10-11 ماۋسىمدا «قازاقستان تەمىرجولى» ۇك» اق پرەزيدەنتى اسقار مامين باستاعان قازاقستان تەمىرجولشىلارىنىڭ دەلەگاتسياسى جۇمىس ساپارىمەن ءۇندىستاندا بولدى. ا.مامين ءۇندىستاندا بولعان كەزىندە وسى ەل تەمىرجول, سۋ جولى جانە اۆتوجول مينيسترلىكتەرىنىڭ باسشىلىعىمەن بىرقاتار ەكىجاقتى كەزدەسۋلەر وتكىزدى, دەپ حابارلادى «قتج» ۇك» اق-تىڭ ءباسپاسوز قىزمەتى.
كەزدەسۋلەر كەزىندە «سولتۇستىك – وڭتۇستىك» ءدالىزىن ەسەپكە الا كەلگەندە, ەكى ەل اراسىنداعى كولىك الەۋەتىن ايقىنداۋ ءماسەلەلەرىنە جانە ءۇندىستان مەن ەۋرازيا قۇرلىعىنىڭ اسا ءىرى رىنوكتارى اراسىنداعى تاۋار اعىنىن قامتاماسىز ەتەتىن ءتيىمدى لوگيستيكالىق ءتىزبەك قۇرۋدىڭ مۇمكىندىكتەرىن قاراستىرۋعا باسا نازار اۋدارىلدى. ماسەلەن, اسقار ءماميننىڭ ءۇندىستاننىڭ سۋ جولى جانە اۆتوجول ءمينيسترى نيتين گادكاريمەن جانە تەمىر جول ءمينيسترى سۋرەش پرابحۋمەن كەزدەسۋلەرى كەزىندە ەكى ەل اراسىنداعى كولىكتىك ىنتىماقتاستىقتى دامىتۋدىڭ پەرسپەكتيۆالارى تالقىلانىپ, «سولتۇستىك – وڭتۇستىك» كولىك ءدالىزىنىڭ ءبىر بولىگى رەتىندە «قازاقستان – تۇرىكمەنستان – يران» تەمىرجول ءدالىزىنىڭ زور الەۋەتىن پايدالانۋ ارقىلى تاۋارلار قوزعالىسىن جەڭىلدەتۋگە جاعداي تۋعىزاتىن ۋاعدالاستىقتارعا قول جەتكىزىلدى. بۇدان بولەك, 80-نەن استام ونەركاسىپتىك جانە كولىكتىك قاۋىمداستىقتاردىڭ باسىن بىرىكتىرەتىن ءۇندىستاننىڭ ساۋدا-ونەركاسىپ پالاتاسى فەدەراتسياسىنىڭ وفيسىندە وسى ەل بيزنەس-توپتارى ءۇشىن وڭىردە ەكسپورتتىق-يمپورتتىق وپەراتسيالاردى جۇزەگە اسىرۋدىڭ لوگيستيكالىق مۇمكىندىگىنە ارنالعان تۇساۋكەسەر وتكىزىلدى. مۋندرا تەڭىز پورتىندا بولعان كەزىندە قازاقستان تەمىرجولىنىڭ دەلەگاتسياسى دامۋ جوبالارىمەن تانىسىپ, ءىرى لوگيستيكالىق كومپانيالارمەن كەلىسسوزدەرگە قاتىستى.
سۋرەت: alashainasy.kz