اباي وبلىسىنىڭ كوكپەكتى اۋدانىنداعى اجا اۋىلىندا سوڭعى جىلدارى بىرقاتار الەۋمەتتىك نىسان بوي كوتەردى. بۇل جوبالاردىڭ جۇزەگە اسۋىنا كاسىپكەر قايرات كەنجەباەۆ ۇيىتقى بولعانع دەپ حابارلايدى Egemen.kz
اجا اۋىلىندا دۇنيەگە كەلگەن قايرات كەنجەباەۆ جاس كەزىندە وتباسىمەن بىرگە قالاعا كوشكەنىمەن, تۋعان جەرىمەن بايلانىسىن ەشقاشان ۇزبەگەن. كەيىن كاسىبىن دوڭگەلەتىپ, تۋعان اۋىلىن دامىتۋعا ۇلەس قوسۋدى ماقسات ەتكەن.
كاسىپكەردىڭ باستاماسىمەن اۋىلدا مادەنيەت ءۇيى, مەشىت جانە جاڭا سپورت كەشەنى سالىندى. سونداي-اق بالالار ويىن الاڭى مەن فۋتبول الاڭى جابدىقتالعان. ال كەلەسى جىلى اۋىلدا بالاباقشا سالۋ جوسپارلانىپ وتىر.
«مەن ءوزىمدى اسا باي اداممىن دەپ ايتا المايمىن. ماسەلە قارجىدا ەمەس, نيەتتە. وسىنداي ىقىلاسپەن كەز كەلگەن ادام پايدالى ءىس اتقارا الادى. ءبىزدىڭ اۋىلدا قازىر كوپتەگەن قانداستار تۇرادى. ولار قىتايدان تاريحي وتانىنا ورالعانىنا شىن قۋانادى. ال تۋعان جەرىنەن كوشىپ كەتكەندەردىڭ وكىنىش بىلدىرەتىنىن ءجيى ەستيمىن», دەيدى كاسىپكەر قايرات كەنجەباەۆ.
وتكەن جىلى كاسىپكەر اۋماعى 400 شارشى مەتر بولاتىن سپورت كەشەنىنىڭ قۇرىلىسىن باستاعان. بۇگىندە مۇندا اۋىل جاستارى باسكەتبول, ۆولەيبول, فۋتبول ويناپ, قازاق كۇرەسىمەن اينالىسادى.
جەرگىلىكتى جاتتىقتىرۋشىلاردىڭ ايتۋىنشا, جاڭا سپورت زال جاستاردىڭ سپورتقا دەگەن قىزىعۋشىلىعىن ارتتىرعان. ال تۇرعىندار اۋىلدا بىرلىك پەن ىنتىماقتىڭ نىعايىپ, جاستاردىڭ ەلدى مەكەننىڭ دامۋىنا بەلسەندى ارالاسىپ جاتقانىن ايتادى.
قايرات كەنجەباەۆ پەن اۋىلدىڭ جاس تۇلەكتەرى جىل سايىن جاڭا الەۋمەتتىك جوبانى ىسكە قوسۋدى داستۇرگە اينالدىرعان. كەلەسى ماقسات اۋىل تۇرعىندارىنا ارنالعان تۇرعىن ۇيلەر سالۋ.
«ەگەر ءار ادام ءوزىنىڭ تۋعان جەرىنە وسىلاي قولداۋ كورسەتسە, اۋداندارىمىز الدەقايدا جىلدام داميتىن ەدى. ءوز تاراپىمىزدان كاسىپكەرلەرگە جەر تەلىمدەرىن بولۋدە, ينفراقۇرىلىم تارتۋ جانە جارىقتاندىرۋ ماسەلەلەرىندە قولداۋ كورسەتىپ كەلەمىز», دەيدى كوكپەكتى اۋدانىنىڭ اكىمى نۇربەك قوشقارباەۆ.
اجا اۋىلىندا جۇزەگە اسىپ جاتقان جوبالار تۋعان جەرگە دەگەن جاناشىرلىقتىڭ ناقتى كورىنىسىنە اينالىپ وتىر. بەلسەندى ازاماتتاردىڭ قولداۋىنىڭ ارقاسىندا اۋىل تۇرعىندارىنىڭ ءومىر ساپاسى جاقسارىپ, ەلدى مەكەننىڭ كەلەشەگىنە دەگەن سەنىم نىعايىپ وتىر.