وزگە ەلدەردە ازاماتتار زەينەتاقى جيناقتارىن بۇكىل ەڭبەك قىزمەتى بويى (30-40 جىل) جينايدى. وسىعان بايلانىستى ەرتە جاستا (مىسالى, 20 جاستا) جەتكىلىكتى زەينەتاقى جيناعىن قالىپتاستىرۋ ءىس جۇزىندە مۇمكىن ەمەس ەكەنى انىق. بۇل ءتيىستى اكتۋارلىق ەسەپتەۋلەرمەن جانە حالىقارالىق تاجىريبەمەن راستالادى, دەپ حابارلايدى Egemen.kz
سونداي-اق ەڭبەك جولىنىڭ باستاپقى كەزىندە اۋدارىلاتىن زەينەتاقى جارنالارى ۋاقىت وتە ۇزاق مەرزىم بويى ينۆەستيتسيالاناتىنى جانە «كۇردەلى پايىزدىڭ» ەسەپتەلۋى ارقاسىندا ەڭ جوعارى ينۆەستيتسيالىق كىرىستى قۇرايتىنى بەلگىلى. سول سەبەپتى جيناقتاردى جاس كەزدە الۋ زەينەتكەرلىك جاسقا جەتكەندەگى بولاشاق جيناقتاردىڭ كولەمىن ايتارلىقتاي ازايتادى.
ەڭ تومەنگى جەتكىلىكتىلىك شەگىن (تجش) ەسەپتەۋ سالىمشىنىڭ قازىرگى تابىسىنا ەمەس, ونىڭ بولاشاقتا الۋى ءتيىس نىسانالى زەينەتاقىسىنىڭ كولەمىنە نەگىزدەلەدى. ول ءۇشىن ءتيىستى جاستا زەينەتاقى شوتىندا بولۋى كەرەك جانە تىپتى بولاشاقتا جارنالار اۋدارىلماعان كۇننىڭ وزىندە قارتتىق شاقتا زەينەتاقى جيناقتارىنىڭ جەتكىلىكتى سوماسىن قامتاماسىز ەتە الاتىن ەڭ تومەنگى جيناق سوماسى ەسەپتەلەدى.
مىسالى, ەگەر سالىمشى 20 جاستا بولسا, ونىڭ زەينەتكە شىعۋىنا ءالى 40 جىلعا جۋىق ۋاقىت بار. وسى كەزەڭدە ونىڭ جيناقتارى ينۆەستيتسيالانىپ, ينۆەستيتسيالىق كىرىس اكەلۋى جانە بولاشاق زەينەتاقى تولەمدەرىن قامتاماسىز ەتۋى ءتيىس.
ەگەر قانداي دا ءبىر سەبەپتەرمەن جاس ازامات زەينەتاقى جارنالارىن اۋدارۋدى توقتاتسا دا, شوتتا 6 ملن تەڭگەدەن استام قاراجاتتىڭ بولۋى ينۆەستيتسيالىق كىرىس ەسەبىنەن زەينەتكەرلىك جاسقا قاراي زەينەتاقىمەن قامسىزداندىرۋدىڭ ەڭ تومەنگى ستاندارتىنا سايكەس كەلەتىن ماقساتتى دەڭگەيدەن تومەن ەمەس مولشەردە تولەمدەر الۋعا قاجەتتى جيناقتى قامتاماسىز ەتەدى.
زەينەتاقى قورىنان اقشا شەشىپ الۋ قيىنعا سوعادى
ماسەلەن, سالىمشىعا ءومىر بويى تولەنەتىن تولەمدەرگە كەپىلدىك بەرەتىن زەينەتاقى اننۋيتەتىنىڭ قۇنى ەسەپتىك شامادان تومەن بولۋى مۇمكىن ەمەس. ساقتاندىرۋ كومپانياسى بۇل قۇندى تەك سالىمشىنىڭ جاس ەكەندىگىنە نەمەسە اننۋيتەتتى ساتىپ الۋ ءۇشىن تابىسىنىڭ جەتكىلىكسىز بولعانىنا سۇيەنىپ قانا تومەندەتە المايدى. ءدال سول سياقتى, تجش شاماسى دا بولاشاقتا زەينەتاقى تولەمدەرىنىڭ ماقساتتى مولشەرىن قامتاماسىز ەتۋ ءۇشىن قاجەتتى ەسەپتىك دەڭگەيدەن تومەن بولماۋى ءتيىس.
زەينەتاقى قورىنداعى قاراجات بەيبەرەكەت جۇمسالماۋعا ءتيىس
سوندىقتان جاستار ءۇشىن تجش-نىڭ جوعارى ماندەرى ولاردىڭ بولاشاقتا قانداي ماقساتتى زەينەتاقى الۋى كەرەك ەكەندىگىمەن انىقتالادى. نىسانالى تولەمدەر حالىقارالىق ستاندارتتارعا ساي كەلەتىن زەينەتاقىمەن قامسىزداندىرۋدىڭ ەڭ تومەنگى الەۋمەتتىك ستاندارتتارىنان از بولماۋى كەرەك. حەۇ (حالىقارالىق ەڭبەك ۇيىمى) ۇسىنىمىنا سايكەس, كىرىستى الماستىرۋدىڭ ەڭ تومەنگى كوەففيتسيەنتى (كاك) – زەينەتاقىنىڭ زەينەتكە شىعار الدىنداعى ەڭبەك تابىسىنا اراقاتىناسى 40%-دان تومەن بولماۋى شارت.