سەنات توراعاسى ماۋلەن اشىمباەۆ باستاعان ءبىر توپ پارلامەنت دەپۋتاتى جۇمىس ساپارىمەن ۆاتيكان مەن يتاليا رەسپۋبليكاسىنا باردى. ساپار اياسىندا دەلەگاتسيا ريم پاپاسى فرانتسيسكپەن كەزدەستى. سونداي-اق ۆاتيكاننىڭ دىنارالىق ديالوگ جونىندەگى ديكاستەرياسىنىڭ جانە الەمدىك جانە ءداستۇرلى دىندەر كوشباسشىلارى سەزىنىڭ ۇيىمداستىرۋىمەن دوڭگەلەك ۇستەل ءوتتى. قازاقستاندىق سەناتورلار يتاليا رەسپۋبليكاسى پارلامەنتى سەناتىنىڭ دەپۋتاتتارىمەن دە كەزدەسىپ, پارلامەنتارالىق ىنتىماقتاستىقتى نىعايتۋ ماسەلەلەرىن تالقىلادى.
ماۋلەن اشىمباەۆ ريم پاپاسى فرانتسيسككە ءىلتيپات تانىتىپ, پونتيفيككە اۋديەنتسيا ءۇشىن العىس ءبىلدىردى. سونداي-اق ول ەكى ەل اراسىنداعى دوستىق قارىم-قاتىناستىڭ ودان ءارى نىعايۋىنا قازاقستان پرەزيدەنتى قاسىم-جومارت توقاەۆتىڭ بيىل قاڭتار ايىندا ۆاتيكانعا جاساعان رەسمي ساپارى ايتارلىقتاي سەرپىن بەرگەنىن اتاپ ءوتتى. سەنات سپيكەرى ءوز سوزىندە قاسيەتتى تاققا الەمدىك جانە ءداستۇرلى دىندەر كوشباسشىلارى سەزىنە جان-جاقتى قولداۋ كورسەتىپ كەلە جاتقانى ءۇشىن ريزاشىلىعىن جەتكىزدى. سونداي-اق ريم پاپاسىنىڭ VII سەزگە قاتىسۋى جاھاندىق دىنارالىق ديالوگتى ارتتىرۋعا جانە حالىقارالىق دەڭگەيدە رۋحاني ديپلوماتيانى دامىتۋعا زور ىقپالىن تيگىزگەنىن ايتتى.
ريم پاپاسى فرانتسيسك قاسيەتتى تاق قازاقستاننىڭ بەيبىتشىلىك پەن ءتۇرلى ءدىن وكىلدەرى اراسىنداعى ىنتىماقتاستىقتى نىعايتۋعا ارنالعان باستاماسىن قولدايتىنىن اتاپ ءوتتى. سونىمەن بىرگە ول استانادا وتكەن الەمدىك جانە ءداستۇرلى دىندەر كوشباسشىلارىنىڭ VII سەزىنە قاتىسقان ءساتتى ەسكە الدى.
«بۇگىنگى كەزدەسۋىمىز استاناعا ساپارىمدى, سول كەزدە قاتىسقان الەمدىك جانە ءداستۇرلى دىندەر كوشباسشىلارىنىڭ VII سەزىن ەسكە ءتۇسىردى. سەزد ءدىن ليدەرلەرى ديالوگ قۇراتىن, سونداي-اق الەمدىك ساياساتكەرلەر مەن مادەنيەت جانە مەديا وكىلدەرىن بىرىكتىرەتىن بىرەگەي الاڭعا اينالدى. بۇل باستاما, شىن مانىندە, قۇرمەتكە لايىق جانە قازاقستاندى كەزدەسۋلەر ەلى رەتىندە كورسەتەدى. بيىل قاڭتار ايىندا ۆاتيكانعا ساپارمەن كەلگەن قازاقستان پرەزيدەنتىمەن كەزدەستىم. سول كەزدە قازاق حالقىنا دەگەن ىزگى نيەتىمدى ءبىلدىردىم. ءبىز دىندەر, مادەنيەتتەر جانە ەتنوستىق توپتار اراسىنداعى ۇيلەسىمدىلىككە جەتۋ جولىندا ءبىر-ءبىرىمىزدى قولداۋىمىز قاجەت. قازاقستان – وسىنداي جەتىستىكپەن ماقتانا الاتىن ەل», دەدى ريم پاپاسى فرانتسيسك.
