قازاقستان پارلامەنتى سەناتىنىڭ توراعاسى قاسىم-جومارت توقاەۆ الەمدىك جانە ءداستۇرلى دىندەر ليدەرلەرىنىڭ V سەزىنە قاتىسۋشىلارمەن كەزدەستى, دەپ حابارلادى پارلامەنت سەناتىنىڭ ءباسپاسوز قىزمەتى.
ەۋروپاداعى قاۋىپسىزدىك جانە ىنتىماقتاستىق ۇيىمىنىڭ باس حاتشىسى لامبەرتو زانەر استاناداعى دىنارالىق فورۋمنىڭ ايرىقشا ماڭىزىن اتاپ ءوتىپ, وعان قاتىسۋشىلار قۇرامىنىڭ ەرەكشەلىگىنە نازار اۋداردى. ونىڭ پىكىرىنشە, وسىنداي فورۋمدار الەمدەگى, اسىرەسە, تاياۋ شىعىستاعى كۇردەلى اعىمدار جاعدايىن ەسكەرە كەلگەندە وتە قاجەت جانە ول بارلىق حالىقتاردىڭ قاۋىپسىزدىگى جولىنداعى اۋقىمى زور جەمىستى جۇمىسى ءۇشىن پرەزيدەنت نۇرسۇلتان نازارباەۆقا العىسىن ءبىلدىردى.
ق.توقاەۆ قازاقستان ءۇشىن ەقىۇ باسىمدىققا يە ەكەنىن جانە ونى ودان ءارى نىعايتۋ قاجەتتىگىن اتاپ ءوتتى. سەنات توراعاسى حەلسينكي قورىتىندى اكتىسىنىڭ 40 جىلدىعى قارساڭىندا ۇيىم, ونىڭ ىشىندە, پارلامەنتتىك ءولشەمى ەۋرازياداعى ۇنقاتىسۋ جانە بىرلەسكەن ءىس-قيمىلعا ماڭىزدى تۇعىرناما بولىپ قالا بەرەدى, دەپ سانايدى.
اقش مەملەكەتتىك دەپارتامەنتىنىڭ ءدىني قاۋىمداستىقتار باستامالارى ماسەلەلەرى ءجونىندەگى باسقارما جەتەكشىسى شون كەيسي دىنارالىق ۇنقاتىسۋعا ەرەكشە ءمان بەرەتىن مەملەكەتتىك حاتشى دجون كەرريدىڭ سالەمىن جەتكىزدى.
سەزد جۇمىسىنان العان اسەرى تۋرالى ايتا كەلىپ, ش.كەيسي دىندەر اراسىنداعى ۇنقاتىسۋ ءۇشىن وسىنشاما ءونىمدى كۇش سالىپ كەلە جاتقان وزگە مەملەكەت جوق ەكەنىن اتاپ ءوتتى.
يسپانيانىڭ بۇرىنعى سىرتقى ىستەر ءمينيسترى ميگەل انحەل موراتينوسپەن كەزدەسۋدە سەزد بەن بۇۇ وركەنيەتتەر اليانسى اراسىنداعى ءوزارا ءىس-قيمىل تۋرالى پىكىر الماسىلدى. م.موراتينوستىڭ پىكىرىنشە, الەمدەگى كۇردەلى جاعداي, اتاپ ايتقاندا, راديكاليزمنىڭ ارتا تۇسكەن دەڭگەيى سەزدىڭ ەرەكشە ماڭىزدى ەكەنىن ايقىندايدى, وسىدان ون ەكى جىل بۇرىنعى دىنارالىق ۇنقاتىسۋ تۋرالى باستاماسى پرەزيدەنت نۇرسۇلتان نازارباەۆتىڭ ستراتەگيالىق تۇرعىدا كورەگەندىلىك بولعانىن كورسەتىپ وتىر.
بىرىككەن اراب امىرلىكتەرى ءدىن جانە ۋاقىپتار ىستەرى جونىندەگى باس اگەنتتىكتىڭ اتقارۋشى ديرەكتورى ۋبەيد ءال-مازرۋي ءدىني جانە ساياسي قايراتكەرلەرگە, اسىرەسە, تاياۋ شىعىستاعى كۇردەلى جاعدايدى ەسكەرە كەلگەندە, قازاقستان دەر كەزىندە مىنبەر ۇسىنعانىن اتاپ ءوتتى. مەيمان اتاپ وتكەندەي, قازىرگى كەزدەگى الەمدەگى بەيبىت ءدىن رەتىندە يسلام تۋرالى دۇرىس اقپارات جەتكىزۋ جانە يسلامدى قىلمىستىق ماقساتتارعا پايدالاناتىن ەكسترەميستىك توپتارعا توسقاۋىل قويۋ اسا ماڭىزدى. ءال-مازرۋي سەزدىڭ بۇدان بىلايعى جۇمىسىنىڭ تابىستى بولۋىنا تىلەكتەستىك ءبىلدىردى جانە باسقا گۋمانيتارلىق-ءدىني ۇيىمدار فورۋم قىزمەتىنە قاتىسا الاتىنىنا سەنىم ءبىلدىردى.
دۇنيەجۇزىلىك يسلام مازحابتارىن جاقىنداستىرۋ اسسامبلەياسىنىڭ باس حاتشىسى موحسەن موحاممادي اراكيمەن كەزدەسۋدە مۇسىلمان ۇممەتىنىڭ بىرلىگىن نىعايتۋ قاجەتتىگى, يسلامداعى ءتۇرلى اعىمداردى جاقىنداستىرۋ شارالارى جانە اعارتۋ جۇمىستارى ارقىلى ەكسترەميزمگە قارسى ءىس-قيمىل تانىتۋ تۋرالى اڭگىمە بولدى. دۇنيەجۇزىلىك اسسامبلەيا مەن قازاقستان زەرتتەۋ ورتالىقتارى اراسىنداعى ىنتىماقتاستىقتى جولعا قويۋ تۋرالى ۇسىنىس ايتىلدى.