تۇركيانىڭ شانلىۋرفا پروۆينتسياسىندا مەكتەپتە قارۋلى شابۋىل بولىپ, 16 ادام زارداپ شەكتى. وقيعا احمەت كويۋندجۋ اتىنداعى اناتوليا كاسىبي-تەحنيكالىق ليتسەيى اۋماعىندا بولعان. مالىمەتتەرگە سايكەس, 19 جاستاعى جىگىت الدىمەن مەكتەپ اۋلاسىندا, كەيىن عيمارات ىشىندە ۇزىن ۇڭعىلى قارۋمەن وق اتقان, دەپ حابارلايدى Egemen.kz.
اتىس باستالعان ساتتە مەكتەپتە دۇربەلەڭ تۋىپ, كەيبىر وقۋشىلار تەرەزەدەن سەكىرىپ قاشۋعا تىرىسقان. وقۋ ورنى تەز ارادا ەۆاكۋاتسيالاندى.
پروۆينتسيا گۋبەرناتورى حاسان شىلداك شابۋىل سالدارىنان 16 ادامنىڭ جارالانعانىن ايتتى. ولاردىڭ ىشىندە 4 مۇعالىم, 10 وقۋشى, اسحانا قىزمەتكەرى جانە ءبىر پوليتسەي بار. ءتورت ادامنىڭ جاعدايى ورتاشا اۋىر دەپ باعالانۋدا.
اقش-تا اق ءۇي ماڭىندا اتىس بولدى
شابۋىل جاساعان ادام بۇرىن وسى مەكتەپتە وقىعان, بىراق كەيىن باسقا وقۋ ورنىنا اۋىستىرىلعانى بەلگىلى بولدى. پوليتسيا قورشاۋعا العان كەزدە, ول ۇستالىپ قالاتىنىن ءتۇسىنىپ, ءوز-وزىنە قول جۇمساعان.
الدىن الا مالىمەت بويىنشا, شابۋىلدىڭ سەبەبى ونىڭ باسقا مەكتەپكە اۋىستىرىلۋىنا بايلانىستى نارازىلىق بولۋى مۇمكىن. قازىرگى ۋاقىتتا وقيعا بويىنشا تەرگەۋ جۇرگىزىلىپ جاتىر.