مادەنيەت جانە اقپارات ءمينيسترى ايدا بالاەۆا «حالىق اۋەنى» رەسپۋبليكالىق ونەر كەرۋەنىنىڭ قورىتىندىلانعانىن مالىمدەدى. بۇل تۋرالى ول Facebook-تەگى پاراقشاسىندا جازدى, دەپ حابارلايدى Egemen.kz.
ءمينيستردىڭ ايتۋىنشا, ءۇش كۇن بويى وتكەن اۋقىمدى مادەني جوبا ەلدىڭ بىرنەشە ءوڭىرىن قامتىپ, ۇلتتىق ونەردى ناسيحاتتاۋعا باعىتتالدى. ونەر كەرۋەنى اباي, اقمولا, اقتوبە, الماتى, اتىراۋ, باتىس قازاقستان, جەتىسۋ, جامبىل, قاراعاندى, ماڭعىستاۋ, قوستاناي, قىزىلوردا, سولتۇستىك قازاقستان, ۇلىتاۋ, تۇركىستان, شىعىس قازاقستان جانە پاۆلودار وبلىستارىن ارالاپ, 51 اۋدان مەن ەلدى مەكەندە كونتسەرت ۇيىمداستىرعان.
ءۇش كۇن ىشىندە كونتسەرتتىك باعدارلامالاردى 20 مىڭنان استام كورەرمەن تاماشالاعان. اسىرەسە شالعاي اۋىلدار مەن اۋدان ورتالىقتارىنىڭ تۇرعىندارى ونەر ۇجىمدارىن ەرەكشە ىقىلاسپەن قارسى الىپ, ۇلتتىق مادەنيەتكە دەگەن قۇرمەتىن كورسەتكەن.
سوڭعى ءۇش جىلدا مادەنيەت سالاسىنىڭ 592 وكىلى مەملەكەتتىك ناگرادالارمەن ماراپاتتالدى
جوباعا ەلىمىزدىڭ جەتەكشى شىعارماشىلىق ۇجىمدارى قاتىستى. اتاپ ايتقاندا, قۇرمانعازى اتىنداعى قازاق ۇلتتىق حالىق اسپاپتار وركەسترى, «سالتانات» مەملەكەتتىك بي ءانسامبلى, «قازاقستان كامەراتاسى» مەملەكەتتىك كلاسسيكالىق مۋزىكا ءانسامبلى, اباي اتىنداعى قازاق ۇلتتىق وپەرا جانە بالەت تەاترىنىڭ سوليستەرى, ن.تىلەنديەۆ اتىنداعى «وتىرار سازى» وركەسترى, مەملەكەتتىك ۇرمەلى اسپاپتار وركەسترى, ب.بايقاداموۆ اتىنداعى مەملەكەتتىك حور كاپەللاسى جانە وزگە دە ونەر ۇجىمدارى كورەرمەنگە جوعارى دەڭگەيدەگى كونتسەرتتىك باعدارلامالار ۇسىندى.
ليساكوۆ قالاسىندا قۇرمانعازى وركەسترىنىڭ «حالىق اۋەنى» كونتسەرتى ءوتتى
كەرۋەن اياسىندا ءداستۇرلى ءان, حالىق مۋزىكاسى, سيمفونيالىق شىعارمالار, ميۋزيكل جانرىنداعى قويىلىمدار, ەسترادالىق باعدارلامالار مەن حورەوگرافيالىق كومپوزيتسيالار ساحنالانعان. مينيستر بۇل باستامانىڭ مادەنيەت پەن ونەردىڭ قوعامداعى رۋحاني بايلانىستى نىعايتاتىن ماڭىزدى كۇش ەكەنىن تاعى ءبىر مارتە دالەلدەگەنىن اتاپ ءوتتى.
سونداي-اق ايدا بالاەۆا جوباعا قولداۋ كورسەتكەن Halyk Bank پەن باسقارما توراعاسى ءۇمىت شاياحمەتوۆاعا العىس ءبىلدىردى.
«ۇلتتىق مادەنيەت پەن رۋحانياتتى قولداۋعا باعىتتالعان مۇنداي ءىرى جوبالار – ەلدىڭ مادەني دامۋىنا قوسىلعان ماڭىزدى ۇلەس. حالىق پەن ونەر اراسىنداعى التىن كوپىرگە اينالعاندارىڭىز ءۇشىن زور ريزاشىلىعىمدى بىلدىرەمىن», دەدى مينيستر.
مينيستر سونداي-اق جوباعا قاتىسقان شىعارماشىلىق ۇجىمدارعا, مادەنيەت سالاسىنىڭ قىزمەتكەرلەرىنە, ءوڭىر اكىمدىكتەرىنە جانە ونەرسۇيەر قاۋىمعا العىس ايتتى. ونىڭ سوزىنشە, الداعى ۋاقىتتا مۇنداي باستامالارعا وزگە دە بانكتەر مەن دەمەۋشىلەر قولداۋ كورسەتەدى دەگەن سەنىم بار.
ايتا كەتەيىك, الماتىدا مادەنيەت قىزمەتكەرلەرىنە 60 پاتەردىڭ كىلتى تابىستالدى.