2026 جىلعى 14 ساۋىردە توكيودا ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ وكىلدەرى جاپوندىق JEOL Ltd. جانە Interactive Corporation كومپانيالارىمەن ىنتىماقتاستىق تۋرالى مەموراندۋمعا قول قويدى, دەپ حابارلايدى Egemen.kz.
قۇجات عىلىمي ارىپتەستىكتى دامىتۋعا, ۋنيۆەرسيتەتتىڭ عىلىمي جانە زەرتحانالىق بازاسىن نىعايتۋعا, سونداي-اق تەحنولوگيالار مەن يننوۆاتسيالار سالاسىنداعى ءوزارا ءىس-قيمىلدى كەڭەيتۋگە باعىتتالعان. ەۇۋ اتىنان مەموراندۋمعا اكادەميالىق ماسەلەلەر جونىندەگى پرورەكتور ارداق بەيسەنباي قول قويدى.
جەڭىسبەك تولەن: عىلىم ماڭىزدى سالاعا اينالدى
كەلىسىمگە سايكەس, تاراپتار بىرقاتار باعىت بويىنشا ىنتىماقتاستىقتى دامىتۋعا نيەتتى. اتاپ ايتقاندا, زاماناۋي عىلىمي جابدىقتاردى ساتىپ الۋ, كونسۋلتاتسيالىق-ساراپتامالىق قولداۋ كورسەتۋ, سەمينارلار مەن ۆوركشوپتار وتكىزۋ, سونداي-اق مامانداندىرىلعان ترەنينگتەر ۇيىمداستىرۋ كوزدەلگەن.
«قۇجاتقا قول قويۋ قازاقستان مەن جاپونيا اراسىنداعى عىلىم, ءبىلىم جانە جوعارى تەحنولوگيالار سالاسىنداعى ىنتىماقتاستىقتى تەرەڭدەتۋ باعىتىن ايقىندايدى. جاسالعان مەموراندۋم ەۇۋ ءۇشىن زەرتتەۋ ينفراقۇرىلىمىن جاڭعىرتۋعا, قۇزىرەتتەر الماسۋعا, زاماناۋي اناليتيكالىق شەشىمدەردى ەنگىزۋگە جانە جوعارى بىلىكتى ماماندار دايارلاۋعا مۇمكىندىك بەرەدى. سونىمەن قاتار بۇل ۋنيۆەرسيتەت ءۇشىن حالىقارالىق ىنتىماقتاستىقتى كەڭەيتۋ جانە ءوز پوزيتسياسىن نىعايتۋ جولىنداعى ماڭىزدى قادام», دەپ اتاپ ءوتتى پرورەكتور ارداق بەيسەنباي.
JEOL Ltd. – عىلىمي-ولشەۋ جانە زەرتتەۋ جۇيەلەرى سالاسىنداعى حالىقارالىق كوشباسشى كومپانيا, ال Interactive Corporation – اتالعان كومپانيانىڭ تمد ەلدەرىندەگى رەسمي ديستريبيۋتورى.
عىلىمى دامىعان ەل دامۋدىڭ الدىڭعى قاتارىنا شىعادى
مەموراندۋمعا قول قويۋ ەۇۋ دەلەگاتسياسىنىڭ جاپونياعا جۇمىس ساپارى اياسىندا ءوتتى. دەلەگاتسيا قۇرامىندا اكادەميالىق ماسەلەلەر جونىندەگى پرورەكتور ارداق بەيسەنباي, فيزيكا-تەحنيكالىق عىلىمدار ينستيتۋتىنىڭ ديرەكتورى ەرىك نۇرمولدين, سونداي-اق يادرولىق فيزيكا, جاڭا ماتەريالدار جانە تەحنولوگيالار حالىقارالىق كافەدراسىنىڭ مەڭگەرۋشىسى قاسىم ءجۇمادىلوۆ بولدى.
ساپار بارىسىندا ۋنيۆەرسيتەت وكىلدەرى توكيو ۋنيۆەرسيتەتى مەن تسۋكۋبا ۋنيۆەرسيتەتىنە بارىپ, پروفەسسور-وقىتۋشىلار قۇرامىمەن كەزدەسۋلەر وتكىزدى.
تاراپتار الداعى ىنتىماقتاستىقتىڭ پەرسپەكتيۆالارىن, سونىڭ ىشىندە بىرلەسكەن عىلىمي جوبالاردى جۇزەگە اسىرۋ, زەرتتەۋ زەرتحانالارىن اشۋ جانە حالىقارالىق ءبىلىم بەرۋ باعدارلامالارىن ىسكە قوسۋ ماسەلەلەرىن تالقىلادى. سونىمەن قاتار ستۋدەنتتەر مەن وقىتۋشىلاردىڭ اكادەميالىق ۇتقىرلىعى, ونىڭ ىشىندە تاعىلىمدامالار مەن الماسۋ باعدارلامالارىنا ەرەكشە نازار اۋدارىلدى.
كەزدەسۋگە قاتىسۋشىلار عىلىمدى دامىتۋ, جوعارى بىلىكتى ماماندار دايارلاۋ جانە وزىق تەحنولوگيالاردى ەكونوميكاعا ەنگىزۋ ءۇشىن بىرلەسكەن زەرتتەۋلەردىڭ ماڭىزدىلىعىن اتاپ ءوتتى.
جۇمىس ساپارى مەن مەموراندۋمعا قول قويۋ ەۋرازيا ۇلتتىق ۋنيۆەرسيتەتىنىڭ حالىقارالىق ىنتىماقتاستىعىن نىعايتۋ جانە ونىڭ عىلىمي-ءبىلىم بەرۋ مۇمكىندىكتەرىن كەڭەيتۋ جولىنداعى ماڭىزدى قادام بولدى.