قازاقستاننىڭ فرانتسياداعى ەلشىلىگىندە ەۋروپا ەلدەرىندە تۇراتىن وتانداستاردىڭ باسقوسۋى ءوتتى, دەپ حابارلايدى Egemen.kz.
ءىس-شارا قازاقستاننىڭ فرانتسياداعى ەلشىلىگى جانە قىزىلوردا وبلىسى اكىمدىگىنىڭ قولداۋىمەن, «وتانداستار قورى» كەاق مەن قازاق-فرانتسۋز-تۇرىك قاۋىمداستىعىنىڭ (AKFT Paris) بىرلەسكەن ۇيىمداستىرۋىمەن وتكىزىلدى.
نەگىزگى ماقساتى – شەتەلدەگى قازاق دياسپوراسىنىڭ بىرلىگىن نىعايتۋ, تاريحي وتانمەن بايلانىستى دامىتۋ جانە مادەني-گۋمانيتارلىق ىنتىماقتاستىقتى دامىتۋ.
ءىس-شارانىڭ اشىلۋىندا قازاقستاننىڭ فرانتسياداعى توتەنشە جانە وكىلەتتى ەلشىسى گۇلسارا ارىستانقۇلوۆا, قىزىلوردا وبلىسى اكىمىنىڭ ورىنباسارى ارداق زەبەشەۆ, «وتانداستار قورى» كەاق ۆيتسە-پرەزيدەنتى الىبەك جۇرقادام, تۇركيانىڭ ادىلەت جانە دامۋ پارتياسى توراعاسىنىڭ ورىنباسارى راشيدا يۋكسەل, قازاق-فرانتسۋز-تۇرىك قاۋىمداستىعىنىڭ توراعاسى رەجەپ گيۋناي جانە «Tildes KZ» Speaking جوباسىنىڭ جەتەكشىسى لاريسا الدابەرگەنوۆا ءسوز سويلەدى.
پاريجدەگى سامميت: الەم ەلدەرىنىڭ اتوم سالاسىنداعى ىنتىماقتاستىعى نىعايا بەرەدى
قازاقستان ەلشىسى ءوز سوزىندە پاريج تورىندە بۇل باسقوسۋدىڭ شەتەلدەگى قازاقتاردىڭ رۋحاني بىرلىگىن نىعايتاتىن ماڭىزدى الاڭعا اينالعانىن اتاپ ءوتتى. ول قازاق حالقىنىڭ تاريحي تامىرى التىن وردا مۇراسىمەن ساباقتاس ەكەنىن ايتىپ, بۇگىندە قازاقستاننىڭ ەۋروپا مەن ازيانى جالعايتىن سەنىمدى كوپىر رەتىندەگى ءرولى ارتىپ كەلە جاتقانىن ەرەكشە جەتكىزدى. سونىمەن قاتار, انا ءتىل, ۇلتتىق رۋح جانە تاريحي جادى بارشا قازاقتى بىرىكتىرەتىن باستى قۇندىلىقتار ەكەنىن نازار اۋداردى.
جيىن اياسىندا «وتانداستار قورى» كەاق قازاق قاۋىمداستىقتارىنىڭ جەتەكشىلەرى مەن بەلسەندىلەرىنىڭ قاتىسۋىمەن دوڭگەلەك ۇستەل وتكىزدى. كەزدەسۋ بارىسىندا «وتانداستار قورى» كەاق ۆيتسە-پرەزيدەنتى الىبەك جۇرقادام ۇيىمنىڭ قىزمەتى مەن جۇزەگە اسىرىپ جاتقان جوبالارى تۋرالى اقپارات بەرىپ, قاتىسۋشىلاردى ورتاق باستامالارعا بەلسەندى قاتىسۋعا شاقىردى. سونداي-اق, قاتىسۋشىلار الداعى كەزەڭدەگى بىرلەسكەن جوبالار مەن ىنتىماقتاستىق باعىتتارىن تالقىلادى.
باعدارلاما اياسىندا قىزىلوردا وبلىستىق فيلارمونياسىنىڭ ونەرپازدارى كونتسەرتتىك باعدارلاما ۇسىنىپ, ءوڭىر قولونەرشىلەرى ۇلتتىق قولونەر بۇيىمدارىنىڭ كورمەسىن ۇيىمداستىردى.
پاريجدە ءان اۋەلەتكەن ورەندەر
وتانداستاردىڭ باسقوسۋى الداعى ەكى كۇن بويى جالعاسادى. باعدارلاما اياسىندا گارج-لە-گونەسس قالاسىندا ەۋروپاداعى قازاق جاستارى اراسىندا فۋتبول ءتۋرنيرى وتكىزىلىپ, سونداي-اق مادەني-كوپشىلىك ءىس-شارالار مەن ۇلتتىق مادەنيەتكە ارنالعان ارنايى باعدارلاما ۇيىمداستىرىلادى.
باسقوسۋعا ۇلىبريتانيا, گەرمانيا, نيدەرلاند, فينليانديا, يسپانيا, نورۆەگيا, شۆەيتساريا, فرانتسيا, چەحيا, يتاليا, پورتۋگاليا, پولشا, شۆەتسيا, دانيا, بەلگيا, ماجارستان, تۇركيا مەن موڭعوليادان كەلگەن قازاقستاندىقتار مەن قانداستار قاتىستى.