گەرمانيانىڭ باۆاريا جەرىندەگى ەلماۋ قورعانىندا الەمنىڭ جەتەكشى جەتى ەلى باسشىلارىنىڭ باسقوسۋى ءوتتى. الەم جۇرتشىلىعى وعان ايرىقشا قىزىعۋشىلىقپەن نازار اۋداردى. قاشاندا مىقتىلاردىڭ ءسوزى ءوتىمدى. باسقالار وعان قۇلاق اسادى.
بۇرىن سەگىز ەدى, ەندى جەتەۋگە ءتۇسىپ قالدى. ودان رەسەيدىڭ شىعىپ قالعانى دا جۇرتتىڭ ەسىندە. وعان گەرمانيا كانتسلەرى انگەلا مەركەل جاۋاپ بەردى: «G-7 – دەموكراتيا مەن زاڭدىلىق سياقتى قۇندىلىقتاردى قۇرمەتتەيتىن ەلدەردىڭ توبى. ءبىزدىڭ قاعيداتتارىمىزعا, سونداي-اق, حالىقارالىق قۇقىق نورمالارىن جانە شەكارالاردىڭ مىزعىمايتىندىعىن قورعاۋ دا كىرەدى. ويتكەنى, بۇلار الەمدىك ءتارتىپتىڭ نەگىزى سانالادى. ال رەسەيدىڭ قىرىمدى اننەكسيالاۋى سول حالىقارالىق تارتىپكە قايشى». وسىناۋ جەتەكشى دەگەن جەتى ەلدە الەم حالقىنىڭ 10 پايىزى عانا تۇرادى ەكەن. وسى جەتى ەلگە سول شىعىپ قالعان رەسەيدى, سونداي-اق, قىتاي مەن ءۇندىستاندى قوسسا, 10 دەگەن تۇتقالى تسيفر عانا شىعىپ قويماي, ول الەم حالقىنىڭ جارتىسىنا جۋىعىنىڭ پىكىرىن بىلدىرمەس پە ەدى دەيسىڭ. سويتسە دە, جۇيەلى ءوتىپ تۇراتىن G-20 توبى دا بار ەكەنىن ويلاپ, مىنا «جەتىلىكتىڭ» سامميتىندە نە ايتىلعانىنا ويىساسىڭ. باسقوسۋدا نە ايتىلاتىنى الدىن الا-اق اڭعارىلعان. وعان قاتىسۋشىلار كۇنى بۇرىن ەمەۋرىنمەن بىلدىرگەنى ءوز الدىنا, ساراپشىلار, شولۋشىلار, رەسمي ادامدار دا پىكىرلەرىن, ۇسىنىستارىن جاريالاعان. بۇل رەتتە ەۋروپالىق كەڭەستىڭ توراعاسى, پولشانىڭ بۇرىنعى پرەمەر-ءمينيسترى دونالد تۋسكتىڭ پىكىرى قاتقىلداۋ ەستىلدى. ول ۋكرايناداعى جاعدايعا بايلانىستى رەسەيگە قاتىستى سانكتسيا قاتايا تۇسەدى, بۇل جونىندە ەۋرووداق ەلدەرى ءوز باسقوسۋىندا بىراۋىزدىق بىلدىرەدى دەگەن. سامميت جابىق ءوتتى. كەيبىر سىرتقا شىققان حابار كوزىنە قاراعاندا, ۋكرايناداعى جاعداي, وعان رەسەيدىڭ قاتىسى كوپ ءسوز بولعان كورىنەدى. بىراق كانتسلەر انگەلا مەركەل جۋرناليستەرمەن كەزدەسكەندە رەسەيدى كوپ ءسوز ەتكەنىمىز جوق دەگەندى ايتقان. ارينە, از ايتىپ-اق بەلگىلى جاي تۋرالى شەشىم قابىلداۋعا بولادى. باراك وبامانىڭ مالىمدەۋىنشە, سانكتسيالاردان رەسەيدىڭ ەكونوميكاسىنا ايتارلىقتاي زارداپ تيگەن, جاعداي وڭعا وزگەرمەسە, سانكتسيالار جالعاسا بەرمەك. جاسىرماي, اشىق ايتىلعان ماسەلەلەر تەرروريزممەن كۇرەس, كليمات جايىندا بولدى. «يسلام مەملەكەتى» تەرروريستەرىن اۋىزدىقتاۋ, وعان قارسى كۇش بىرىكتىرۋ ەشقانداي داۋ تۋدىرعان جوق. جەتەكشى ەلدەر كليماتتىڭ جىلۋىن 2 گرادۋستان اسىرماۋ جونىندە كەلىسىمگە جەتتى. ونىڭ باستى كوزى رەتىندە ەلەكتر قۋاتىن وندىرۋدە قازبالى ونىمدەردى شەكتەۋگە ءمان بەرىلگەن. وسى عاسىردىڭ اياعىنا دەيىن ودان مۇلدە باس تارتۋ مىندەتى قويىلىپ وتىر. جەتەكشى ەلدەر وسىعان بايلانىستى دامۋشى ەلدەرگە كومەك رەتىندە ارنايى قور اشپاق. بۇل جونىندە ناقتى ۇسىنىستار جىل اياعىندا پاريجدە وتەتىن بۇۇ كونفەرەنتسياسىندا ايتىلماق. قور دەمەكشى, جەتەكشى جەتى ەل باسشىلارى دامۋشى ەلدەرگە ەڭبەك قاۋىپسىزدىگىن جاقسارتۋ جونىندە دە مەملەكەتتىك جانە جەكە قارجىلاردى تارتا وتىرىپ, قور اشپاق. سونداي-اق, جۇقپالى اۋرۋلارمەن كۇرەس قورىن قۇرۋ جونىندە دە شەشىم قابىلدانعان. وعان كىمنىڭ قانشا قارجى قوسارى كەيىن بەلگىلەنبەك. ارينە, مۇنىڭ ءبارى ايتىلىپ قويا سالاتىن ءسوز ەمەس, كۇنى بۇرىن ولشەپ-پىشىلگەن, زەرتتەلگەن شارۋالار. مىقتىلار اۋزىنان شىعاتىن ءسوز جاي ايتىلمايدى. ونىڭ ورىندالۋ-ورىندالماۋى بەدەلگە تيەدى. بەدەل دەمەكشى, سامميتتە ونىڭ دا ايتىلعانى انىق. G-20 توبىن بىلاي قويعاندا, قازىر بريكس سياقتى, باسقا دا مەملەكەتتەردىڭ قاۋىمداستىعى بار. وندا دا جاھاندىق ماسەلەلەر ءسوز بولادى. «جەتىلىك» توبى ءوز بەدەلىنەن ايىرىلىپ قالماس ءۇشىن ونىڭ شەشىمدەرى جانە ولاردىڭ ناتيجەلەرى ناقتى دا پارمەندى بولۋعا ءتيىس. بۇل ءۇشىن ولار ايانبايدى. بەدەل كەرەك.