ەلوردا اكىمى ادىلبەك جاقسىبەكوۆ استانا قالاسىنىڭ جاستار ءماسليحاتىنىڭ وكىلدەرىمەن كەزدەستى.
– جاستار ءماسليحاتى ەلوردا جاستارىنىڭ قوعامداعى باستامالارى مەن ءمۇددەلەرىن جاقتايتىن قوعامدىق ينستيتۋتقا اينالۋى قاجەت. سىزدەر ءوز ماقساتتارىڭىز ءۇشىن كۇرەسە الاتىن, وزدەرىڭىزدىڭ سوڭدارىڭىزدان ادامداردى ەرتە الاتىن جاستارسىزدار. سىزدەردىڭ مەملەكەت باسشىسىنىڭ يدەيالارىن ناسيحاتتاپ, تۇراقتىلىقتى قۋاتتايتىندارىڭىز ءبىز ءۇشىن وتە ماڭىزدى, – دەدى اكىم.
ءا.جاقسىبەكوۆ ەلباسىنىڭ 5 ينستيتۋتتىق رەفورمانى جۇزەگە اسىرۋعا بايلانىستى ۇسىنعان 100 ناقتى قادامدى جۇزەگە اسىرۋ اياسىندا استانانى ەۋرازيانىڭ ىسكەرلىك, مادەني جانە عىلىمي ورتالىعىنا اينالدىرۋ ءۇشىن ساپالى ءبىلىم بەرۋ, جاستار اراسىندا عىلىمي جانە شىعارماشىلىق الەۋەتتى ارتتىرۋعا بارلىق جاعداي جاسالۋى كەرەكتىگىن دە ەسكەرتتى.
اكىم ەكسپو-2017 حالىقارالىق كورمەسىنە جاستاردى ۆولونتەر رەتىندە تارتۋ ماسەلەسىن دە باسا ايتتى. بيىلدان باستاپ «جاسىل ەل» باعدارلاماسى اياسىندا ەكسپو قالاشىعىنىڭ قۇرىلىسىنا ستۋدەنت-جاستار قۇرىلىس وتريادتارىن تارتۋ جۇمىستارى قولعا الىندى.
– سىزدەر ءوز تاراپتارىڭىزدان جاستاردى كوپتەپ قاتىستىرۋ ماقساتىندا بۇل جوبانى ناسيحاتتاۋعا ۇلەس قوسۋلارىڭىز قاجەت, – دەدى ادىلبەك جاقسىبەكوۆ.
اكىم, سونداي-اق, قالاداعى سالاماتتى ءومىر سالتىن قالىپتاستىرۋ مەن سپورت ماسەلەسىنە دە توقتالدى. ول جاستاردى ءىرى سپورتتىق شارالاردى ۇيىمداستىرۋ مەن وتكىزۋگە بەلسەندى قاتىسۋعا شاقىردى.
– استانا بۇقارالىق سپورت قالاسىنا اينالۋى كەرەك. قازىرگى كەزدە قالادا سپورتتىق, قوعامدىق شارالاردى وتكىزۋدىڭ اۋقىمدى جوسپارى ازىرلەنىپ جاتىر جانە جاستار بۇل جۇمىسقا بەلسەنە ارالاسۋى قاجەت. باستاماشىل جاستار تاراپىنان ەلوردانى ودان ءارى دامىتۋ بويىنشا جاڭا ۇسىنىستار كۇتەمىز, – دەپ قورىتتى ءسوزىن اكىم.
«ەگەمەن-اقپارات».