موحسەن مۇحاممادي اراكي, دۇنيەجۇزىلىك يسلام مازھابتارىن جاقىنداستىرۋ اسسامبلەياسىنىڭ باس حاتشىسى: – الەمدىك جانە ءداستۇرلى دىندەر ليدەرلەرىنىڭ سەزىن وتكىزۋ قازىرگىدەي كۇردەلى كەزەڭدە وتە قاجەت. بۇگىندە دۇنيەجۇزىنىڭ تۇكپىر-تۇكپىرىندە تەرىس اعىمداردىڭ ءىس-ارەكەتتەرى كەڭىنەن بەلەڭ الۋدا. سوندىقتان, ەكسترەميستىك, تەرروريستىك باعىتتاعى ۇيىمدارمەن كۇرەس جۇرگىزۋ ءۇشىن قوعامنىڭ ءوزى بىرىگۋى كەرەك. سونداي-اق, بۇگىندە كەيبىر ساياسي دەرجاۆالار «ءال-كايدا», «يسلام مەملەكەتى» سەكىلدى قاۋىپتى ۇيىمدارعا قولداۋ كورسەتىپ كەلەدى. ياعني, بۇلاردىڭ ارتىندا سۋپەردەرجاۆالار تۇر. دەمەك, ءبىز, وسىنداي ۇدەرىستەردىڭ الدىن الۋدىڭ بارلىق جولدارىن قاراستىرۋىمىز كەرەك. سوندا عانا ءبىز ولاردان ءتونۋى مۇمكىن الاپات قاۋىپتىڭ تامىرىن تۇبىرىمەن جويا الامىز. جالپى, ساياساتكەرلەر سيرياداعى جاعدايدى قالپىنا كەلتىرۋگە نازار اۋدارۋى قاجەت. سەبەبى, وندا قازا تاپقان ازاماتتاردىڭ سانى كۇن وتكەن سايىن ارتىپ كەلەدى. ليۆيادا, يراكتا, يەمەندە دە ءدال وسىنداي جاعداي قالىپتاسۋدا. ءبىز قانتوگىستى توقتاتىپ, وسى ايماقتاردا تىنىشتىق ورناتۋىمىز كەرەك. ال بۇل سەزد ءبىزدىڭ بەيبىتشىلىكتى ورناتۋعا باعىتتالعان ناقتى ۇسىنىستارىمىزدى جاريالاۋعا ۇلكەن مۇمكىندىكتەر بەرىپ وتىر.
احمەد ءجۇسىپ ءال-درايۆيش, يسلاماباد حالىقارالىق يسلام ۋنيۆەرسيتەتىنىڭ پرەزيدەنتى: – قازاقستان تاراپىنان ۇيىمداستىرىلىپ وتىرعان الەمدىك جانە ءداستۇرلى دىندەر ليدەرلەرىنىڭ V سەزىنە قاتىسقانىما وتە قۋانىشتىمىن. ويتكەنى, وسىنداي بەدەلدى, الەمدىك ماڭىزى بار وزەكتى ماسەلەلەر تالقىلاناتىن فورۋمنان الارىمىز كوپ. جاقسىلىققا ۇندەيتىن, بەيبىتشىلىككە شاقىراتىن وسىنداي جيىن ءوتكىزىپ وتىرعان قازاقستاندىقتارعا, پرەزيدەنت نۇرسۇلتان نازارباەۆقا العىسىم شەكسىز. مەنىڭشە, مۇنداي اۋقىمدى, حالىقارالىق دەڭگەيدەگى جيىنداردى ۇيىمداستىرۋدا قازاقستاننىڭ تاجىريبەسى مول. ءوزىمىز كۋا بولىپ وتىرعانىمىزداي, بۇل فورۋم جوعارى دەڭگەيدە وتۋدە. ءبارى دە تالاپقا ساي. تاعى ءبىر ايتا كەتەر جايت, قازاقستان پرەزيدەنتى – قاشاندا جاقسى باستامالار كوتەرىپ, ونى سوڭىنا دەيىن جەتكىزە بىلەتىن قايراتكەر. باسقاسىن بىلاي قويعاندا, 2003 جىلدان بەرى وتكىزىلىپ كەلە جاتقان سەزد جاھاندىق ۇنقاتىسۋدىڭ بەدەلدى الاڭىنا اينالدى. بۇل, ارينە, سىزدەردىڭ پرەزيدەنتتەرىڭىزدىڭ ەرەن ەڭبەگىنىڭ ارقاسى. قازىر بۇل فورۋمعا الەمنىڭ تۇكپىر-تۇكپىرىنەن اسا مارتەبەلى قوناقتار قۋانا كەلەتىن بولعان. بۇدان ءبىز قازاقستاننىڭ ابىروي بيىگىندە تۇرعانىن ۇعامىز.
