بۇل ەلدەگى سايلاۋدان جۇرتتىڭ, ەڭ الدىمەن, بيلىكتىڭ كۇتكەنى باسقا ەدى. بيلىكتەگى ادىلدىك جانە دامۋ پارتياسى ء(ادپ) قولىن ۇزارتا تۇسەدى دەگەن. كەرىسىنشە بولدى. ولار سايلاۋشىلار داۋىسىنىڭ 41 پايىزىن عانا الىپ, پارلامەنتتەگى ءبىراز ورنىنان ايرىلىپ قالدى.
بيلىكتەگى پارتيانىڭ جەڭىسى ەڭ الدىمەن, رەدجەپ تايىپ ەردوعانعا كەرەك ەدى. ول ءوزى بەيرەسمي كوسەمى سانالاتىن پارتيانىڭ ارقاسىندا پرەزيدەنتتىك بيلىككە كوشىپ, ءوز قۇزىرلىعىن كۇشەيتپەك بولعان. بۇل ەلدەگى زاڭ بويىنشا, پارلامەنتتىڭ شەشىمىمەن كونستيتۋتسياعا وزگەرىس ەنگىزىلە بەرەدى. ول ءۇشىن دەپۋتاتتاردىڭ ۇشتەن ەكىسى قولداسا, جەتىپ جاتىر. ال مىنا سايلاۋدان كەيىن وعان جەتپەك تۇگىل, جاي ۇكىمەت جاساقتاۋعا قاجەت مانداتتارعا دا يە بولا المادى.
ەلدىڭ ەكونوميكالىق تۇرعىدا قارىشتاپ دامۋى, ساياسي بەدەلىنىڭ ارتۋى سوڭعى ون جىلدىقتا جۇزەگە استى دەسەك, بۇل كەزەڭ پارلامەنتتىك بيلىك جۇيەسىنە ساي كەلەدى. قيسىنعا سالعاندا, ودان باس تارتۋدىڭ ءجونى جوقتاي دا. بيلىكتەگى جاڭا جۇيە ەلدەن بۇرىن ەردوعانعا كەرەك بولدى. اڭگىمە مىنادا. بۇعان دەيىن بيلىك پارلامەنت بەلگىلەيتىن ۇكىمەت قولىندا بولسا, ونى ون جىلداي پرەمەر-مينيستر ەردوعان ۇستادى. تاعى دا زاڭعا بايلانىستى ۇكىمەت باسقارۋ مەرزىمى اياقتالعان سوڭ, ەردوعان پرەزيدەنتتىككە اۋىستى دا, بار بيلىكتى وزىمەن بىرگە الا كەتكىسى كەلگەن. ال مىنا سايلاۋدان كەيىن وعان مۇمكىن بولماي وتىر. پارتيادان بۇرىن ساراپشىلار مۇنى ەردوعاننىڭ جەڭىلىسى سانايدى. ءتىپتى, ونىڭ تەك بيلىككە قاتىستى رەفورما جاساماق نيەتى عانا ەمەس, سوڭعى جىلدارداعى جۇرگىزگەن ىشكى, سىرتقى ساياساتى دا حالىقتىڭ ءبىرشاما بولىگىنىڭ نارازىلىعىن تۋعىزعان. ەل ىشىندە كوپتەگەن جاۋ «تابىلىپ», اسكەريلەردى, قۇقىق قورعاۋ سالاسىنداعى ادامداردى قاماۋعا الۋ جالپى, حالىقتىڭ جۇيكەسىنە سالماق تۇسىرگەنى انىق. سىرتقى ساياساتتاعى ەل باسشىلىعىنىڭ ۇستانىمى دا قايشىلىققا تولى. ءبىر كەزدەگى جاقسى قارىم-قاتىناستاعى ەلدەرمەن وپ-وڭاي ارازداسا سالۋ پاراساتتىلىققا قايشى. مۇنداي ارەكەتتەر سەنىمنەن ايىرادى. بۇل ءتىپتى وداقتاستارىنىڭ دا كوڭىلدەرىنە قاياۋ تۇسىرەدى. سايلاۋدىڭ ناتيجەسى – ءتۇركياداعى بۇگىنگى جاعدايدىڭ كورىنىسى. ونى استە دە سىرتقى كۇشتەردىڭ ىقپالىنان كورۋگە بولمايدى. ءادپ باسقالاردان كوبىرەك داۋىس السا دا, بۇرىنعى بەدەلىنەن ايىرىلعان. ونىڭ قازىر پارلامەنتتە 255 ورنى عانا بار. بۇرىنعىمەن سالىستىرعاندا تىم از. بىرەۋدەن كەتكەن نارسە ەكىنشىلەرىنە بارادى. زايىرلى سولشىل تسەنتريستىك حالىقتىق-رەسپۋبليكالىق پارتيا (132 ورىن) مەن ۇلتتىق قوزعالىس پارتياسى (82 ورىن) جاعدايلارىن ءبىرشاما جاقسارتسا, حالىق دەموكراتياسى پارتياسىنىڭ (80 ورىن) 10 پايىزدىق بەلەستەن اسىپ, پارلامەنتكە ءوتۋى – ۇلكەن جاڭالىق. بيلىك پارتياسىنا تيگەن سوققىنىڭ ەڭ اۋىرىنىڭ ءبىرى – وسى. بۇل پارتيا قوعامداعى ازشىلىقتىڭ مۇددەسىن قورعايدى. وسىنىڭ بارلىعى الداعى ۋاقىتتا پارلامەنتتەگى كۇرەستىڭ جەڭىل بولمايتىنىن اڭعارتادى. تۇركيا – الەمدە وزىندىك ورنى بار ەل. تۇركى دۇنيەسى ءۇشىن اعالىق ورنى ءوز الدىنا, باتىس پەن مۇسىلمان الەمىنىڭ اراسىنداعى كوپىر دە ىسپەتتى. سودان دا وعان كوز تىگەتىن جۇرت كوپ. بىرەۋلەر جەتىستىگىنە قۋانار, قيىندىعىن كورىپ, تابالايتىندار دا تابىلاتىنى انىق. ءبىز دە سول جاققا قاراپ, كوڭىلىمىز الاڭدايتىن جۇرتپىز.
ماماديار جاقىپ, جۋرناليست.