يران بيلىگى ورمۇز بۇعازىنداعى كەمە قاتىناسىن رەتتەۋگە باعىتتالعان جاڭا زاڭ جوباسىن ازىرلەدى. تەگەران بۇل باستامانى ەلدىڭ مۇناي سالاسىن ۇلتتىق مەنشىككە الۋ تۋرالى تاريحي شەشىممەن تەڭ ماڭىزى بار ۇزاق مەرزىمدى جوبا دەپ باعالاپ وتىر, دەپ حابارلايدى Egemen.kz.
يران پارلامەنتىنىڭ ۇلتتىق قاۋىپسىزدىك جانە سىرتقى ساياسات جونىندەگى كوميسسياسىنىڭ توراعاسى يبراگيم ازيزي مالىمدەگەندەي, قۇجات پارسى شىعاناعى مەن ورمۇز بۇعازى ايماعىنداعى قاۋىپسىزدىكتى قامتاماسىز ەتۋگە جانە ءوڭىردى دامىتۋعا باعىتتالعان كەشەندى شارالاردى قامتيدى.
ونىڭ ايتۋىنشا, ازىرلەنگەن زاڭ جوباسى جان-جاقتى پىسىقتالعان جانە ستراتەگيالىق ماڭىزعا يە. ازيزي بۇل باستامانىڭ ۇزاق مەرزىمدى اسەرى يراننىڭ مۇناي ونەركاسىبىن ۇلتتىق باقىلاۋعا العان تاريحي رەفورماسىمەن پارا-پار ەكەنىن اتاپ ءوتتى.
سونداي-اق ول يران بارلىق شەشىمدەرىن ۇلتتىق مۇددەگە سۇيەنە وتىرىپ قابىلدايتىنىن جانە وڭىردە ۇتىمدى ساياسات ۇستاناتىنىن جەتكىزدى.
ايتا كەتەيىك, ورمۇز بۇعازى الەمدەگى مۇناي مەن سۇيىتىلعان تابيعي گازدى تاسىمالداۋداعى ەڭ ماڭىزدى تەڭىز دالىزدەرىنىڭ ءبىرى سانالادى. بۇل باعىت ارقىلى پارسى شىعاناعى ەلدەرىنىڭ ەنەرگەتيكالىق رەسۋرستارىنىڭ ەداۋىر بولىگى ەكسپورتتالادى. سوندىقتان بۇعازداعى كەمە قاتىناسىنا قاتىستى كەز كەلگەن وزگەرىس الەمدىك ەنەرگەتيكالىق نارىقتار مەن ينۆەستورلاردىڭ ەرەكشە نازارىن اۋدارادى.
ەسكە سالايىق, بۇعان دەيىن اقش پەن يران كەلىسىمىنەن كەيىن مۇناي ارزانداعانىن جازعان بولاتىنبىز.