15 ماۋسىم – كەڭەس وداعىنىڭ باتىرى, مەرگەن ءاليا مولداعۇلوۆانىڭ تۋعان كۇنى. ۇلى وتان سوعىسى جىلدارىندا وتان ءۇشىن وتقا ءتۇسىپ, ەرلىگىمەن ەل ەسىندە قالعان قازاقتىڭ قاھارمان قىزىنىڭ بيىل تۋعانىنا 101 جىل تولدى, دەپ حابارلايدى Egemen.kz.
بىلتىر ءاليا مولداعۇلوۆانىڭ عاسىرلىق مەرەيتويى مەملەكەتتىك دەڭگەيدە كەڭىنەن اتالىپ ءوتتى.
اتاپ ايتقاندا, ءاليا مولداعۇلوۆانىڭ 100 جىلدىعىنا ارنالعان «ايبىن» XI حالىقارالىق اسكەري-پاتريوتتىق جاستار جيىنىنىڭ اشىلۋ سالتاناتىندا مەملەكەت باسشىسى قاسىم-جومارت توقاەۆ ءاليا مولداعۇلوۆا مەن مانشۇك مامەتوۆا سىندى باتىرلاردىڭ ەرلىگى وسكەلەڭ ۇرپاق ءۇشىن وتان الدىنداعى پارىزعا ادالدىقتىڭ ۇلگىسىن كورسەتكەنىن اتاپ وتكەن بولاتىن.
باتىر قىزدىڭ قايسارلىعى – وتانعا ادالدىقتىڭ, ءور رۋح پەن جانقيارلىقتىڭ جارقىن ۇلگىسى.
ءاليا مولداعۇلوۆا 1925 جىلى 15 ماۋسىمدا اقتوبە وبلىسىنىڭ بۇلاق اۋىلىندا دۇنيەگە كەلگەن. عۇمىرى قىسقا بولسا دا, رۋحى مەن ەسىمى ەل جادىندا ماڭگىگە ساقتالدى.
پرەزيدەنت ءاليا مولداعۇلوۆانىڭ ەسكەرتكىشىنە گۇل شوعىن قويدى
اشىق شايقاسقا 1943 جىلدىڭ قازان ايىندا 2-پريبالتيكا مايدانىنىڭ 22-ارمياسى قۇرامىنداعى 54-جەكە اتقىشتار بريگاداسى قۇرامىندا ءتۇستى.
1944 جىلعى 14 قاڭتاردا پسكوۆ وبلىسىنداعى ناسۆا ستانساسىن جاۋ قولىنان ازات ەتۋ كەزىندە ءاليا مولداعۇلوۆا ەرەكشە ەرلىك كورسەتتى. تولاسسىز وق استىندا ساربازداردى بىرنەشە مارتە شابۋىلعا باستاپ, جاۋىنگەرلەردى جىگەرلەندىرىپ وتىردى. كومانديرلەر ساپتان شىققان ساتتە باسشىلىقتى ءوز قولىنا الىپ, ۇرىستى جالعاستىردى. اۋىر جارالانسا دا, سوڭعى دەمى قالعانشا مايدان شەبىن تاستاماي, ەرجۇرەكتىك پەن وجەتتىكتىڭ وزىق ۇلگىسىن كورسەتتى.
ءاليا مولداعۇلوۆا نەبارى 18 جاسىندا مايدان دالاسىنا اتتانىپ, ەرلىكپەن قازا تاپتى. سوعىستان كەيىن مايداندا قازا بولعان جاۋىنگەرلەردىڭ سۇيەگى اسكەري قۇرمەتپەن باۋىرلاستار زيراتىنا قايتا جەرلەندى.
تاريحي دەرەكتەرگە سايكەس, مەرگەن قىز مايدان دالاسىندا جاۋدىڭ 78 سولداتى مەن وفيتسەرىنىڭ كوزىن جويعان. كورسەتكەن ەرلىگى مەن قايسارلىعى ءۇشىن ءاليا مولداعۇلوۆاعا قايتىس بولعاننان كەيىن كەڭەس وداعىنىڭ باتىرى اتاعى بەرىلىپ, «التىن جۇلدىز» مەدالىمەن جانە لەنين وردەنىمەن ماراپاتتالدى.
ءاليا مولداعۇلوۆانىڭ ەسىمى مەن ەرلىگى حالىق جادىندا ماڭگى ساقتالىپ كەلەدى. باتىر قىزدىڭ اتى كوپتەگەن ەلدى مەكەندەرگە, كوشەلەر مەن داڭعىلدارعا بەرىلىپ, ونىڭ قۇرمەتىنە ەسكەرتكىشتەر مەن مەموريالدىق كەشەندەر سالىندى.
اقتوبە وبلىسىندا كەڭەس وداعىنىڭ باتىرى ءاليا مولداعۇلوۆاعا ارنالعان وبلىستىق مەموريالدىق مۋزەي جۇمىس ىستەيدى. وندا مەرگەن قىزدىڭ بالالىق شاعى, وقىعان كەزەڭى جانە مايدان جولىنا قاتىستى قۇندى دەرەكتەر جيناقتالعان. سونىمەن قاتار قوبدا اۋدانىنداعى ءاليا اۋىلىندا دا ونىڭ رۋحىنا ارنالعان مۋزەي بار.
قوبدا اۋىلىندا ءاليا مولداعۇلوۆانىڭ 100 جىلدىعى دۇركىرەپ ءوتتى
ءاليا مولداعۇلوۆانىڭ ەسىمى مەن ەرلىگى ماسكەۋدە دە كەڭىنەن ناسيحاتتالىپ كەلەدى. 1998 جىلى №891 مەكتەپكە ءاليا مولداعۇلوۆانىڭ ەسىمى بەرىلدى. بۇدان بولەك, ءاليانىڭ ءوزى ءتالىم العان مەرگەندەر مەكتەبى ورنالاسقان داڭعىل ونىڭ قۇرمەتىنە اتالعان. ال 2005 جىلى ءاليا مولداعۇلوۆانىڭ 80 جىلدىق مەرەيتويى قارساڭىندا مەكتەپ اۋلاسىنا ەسكەرتكىش قويىلدى.
قازاقتىڭ داڭقتى قىزى – ەل باسىنا كۇن تۋعان شاقتا حالقىن, جەرىن جاۋعا بەرمەۋ ءۇشىن اتقا قونعان قازاقتىڭ باتىر قىزدارىنىڭ ءىزباسارى. ونىڭ تاعدىرى مەن جاۋىنگەرلىك جولى ادەبيەتتە, مۋزىكادا, كينو مەن تەاتردا كەڭىنەن دارىپتەلىپ كەلەدى. ال ەرلىگى مەن تاعىلىمى جىل وتكەن سايىن جاڭعىرىپ, جاڭارا بەرمەك.
ەسكە سالا كەتەيىك, ءاليا مولداعۇلوۆانىڭ 100 جىلدىق مەرەيتويى قارساڭىندا ء«اليا مولداعۇلوۆا. وشپەس ەرلىك» اتتى ەنتسيكلوپەديالىق جيناق جارىق كوردى.