قازاقستاندىق تەننيسشى ايىم قاناعاتوۆا البانيا استاناسى تيرانادا وتكەن ITF World Tennis Tour Juniors (J30 Tirana) حالىقارالىق ءتۋرنيرىنىڭ جەڭىمپازى اتاندى, دەپ جازادى Egemen.kz.
قازاقستان تەننيس فەدەراتسياسىنىڭ مالىمەتىنشە, بۇل باسەكەدە 18 جاسقا دەيىنگى سپورتشىلار باق سىناعان.
«جەتىسۋ» تەننيس ورتالىعىنىڭ 14 جاسار تاربيەلەنۋشىسى جەكەلەي سىندا باس جۇلدەنى ەنشىلەدى. شەشۋشى ماتچتا وتانداسىمىز اۆستريالىق يۋليا ەرەنبەرگەرمەن شەبەرلىك بايقاستى. ءۇش سەتكە سوزىلعان تارتىستى فينال 6:4, 3:6, 6:1 ەسەبىمەن اياقتالدى. ناتيجەسىندە ايىم قاناعاتوۆا جەڭىسكە جەتتى.
بۇل تروفەي جاس سپورتشىنىڭ كاسىبي كارەراسىنداعى ITF Juniors سەرياسى بويىنشا العاشقى جۇلدەسى. جارىس بارىسىندا ول تەك وزىنەن جاسى ۇلكەن ءارى تاجىريبەلى قارسىلاستاردى قاپى قالدىرىپ, جەڭىسكە جەتۋى ماڭىزدى جەتىستىك بولدى.
ەسكە سالا كەتەيىك, قازاقستان كوركەم گيمناستيكادان ازيا چەمپيوناتىندا كۇمىس جۇلدە يەلەندى.