ماجارستاننىڭ جاڭا پرەمەر-ءمينيسترى پەتەر ماديار مەملەكەتتىك سەكتورداعى شىعىنداردى قىسقارتۋ تۋرالى مالىمدەمە جاسادى. RTL Hungary تەلەارناسىنا بەرگەن سۇحباتىندا ول ءوز جالاقىسىن ەكى ەسەگە دەيىن قىسقارتاتىنىن ايتتى, دەپ حابارلايدى Egemen.kz.
مينيسترلەر كابينەتىنىڭ جەتەكشىسى ءوز سوزىندە بۇرىنعى پرەمەر-مينيستر ۆيكتور وربان الىپ كەلگەن ۇلكەن كولەمدەگى تولەمدەردەن باس تارتىپ, بۇدان بىلاي تەك پرەمەرلىك جالاقى مەن دەپۋتاتتىق مازمۇنداعى تولەماقىنى عانا الۋدى جوسپارلاپ وتىرعانىن جەتكىزدى. ناتيجەسىندە ونىڭ جالپى تابىسى ايىنا شامامەن 3,8 ملن فورينت برۋتتونى نەمەسە 10,5 مىڭ ەۋرونى (شامامەن 5,7 ملن تەڭگە) قۇرايتىن بولادى.
جالاقىنى قىسقارتۋ مينيسترلەرگە, مەملەكەتتىك حاتشىلارعا, دەپۋتاتتارعا, اكىمدەرگە جانە مەملەكەتتىك كومپانيا باسشىلارىنا دا قاتىستى بولماق. پرەمەر-ءمينيستردىڭ ايتۋىنشا, قيىن كەزەڭدە ساياساتكەرلەر «تابىس تابۋدى ەمەس, حالىققا قىزمەت ەتۋدى» ويلاۋى كەرەك.
سونىمەن قاتار ۇكىمەت دەپۋتاتتارعا بەرىلەتىن وتەماقىلاردى دا ازايتۋدى كوزدەپ وتىر. بۇعان دەيىن پارلامەنت مۇشەلەرى كولىك, تۇرعىن ءۇي جانە قىزمەتكەرلەر ەڭبەكاقىسىنا ايىنا 7 ملن فورينتكە دەيىن وتەماقى الا الاتىن. ەندى بۇل ليميت 5 ملن فورينتتەن تومەن دەڭگەيگە دەيىن قىسقارۋى مۇمكىن.
«جالاقىدا ايىرماشىلىق بار»: تەمىر قالاسىنىڭ تۇرعىندارى اۋىل مارتەبەسىن بەرۋدى سۇراپ وتىر
پەتەر مادياردىڭ سوزىنشە, اتالعان وزگەرىستەر مەملەكەتتىك بيۋدجەتتەن شامامەن 50 ملرد فورينت نەمەسە 139 ملن ەۋرو كولەمىندە قارجى ۇنەمدەيدى.
قازىرگى تاڭدا ماجارستانداعى ورتاشا جالاقى ايىنا شامامەن 640 مىڭ فورينت برۋتتونى (900 مىڭ تەڭگەگە جۋىق) قۇرايدى. وسىعان بايلانىستى جوعارى لاۋازىمدى شەنەۋنىكتەردىڭ تابىسى ەلدەگى ورتاشا ەڭبەكاقىدان الدەقايدا جوعارى بولعان.
ەسكە سالا كەتەيىك, بۇعان دەيىن ءماجىلىس دەپۋتاتى باقىتجان بازاربەك اي سايىن الاتىن 900 مىڭ تەڭگە كولەمىندەگى جالاقىسى وتباسىلىق شىعىندى تولىق وتەۋگە جەتپەيتىنىن ايتقان بولاتىن.