مۇنداي وپەراتسيا بۇرىن وسكەمەندى قويىپ, ءىرى قالالاردا جاسالا بەرمەيتىن. قازىر انا مەن بالا ورتالىعىنىڭ نەيروحيرۋرگ دارىگەرلەرى گيدروتسەفالياعا شالدىققان بالالاردىڭ ميىنا شۋنت ورناتۋ سەكىلدى زەرگەرلىك شەبەرلىكتى قاجەت ەتەتىن وپەراتسيالارىن وپ-وڭاي جاساپ ءجۇر. دەمەك, تەحنولوگيانىڭ دامىعانى عانا ەمەس, اق حالاتتىلاردىڭ بىلىكتىلىكتەرى دە شىڭدالدى.
– بوسانۋ بلوگىمەن تىعىز بايلانىستا جۇمىس ىستەي وتىرىپ, ءبىز جاڭا تۋعان نارەستەلەردە نەيروحيرۋرگيالىق اقاۋلار انىقتالعان كەزدە دەرەۋ وپەراتسيا جاساۋعا تىرىسامىز. مىسالى, پاتولوگيانىڭ ءارتۇرلى دەڭگەيلەرى بار. اسىرەسە, ومىرتقانىڭ تۋابىتكەن جارىعى ءجيى كەزدەسەدى. ەگەر بۇرىن گيدروتسەفاليا دياگنوزى ۇكىم سياقتى ەستىلسە, قازىر بۇل اۋرۋمەن انا مەن بالا ورتالىعىنىڭ نەيروحيرۋرگتەرى ءساتتى كۇرەسىپ ءجۇر, – دەيدى شقو انا مەن بالا ورتالىعىنىڭ نەيروحيرۋرگ دارىگەرى ولجاس ازانقۇلوۆ.
ايماقتاعى انا مەن بالا ورتالىعىندا سامار اۋدانىنىڭ شۇبارقايىڭ اۋىلىنان كەلگەن 11 جاستاعى كاميلا بايزاقوۆا ءسابي كەزىنەن باستاپ گيدروتسەفاليا دياگنوزىمەن ديسپانسەرلىك ەسەپتە تۇر. نارەستەگە العاشقى شۋنت ەكى ايىندا قويىلعان. دارىگەرلەردىڭ ايتۋىنشا, كەيىن كاميلانىڭ اياعىندا السىزدىك پايدا بولعان. تەكسەرە كەلە مرت ناتيجەسى جۇلىن جارىعىن كورسەتكەن. ءسويتىپ, 2013 جىلى ءسابي كەزىندە وعان استانا قالاسىنداعى نەيروحيرۋرگيا ورتالىعىندا ج ۇلىن ىسىگىنە وپەراتسيا جاسالدى. جالپى, بۇگىنگە دەيىن بەس وپەراتسيانى باسىنان وتكىزىپتى.
جىل سايىن كاميلا اناسىمەن بىرگە شقو-داعى انا مەن بالا ورتالىعىنا كەلىپ, ۆەنتريكۋلو-پەريتونەالدى شۋنتتى تەكسەرتەدى, وڭالتۋ كۋرسىنان وتەدى, ابزال جانداردىڭ قاداعالاۋىندا بولادى. كۇنى كەشە عانا جەتكىنشەككە حيرۋرگتەر تاعى ءبىر وپەراتسيا جاسادى. قازىر پاتسيەنت ءوزىن جاقسى سەزىنەدى. ۇيگە شىعۋعا دايىندالىپ ءجۇر. انا مەن بالا ورتالىعى دارىگەرلەرىنىڭ ايتۋىنشا, ول اۋرۋحانادا بوس قاراپ جاتپايدى. مونشاقتاردان ءارتۇرلى سۋرەتتەر كەستەلەيدى, تەلەفوندارعا ارنالعان بىلەزىكتەر جاسايدى. جاساعان زەرگەرلىك بۇيىمدارىن نەيروحيرۋرگيا بولىمىندە ەمدەلىپ جاتقان بالالارعا سىيلاپ ءجۇر. كىشكەنتاي پاتسيەنت بولىمدە جاتقان قۇرداستارىنا عانا ەمەس, ەرەسەكتەرگە دە ومىرشەڭدىكتىڭ, توزىمدىلىكتىڭ جانە اقىل-ويدىڭ ۇلگىسىن كورسەتتى.
– گيدروتسەفاليا بولعان جاعدايدا جەدەل مەديتسينالىق كومەككە جۇگىنۋ قاجەت. اۋرۋدى كاسىبي ەمدەۋ جانە ساۋاتتى وڭالتۋ اسقىنۋلار مەن مۇگەدەكتىك دارەجەسىن 60%-عا دەيىن تومەندەتۋى مۇمكىن. شالا تۋعان شارانالار مەن ج ۇلىن جارىعى بار بالالار تاۋەكەل توبىنا كىرەدى. گيدروتسەفاليا كوبىنەسە ءۇش ايعا دەيىن انىقتالادى. ەگەر وسىدان 20 جىل بۇرىن گيدروتسەفاليا دياگنوزىنان ايىعىپ شىعۋ مۇمكىن بولماسا, بۇگىندە ەرتە كومەك پاتسيەنتتەردىڭ 95%-ىن قۇتقارۋعا مۇمكىندىك بەرەدى, – دەيدى «ون ساۋساعىنان ونەر تامعان» دارىگەر ولجاس ازانقۇلوۆ.
ايتا كەتەيىك, ەلىمىزدە جوعارىدا اتالعانداي, دياگنوز قويىلعان ناۋقاستاردى ەمدەۋ تەگىن. بارلىق شىعىن ءمامس قاراجاتى ەسەبىنەن جابىلادى.
شىعىس قازاقستان وبلىسى