقتاۋ قالاسىنىڭ اكىمى ە.جاڭبىرشين, رەسەي فەدەراتسياسى مەملەكەتتىك دۋماسىنىڭ تۇرعىن ءۇي ساياساتى جانە تكش كوميتەتى توراعاسىنىڭ ورىنباسارى پ.كاچكاەۆ, استانالار مەن ءىرى قالالاردىڭ حالىقارالىق اسسامبلەياسى ۆيتسە-پرەزيدەنتىنىڭ مىندەتىن اتقارۋشىسى, ۇيىمنىڭ باس ديرەكتورى ۆ.سەليۆانوۆ, ۇيىمعا مۇشە قالالاردىڭ باسشىلارى, قازاقستان مەن رەسەي مەملەكەتتىك بيلىك ورگاندارىنىڭ, بۇۇ-حابيتات حالىقارالىق ۇيىمىنىڭ, تمد اتقارۋشى كوميتەتىنىڭ, قوعامدىق ۇيىمداردىڭ, بيزنەس جانە عىلىم قاۋىمداستىعىنىڭ وكىلدەرى قاتىستى.
اسسامبلەيا باسقارماسىنىڭ كەڭەيتىلگەن وتىرىسىندا اقتاۋ قالاسىنىڭ اكىمى ەدىل تەرەكباي ۇلى ۇيىمنىڭ كەزەكتى 23-سەسسياسىن جانە ونىڭ اياسىندا قۇرىلىس پەن تكش سالالارىندا جاڭا تەحنولوگيالاردى قولدانۋ باعىتىندا ءوزارا تاجىريبە الماسۋعا زور مۇمكىندىك بەرەتىن حالىقارالىق كونفەرەنتسيانىڭ اقتاۋدا وتكىزىلۋىنە سەنىم ارتىپ, قولداۋ كورسەتكەنى ءۇشىن ۇيىم مۇشەلەرىنە العىسىن ءبىلدىردى.
«ءبىز, قالا تۇرعىندارى, وسىنداي بەدەلدى حالىقارالىق ۇيىمنىڭ ماڭىزدى شارالارىنىڭ ءبىرى اقتاۋدا ءوتىپ جاتقانىنا ماقتانامىز. بۇل فورۋمعا اسسامبلەيانىڭ مۇشە-قالالارى عانا ەمەس, اقتاۋدىڭ شەتەلدىك باۋىرلاس قالالارى مەن قازاقستاننىڭ قالالارى, باسقا دا قالانىڭ اباتتاندىرىلۋى مەن كوممۋنالدىق شارۋاشىلىعى قىزمەتىنىڭ جاقسارۋىنا مۇددەلى سالا وكىلدەرى, شەتەلدىك جانە وتاندىق كومپانيالار, عالىمدار قاتىساتىن بولادى. مۇنداي حالىقارالىق دارەجەدەگى شارالار قالالار مەن ايماقتاردىڭ الەۋمەتتىك-ەكونوميكالىق دامۋىنىڭ وزەكتى ماسەلەلەرىن تالقىلاۋ ءۇشىن وتە ىڭعايلى ديالوگ الاڭىن قالىپتاستىرادى. قالالار اراسىنداعى بايلانىستاردى نىعايتۋ مەن دامىتۋدا استانالار مەن ءىرى قالالاردىڭ حالىقارالىق اسسامبلەياسى سياقتى ۇكىمەتتىك ەمەس ۇيىمدار ۇلكەن ءرول اتقارادى. اسسامبلەيا بارشامىزعا قالالاردىڭ ۇزدىك تاجىريبەلەرىن ءوزارا الماسۋعا جانە ىسكە اسىرۋعا زور مۇمكىندىك بەرەدى, – دەدى ول.
وتىرىستا ۆ.سەليۆانوۆتىڭ اسسامبلەيا باسقارماسىنىڭ 2014-2015 جىلدارداعى جۇمىس قورىتىندىسى مەن ۇيىم قىزمەتىنىڭ باسىمدىلىقتارى تۋرالى بايانداماسى جانە قارجىلىق جاعدايى جونىندە اقپارات تىڭدالدى. سونداي-اق, ۇيىمداستىرۋ ماسەلەلەرى دە نازارعا الىندى.
گۇلايىم شىنتەمىرقىزى.
دەرەك, سۋرەت: egemen.kz.