زامان وزگەردى مە, ادام وزگەردى مە, كىم ءبىلسىن, ايتەۋىر, سوڭعى كەزدەرى الاياقتىق اسقىنىپ بارادى. مۇنىڭ ءوزى: «ادالدىقتىڭ الا ءجىبىن اتتاما», دەيتىن ادامگەرشىلىك تاربيەنىڭ ءتىنى تارقاتىلىپ بارا ما دەگەن ويعا جەتەلەيدى. «وتىرىكتىڭ قۇيرىعى ءبىر-اق تۇتام», دەيتىن قازاقى قاسيەت تە ءباسىن جوعالتقانداي. بۇدان بۇرىنىراقتا اقتوبەگە قولجەتىمدى پاتەر اپەرەمىن دەپ اڭقاۋلاردىڭ اۋزىن اڭقايتىپ كەتىپ, قارجىسىن ولجالاپ, بەرمەي كەتكەندەر ۇستالىپ, جازاسىن العان-دى. ەندى اككى قۋلار الاياقتىقتىڭ «فورماتىن» جەتىلدىرە باستاپتى. اقتوبە قالاسىندا ءتۇرلى سەبەپتەرمەن تۇرعىنداردىڭ سەنىمىنە كىرىپ, الداۋ جولىمەن وزگەلەردىڭ تيەسىلى زاتتارىن يەمدەنىپ كەتۋ تاعى دا بەلەڭ الا باستادى.
جاڭا جىل باستالعالى عانا قالا اۋماعىندا وسىنداي الاياقىقتىڭ 4 دەرەگى تىركەلىپ, ابىروي بولعاندا بۇل قىلمىستاردىڭ بارلىعى دا اشىلدى. تاياۋدا كەزەكشى بولىمگە 46 جاستاعى قالا تۇرعىنى شاعىمدانىپ, 2013 جىلعى 4 قىركۇيەكتە 36 جاستاعى بەيتانىس ايەل ۇلىن ەمدەۋ ءۇشىن الداۋ جولىمەن 450 مىڭ تەڭگەسىن الىپ كەتكەنىن حابارلاعان. ادام باسىنا تۇسكەن اۋىرتپالىقتى باس پايداسىنا جاراتۋعا بەل بۋعان الاياق ايەل ۇزاققا بارمادى, كۇدىكتىنى كريمينالدىق پوليتسيا باسقارماسىنىڭ قىزمەتكەرلەرى قولعا ءتۇسىردى. ۇلىنىڭ ساۋىعۋى ءۇشىن جانىن بەرۋگە بار انانىڭ ءالسىز بۋىنىنان ۇستاعان الاياق ايەلدىڭ وبال-ساۋاپتى ۇمىتقان جان ەكەنى ايتپاسا دا تۇسىنىكتى.
اراعا ءبىر كۇن سالىپ, كەزەكشى بولىمگە 37 جاستاعى قالا تۇرعىنى شاعىمدانىپ, بەيتانىس ايەلدىڭ جەر تەلىمىن الۋعا كومەكتەسەمىن دەپ سەنىمگە كىرۋ ارقىلى 600 مىڭ تەڭگەسىن الىپ كەتكەنىن جەتكىزگەن. شىنى كەرەك, قازىر جەر تەلىمىن الۋ دا ەڭ وزەكتى ماسەلە بولىپ تۇرعانى شىندىق. ال, الاياقتاردىڭ دا اڭديتىنى وسىنداي ادامداردىڭ وسال تۇستارى. كەزەكتى اينالىپ ءوتىپ جەر تەلىمىن الۋعا قۇشتارلاردى دا تاپ باسىپ تانيتىندارىن قايتەرسىڭ؟ الايدا, الاياق الىسقا بارا المادى, قۇقىق قورعاۋشىلاردىڭ قۇرىعىنا ءىلىندى.
جۋىردا كەزەكشى بولىمگە 42 جاستاعى قالا تۇرعىنى شاعىمدانىپ, بەيتانىس ايەلدىڭ اس ءۇي جيھازىن قوندىرۋ ماقساتىندا, سەنىمگە كىرە وتىرىپ, 190 مىڭ تەڭگەنى قولدى ەتكەنىن حابارلاعان. 31 جاستاعى كۇدىكتىنى دە كريمينالدىق پوليتسيا باسقارماسىنىڭ قىزمەتكەرلەرى كوپ ۇزاتپاي قولعا ءتۇسىردى. سودان كەيىن كەزەكشى بولىمگە 63 جاستاعى ايەل حابارلاسىپ, بەلگىسىز بىرەۋ سەنىمگە كىرىپ, ءۇيىن دۋالمەن قورشاپ بەرۋ ءۇشىن 125 مىڭ تەڭگەنى الىپ كەتكەنىن مالىمدەگەن. كريمينالدىق پوليتسيانىڭ جەدەل ارەكەتىنىڭ ارقاسىندا 34 جاستاعى ەر ازامات ۇستالعان.
زايىرلى قوعام قۇرىپ جاتقان ەلىمىزدە ءبارىن زاڭ اياسىندا شەشۋگە بولاتىنىن ۇمىتپاعان ءجون. الاياقتارعا الدانىپ قالماۋدىڭ باستى امالى دا وسى زاڭدىلىقتى ساقتاۋ بولىپ تابىلادى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.