ميحايل پوپحادزە, گرۋزيا پراۆوسلاۆيە ءشىركەۋىنىڭ پروتيەرەيى: – مەن بۇل فورۋمنان ۇلكەن اسەر الىپ تۇرمىن. قازاقستان پرەزيدەنتى نۇرسۇلتان نازارباەۆتىڭ وسىنداي فورۋم ۇيىمداستىرىپ, ءارتۇرلى دىندەر كوشباسشىلارىنىڭ ءوزارا پىكىر الىسۋىن ۇيىمداستىرعانى – وتە ۇتىمدى شارا دەپ سانايمىن. سوندىقتان دا مەن ول كىسىگە ءوزىمنىڭ العىسىمدى جولداعىم كەلەدى. جالپى, ۇنقاتىسۋ ءسوزى تەك ساياساتكەرلەر اراسىندا عانا بولاتىن سياقتى تۇسىنىك قالىپتاسقان. ءىس جۇزىندە ۇنقاتىسۋ ادامزات قوعامىنىڭ بارلىق توپتارى اراسىندا دا بولۋى كەرەك. سونىڭ ىشىندە ءدىنباسىلارى دا ءوزارا ۇنقاتىسۋدىڭ بولعانىن قالايدى. مىنە, بۇگىن سونداي ماقساتقا قول جەتكىزىپ وتىرمىز. مەن وسى ماسەلەنى بۇل فورۋمنىڭ ۇلكەن جەتىستىگى دەپ سانايمىن. وسىنداي فورۋمدار, ءتىپتى, جىل سايىن ءوتىپ تۇرسا دا ارتىق بولماس ەدى. ودان ادامزات ۇتپاسا ۇتىلمايدى. ويتكەنى, اركىمنىڭ ىشىندەگى پروبلەمالارى قارسىلاستارىنا بەلگىلى بولسا, ونىڭ شەشىلۋ جولدارى دا جەڭىل بولادى.
ەۆالد كراسوۆسكي, ەۆانگەليە-ليۋتەران ءشىركەۋىنىڭ اقمولا وبلىستىق ناستوياتەلى: – مەن ءوزىم بارلىق كونفەسسيا وكىلدەرىن جيناپ, بارىنە بىردەي تەڭ مىنبەر بەرىپ جانە قوعامدا كەلىسىم مەن توزىمدىلىككە قول جەتكىزىپ وتىرعان قازاقستانداي ەلدە تۇراتىنىما ماقتانامىن. ەگەر ءبىز قۇدايدى سۇيەمىز, ودان قورقامىز دەپ ۇستىمىزدەگى بيلىككە قارسى بولساق, ءبىزدىڭ جالعانشى بولعانىمىز. ءبىز ءوزىمىزدىڭ بيلىكتىڭ بەرىك بولعانىن قۇدايدان سۇراپ, قۇلشىلىق ەتۋىمىز كەرەك. سونىمەن بىرگە, بيلىككە كومەكتەسكەنىمىز ءجون. ەگەر ماعان وسى سەزدە سويلەۋگە مۇمكىندىك بەرىلگەن بولسا, مەن بارلىعىن دا دوستىق پەن كەلىسىمدە ءومىر سۇرۋگە شاقىرار ەدىم. ونىڭ ۇلگىسى – وزدەرىڭىز كەلىپ وتىرعان قازاقستان. بىزدەن ۇيرەنىڭىزدەر دەپ ايتار ەدىم. سەزد بارىسىندا مەن ءوزىمنىڭ كوپتەگەن ءدىني ارىپتەستەرىممەن سويلەسىپ, پىكىر الىستىم. ولاردىڭ ءبارىنىڭ دە ءبىزدىڭ ەلىمىزگە دەگەن كوزقاراسى ءتۇزۋ, ءبارى دە قازاقستاننىڭ وسى جولدان تايماي, العا باسا بەرگەنىن قالايدى.