ساپار اياسىندا ەكولوگيا, جاھاندىق جىلىنۋ جانە قورشاعان ورتانى قورعاۋ ماسەلەلەرىنە ارنالعان دوڭگەلەك ۇستەل ۇيىمداستىرىلدى. ءىس-شارا بارىسىندا ماۋلەن اشىمباەۆ قازاقستان پرەزيدەنتى جاسىل ەكونوميكاعا كوشۋ ماسەلەسىنە باسا ءمان بەرىپ وتىرعانىن ايتتى. سوعان سايكەس ۇلتتىق زاڭناما, ورنىقتى دامۋ سالاسىنداعى ۇلتتىق ماقساتتار مەن مىندەتتەردىڭ ىسكە اسىرىلۋىنا مونيتورينگ جۇرگىزۋ جونىندەگى پارلامەنتتىك كوميسسيانىڭ قىزمەتى جانە باسقا دا باعىتتار اياسىندا كەشەندى جۇمىستار جۇيەلى تۇردە جۇرگىزىلىپ كەلەدى.
«الەمدىك جانە ءداستۇرلى دىندەر كوشباسشىلارى سەزى قازىرگىدەي وزەكتى سىن-قاتەرلەر جاعدايىندا ءدىن كوشباسشىلارىنىڭ, ساياساتكەرلەردىڭ جانە حالىقارالىق ۇيىمداردىڭ كۇش-جىگەرىن ورتاق مۇددەگە جۇمىلدىرۋدى كوزدەيدى. رۋحاني كوشباسشىلار جەرگىلىكتى جەردە عانا ەمەس, حالىقارالىق دەڭگەيدە دە زور ىقپالعا يە. ولار بىرلەسىپ, كليماتتىڭ وزگەرۋى, تەڭسىزدىك, ەكسترەميزم سياقتى پروبلەمالاردى شەشۋگە, قاقتىعىستار مەن سوعىستاردى توقتاتۋعا ايتارلىقتاي سەپتىگىن تيگىزە الادى. پلانەتامىز بەن كەلەر ۇرپاقتىڭ جارقىن بولاشاعى جولىندا جۇدىرىقتاي جۇمىلۋ ءبىزدىڭ ورتاق ماقساتىمىز ەكەنى انىق», دەدى قازاقستان پارلامەنتى سەناتىنىڭ توراعاسى.
سونداي-اق ماۋلەن اشىمباەۆ يتاليا رەسپۋبليكاسى پارلامەنتى سەناتىنىڭ توراعاسى ينياتسيو لا رۋسسامەن كەزدەستى. سۇحبات كەزىندە تاراپتار پارلامەنتارالىق قارىم-قاتىناستى ارتتىرۋ ماسەلەسىنە كەڭىرەك توقتالدى.
«يتاليا – قازاقستاننىڭ ەۋروپالىق وداقتاعى ماڭىزدى ستراتەگيالىق سەرىكتەستەرىنىڭ ءبىرى. ءبىزدىڭ ەلدەرىمىز اراسىندا سىندارلى ساياسي ديالوگ قالىپتاسقان. جىل باسىندا قازاقستان پرەزيدەنتى قاسىم-جومارت توقاەۆتىڭ يتالياعا رەسمي ساپارمەن كەلۋى سونىڭ جارقىن ءبىر كورىنىسى. بۇل ساپار ەكى مەملەكەتتىڭ ەكونوميكالىق جانە مادەني-گۋمانيتارلىق ىنتىماقتاستىعىن نىعايتۋعا تىڭ سەرپىن بەردى», دەگەن ماۋلەن اشىمباەۆ الداعى ۋاقىتتا پارلامەنتارالىق بايلانىستى ودان ءارى نىعايتۋدىڭ ءمانى زور ەكەنىن ايتتى.
ينياتسيو لا رۋسسا ەكى ەلدىڭ قارىم-قاتىناسىن ءارى قاراي ارتتىرۋدىڭ ماڭىزدى ەكەنىنە نازار اۋدارىپ, قازاقستاندا جۇرگىزىلىپ جاتقان دەموكراتيالىق جاڭعىرتۋلار مەن رەفورمالارعا قولداۋ ءبىلدىردى.
ەكىجاقتى كەزدەسۋ بارىسىندا تاراپتار ساۋدا-ەكونوميكالىق, مادەني-گۋمانيتارلىق جانە ينۆەستيتسيالىق ىنتىماقتاستىقتى كەڭەيتۋ ماسەلەلەرىن دە تالقىلادى. ودان بولەك, ەكى جاق ءبىلىم بەرۋ جانە تۋريزم سالاسىنداعى سەرىكتەستىكتى كەڭەيتۋ جونىندە پىكىر الماستى.