بيىلعى قىس مارقاكول ءوڭىرى ءۇشىن وڭايعا سوقپادى. كوكتەم لەبى ەندى-ەندى عانا سەزىلگەن توسقايىڭ اۋىلدىق وكرۋگىنە جۋىقتا زايسان مەن تارباعاتاي اۋداندارىنىڭ اكىمدەرى باستاعان دەلەگاتسيا كومەك اپارىپ, اۋىل-ايماقتىڭ احۋالىن كورىپ قايتتى.
جاڭادان قۇرىلعان مارقاكول اۋدانىنا تارباعاتاي اۋدانىنىڭ اكىمى دارحان جورگەكپاەۆ, ءماسليحات توراعاسى ءومىرحان قاناعاتوۆ تارباعاتايلىقتاردىڭ ىستىق سالەمىن جەتكىزىپ, ەلدىڭ اتىنان وقۋشىلارعا ءتاتتى سىيلىقتار, بالالارعا ارنالعان كىتاپتار مەن ويىنشىقتار تابىس ەتتى. سونداي-اق كوكتەمى كەش كەلەتىن وڭىرگە قاجەت-اۋ دەپ موتوپومپا تارتۋ ەتتى.
– شقو اكىمى ەرمەك بەدەلباي ۇلىنىڭ تاپسىرماسى بويىنشا مارقاكولدى كورىپ, جاڭا اۋدانعا قانداي كومەك بەرە الامىز دەگەن ويمەن كەلدىك. جەرگىلىكتى تۇرعىندارمەن تانىسىپ, الەۋمەتتىك نىسانداردى ارالاپ كوردىك. ءبىز ارقاشان قولۇشىن بەرۋگە دايىنبىز. توسقايىڭ اۋىلىنداعى مەكتەپتىڭ ماتەريالدىق-تەحنيكالىق بازاسىن جاقسارتۋعا ءازىرمىز. سونداي-اق ءبىلىم وشاعىنىڭ الدىنا ۆوركاۋت الاڭىن ورناتىپ بەرمەكپىز, – دەدى تارباعاتاي اۋدانىنىڭ اكىمى دارحان جورگەكپاەۆ.
وزدەرى دە جاڭا قۇرىلىپ جاتقان تارباعاتاي اۋدانىنىڭ حالقىنا مارقاكولدىكتەر ريزاشىلىعىن ءبىلدىردى.
– تارباعاتاي اۋدانىنىڭ حالقىنا كوپ راحمەت. قار قالىڭ, جول الىس بولسا دا, بىزگە كەلىپ, كومەكتەرىن كورسەتىپ جاتىر. الداعى ۋاقىتتا بىزگە ۆوركاۋت الاڭىن ورناتىپ بەرەمىز دەپ قۋانتتى, – دەدى توسقايىڭ ورتا مەكتەبىنىڭ وقۋشىسى ايلين اقىلبەكوۆا.
پرەزيدەنت جارلىعىمەن قۇرىلعان مارقاكول اۋدانىنىڭ الەۋمەتتىك-ەكونوميكالىق دامۋىنا كورشىلەس اۋدانداردىڭ كومەك قولىن سوزىپ جاتقاندارى قۋانتادى. سونداي-اق زايسان اۋدانىنىڭ اكىمى اەليتا احمەتسالىمقىزى توسقايىڭ اۋىلدىق وكرۋگىندەگى مەكتەپتىڭ وقۋشىلارىنا تاتتىلەر, كيىم-كەشەكتەر, رەزەڭكە ەتىكتەر, اۋىل تۇرعىندارىنا قاجەتتى ءدارى-دارمەكتەردى اپارىپ بەردى.
– زايسان اۋدانى مارقاكول ءوڭىرىن قولداۋعا ارقاشان دايىن. بۇگىن, مىنە, جاڭا قۇرىلىپ جاتقان اۋدانعا كەلىپ, جاعدايىمەن تانىسىپ قايتتىق. كىشىگىرىم كومەگىمىزدى الا كەلدىك. بولاشاقتا بالالار وينايتىن زاماناۋي الاڭ سالىپ بەرسەك دەگەن ويدامىز. مارقاكولدىك كىشكەنتاي دوستارىمدى زايسان اۋدانىنا كەلىپ, ءوڭىردىڭ تاريحىمەن, الەۋمەتتىك نىساندارمەن تانىسۋعا شاقىرىپ وتىرمىن. تابيعاتى اسەم مارقا ءوڭىرىنىڭ بولاشاعى زور, – دەيدى زايسان اۋدانىنىڭ اكىمى.
ءوز كەزەگىندە اۋىل تۇرعىندارى دا ارقاشان دوستىق قۇشاعىن جاياتىن زايسان حالقىنا العىس ءبىلدىردى. ايتا كەتەيىك, زايسان اۋدانى مارقاكول وڭىرىنە قىستاي كومەك كورسەتىپ كەلەدى.
– بيىل ءبىراز ەل جەمشوپتەن قينالىپ قالدى. سول كەزدە زايسان حالقى بىزگە قولۇشىن بەرىپ, 500 تۇك ءشوپ جىبەرگەن ەدى. وسى جولى دا جاڭا اۋدانعا كومەگىن بەرىپ جاتىر. العىستان باسقا ايتار جوق. بىرلىگىمىز ارتا بەرسىن! – دەدى توسقايىڭ اۋىلىنىڭ تۇرعىنى باقىتبەك تۇراتاۋوۆ.
مارقاكول ايماعىنا ارنايى كەلگەن زايسان اۋداندىق ءماسليحاتىنىڭ توراعاسى ەركەبۇلان زاعىپاروۆ تا ىزگى تىلەگىن ءبىلدىردى.
– وبلىس باسشىلىعىنىڭ مارقاكول ءوڭىرىنىڭ جاعدايىمەن تانىسىپ قايتۋ ۇسىنىسىن زايسان جانە تارباعاتاي اۋداندارى قۇپ الىپ, بۇگىن كيەلى جەرگە كەلىپ, تۇرعىندارمەن كەزدەستىك. زايسان اۋدانى ءماسليحاتىنىڭ دەپۋتاتتارىنىڭ ىستىق ىقىلاسىن جەتكىزىپ, توسقايىڭعا ماڭايداعى اۋىلداردان كەلىپ, ينتەرناتتا جاتىپ وقيتىن وقۋشىلارعا سپورتتىق كيىمدەردى تابىس ەتتىك. ەڭسەسىن ەندى تىكتەپ جاتقان مارقاكولدى دەمەۋگە ارقاشان ءازىرمىز, – دەدى ە.زاعىپاروۆ.
ءيا, قاشاندا ءبىر-بىرىمىزگە دەمەۋ بولعان ەلمىز. بۇل جولى دا زايسان مەن تارباعاتايدىڭ ازاماتتارى مىقتىلىعىن, تەكتىلىگىن كورسەتتى.
شىعىس قازاقستان وبلىسى