پرەمەر-ءمينيستردىڭ ورىنباسارى تامارا دۇيسەنوۆانىڭ توراعالىعىمەن الەۋمەتتىك ارىپتەستىك پەن الەۋمەتتىك جانە ەڭبەك قاتىناستارىن رەتتەۋ جونىندەگى رەسپۋبليكالىق ۇشجاقتى كوميسسيانىڭ وتىرىسى ءوتتى. وعان ورتالىق مەملەكەتتىك ورگاندار, كاسىپوداقتار بىرلەستىكتەرىنىڭ, جۇمىس بەرۋشىلەر وداعىنىڭ وكىلدەرى جانە وبلىس اكىمدەرىنىڭ ورىنباسارلارى قاتىستى.
جيىن بارىسىندا ەلدەگى ەڭبەك سالاسىنىڭ جاي-كۇيى تالقىلاندى. اتقارىلعان شارالار جونىندە ەڭبەك جانە حالىقتى الەۋمەتتىك قورعاۋ ءمينيسترىنىڭ ءبىرىنشى ورىنباسارى اقمادي سارباسوۆ باياندادى. بىلتىر ينسپەكتورلار 7 مىڭعا جۋىق تەكسەرۋ جۇمىستارىن جۇرگىزىپ, انىقتالعان ولقىلىقتاردى جويۋ بويىنشا 4 مىڭنان اسا نۇسقاما بەردى. 400 ملن تەڭگەدەن استام سوماعا 2 400 ايىپپۇل سالىندى.
بۇگىندە 31 كاسىپورىننىڭ 1,6 مىڭ جۇمىسشى الدىندا بەرەشەگى بار. جالپى سوماسى 700 ملن تەڭگەگە جۋىقتايدى. ولاردىڭ ەڭ كوبى شىعىس قازاقستان, قوستاناي وبلىستارى مەن الماتى قالاسىندا انىقتالعان. ودان بولەك بانكروت دەپ تانىلعان 44 نىساننىڭ 913 ملن تەڭگە قارىزى بار.
1 اقپانداعى جاعداي بويىنشا ەلدەگى كاسىپورىنداردا 106 ادام جاراقات الدى. تامارا دۇيسەنوۆا مۇددەلى مەملەكەتتىك ورگاندار مەن وبلىس اكىمدىكتەرىنە جۇمىس ورىندارىنداعى جاعدايعا باقىلاۋدى كۇشەيتىپ, جاراقات الۋ وقيعالارىنىڭ الدىن الۋ بويىنشا ءتيىستى شارالار قابىلداۋدى تاپسىردى.
سونىمەن قاتار ۆيتسە-پرەمەر ەڭبەك داۋلارى مەن جۇمىس بەرۋشىلەردىڭ وتاندىق جانە شەتەلدىك جۇمىسشىلار ءۇشىن تەڭ جاعداي جاساۋىن, ەڭبەكاقى تولەۋگە بايلانىستى تالاپتاردى ساقتاۋىن باقىلاۋ قاجەتتىگىنە دە ءمان بەردى. جىلدىڭ باسىندا مينيسترلىكتىڭ احۋال ورتالىعىندا 106 كاسىپورىن مونيتورينگتە بولعان. ونىڭ ءبىرازىندا ەڭبەك داۋلارى شەشىمىن تاۋىپ, باقىلاۋدا 62-ءسى قالدى. ونىڭ ىشىندە ءاربىر ءۇشىنشىسى – ماڭعىستاۋ وبلىسىندا.
وسى ورايدا ايماق باسشىسىنىڭ ورىنباسارى قانات قۇلجانوۆ وسى باعىتتا اتقارىلىپ جاتقان شارۋالار تۋرالى باياندادى.
ال رەسپۋبليكالىق كاسىپوداقتار فەدەراتسياسىنىڭ توراعاسى ساتىبالدى داۋلەتالين مۇنداي جاعدايلار كوبىنە كاسىپوداعى جوق مەكەمەلەردە بولاتىنىن العا تارتتى.
«ەڭبەك داۋلارىن شەشۋدە سالدارىمەن ەمەس, سەبەبىمەن كۇرەسكەن ءجون. بۇل رەتتە جۇمىس بەرۋشىلەر مەن كاسىپوداق بىرلەستىكتەرى ىسكە اتسالىسۋى كەرەك. كەز كەلگەن ماسەلەدە ورتاق شەشىمگە كەلۋگە بولادى. ول ءۇشىن نيەت بولۋى كەرەك. سوندىقتان سالالىق ۇيىمداردى ەلدەگى ەڭبەك ماسەلەلەرىنە بەيجاي قاراماي, شەشۋگە ارالاسۋعا شاقىرامىن», – دەپ اتاپ ءوتتى تامارا دۇيسەنوۆا.
ازاماتتار ءۇشىن جايلى ەڭبەك جاعدايىن قالىپتاستىرۋدا مەملەكەتتىك ورگاندار, جۇمىس بەرۋشىلەر مەن كاسىپوداق ۇيىمدارىنىڭ ءوزارا بىرلەسكەن شارالار قابىلداۋى ماڭىزدى. وسى ورايدا تاراپتاردىڭ مىندەتتەرىن ايقىندايتىن باس كەلىسىمگە قول قويىلدى.
الداعى 3 جىلعا ارنالعان جاڭا قۇجاتتىڭ جوباسىن ەڭبەك جانە حالىقتى الەۋمەتتىك قورعاۋ مينيسترلىگى جانىنان قۇرىلعان جۇمىس توبى ازىرلەدى. 10 تارماقتان تۇراتىن كەلىسىم 2030 جىلعا دەيىنگى «ەڭبەك قاۋىپسىزدىگى» جانە «ەڭبەك نارىعىن دامىتۋ» جونىندەگى تۇجىرىمدامالاردا كورسەتىلگەن تالاپتاردى ەسكەرگەن. ۆيتسە-پرەمەر بۇل قۇجاتتىڭ نەگىزگى مىندەتى ازاماتتاردى ساپالى جۇمىس ورىندارىمەن قامتاماسىز ەتۋگە جاعداي جاساۋ ەكەنىنە ەرەكشە ءمان بەردى.