بۇگىن يسپانيا كابو-ۆەردە قۇراماسىمەن كەزدەسەدى

العاشقى ويىن 01:00-دە F توبىنداعى نيدەرلاند پەن جاپونيا قۇرامالارى اراسىندا ءوتتى. اقش-تىڭ ارلينگتون قالاسىنداعى AT&T Stadium ستاديونىندا وتكەن كەزدەسۋ 2:2 ەسەبىمەن اياقتالدى.

04:00-دە كوت-د’يۆۋار مەن ەكۆادور قۇرامالارى كەزدەستى. G توبىنداعى ويىن 1:0 ەسەبىمەن افريكالىق كوماندانىڭ پايداسىنا شەشىلدى.

ال 07:00-دە وتكەن شۆەتسيا مەن تۋنيس اراسىنداعى ويىندا ەۋروپالىقتار باسىم ءتۇستى. گرەم پوتتەردىڭ شاكىرتتەرى قارسىلاس قاقپاسىنا 5 گول سوقسا, تۋنيس تەك ءبىر گولمەن جاۋاپ بەردى. ماتچ 5:1 ەسەبىمەن اياقتالدى.

بۇگىن ساعات 21:00-دە H توبىنداعى يسپانيا مەن كابو-ۆەردە قۇرامالارى كەزدەسەدى. اقش-تىڭ اتلانتا قالاسىندا وتەتىن ويىندا يوردانيالىق مامان ادحام موحامماد تورەلىك ەتەدى.

H توبىندا يسپانيا مەن كابو-ۆەردەدەن بولەك ساۋد ارابياسى مەن ۋرۋگۆاي قۇرامالارى دا ونەر كورسەتەدى.

ايتا كەتەيىك, يسپانيا قۇراماسى الەم چەمپيوناتىنا 17 رەت قاتىسىپ, 2010 جىلى چەمپيون اتانعان. سوڭعى جىلدارى كوماندا ءىرى تۋرنيرلەردە تۇراقتى ناتيجە كورسەتىپ كەلەدى. 2024 جىلى لۋيس دە لا فۋەنتە باپتاعان قۇراما ەۋروپا چەمپيوناتىن جەڭىپ العان بولاتىن.

ال كابو-ۆەردە قۇراماسى الەم چەمپيوناتىنا العاش رەت قاتىسىپ وتىر. افريكالىق كوماندا ىرىكتەۋ كەزەڭىندە كامەرۋندى ارتتا قالدىرىپ, سەنساتسيالىق تۇردە جولداما الدى.

ەسكە سالا كەتەيىك, فۋتبولدان XXIII الەم چەمپيوناتىنىڭ ماتچتارىن «Qazaqstan» جانە «Qazsport» تەلەارنالارى تىكەلەي ەفيردە كورسەتەدى. سونىمەن قاتار ويىندار qazaqstan.tv, qazsporttv.kz رەسمي سايتتارىندا, «Qazaqstan.tv» ءموبيلدى قوسىمشاسىندا جانە «Birge.tv» پلاتفورماسىندا ونلاين فورماتتا قولجەتىمدى بولادى.