2021 جىلدىڭ 21 ءساۋىرى كۇنى «Egemen Qazaqstan» گازەتىندە «تالدىقۇدىق نەگە تارىقتى؟» دەگەن ماقالا جاريالانعان ەدى... وندا باتىس قازاقستان وبلىسى قازتالوۆ اۋدانى تالدىقۇدىق اۋىلدىق وكرۋگىنىڭ مۇقتاجدىقتارى, سونىڭ ىشىندە كۇردەلى جوندەۋگە ءزارۋ مەكتەپ ماسەلەسى كوتەرىلگەن-ءتىن.
ارادا ءدال ەكى جىل, توعىز اي جانە ون بەس كۇن وتكەندە سول اۋىلعا ارنايى بارىپ, قۋانىپ قايتتىم. تالدىقۇدىق ەڭسەسىن تىكتەپ العان. گاز, سۋ كىرگەن, ينتەرنەتى سايراپ, ەڭ باستىسى, تيپتىك مەكتەپ كۇردەلى جوندەۋدەن ءوتىپ, تىمپيىپ تۇر. ءىشى تولى قايناعان جۇمىس. بالاباقشا تولى – بالا, سپورتزالدا – سپورت... ءپان كابينەتتەرى قالا مەكتەبىندەگىدەن ءبىر دە كەم ەمەس.
«Egemen Qazaqstan»-نان اۋىلىمىزدىڭ اتىن كورگەندە, ء«بىزدى دە ەسكەرەتىن جان بار ەكەن عوي» دەپ, كىشكەنە سەرپىلىپ, الگى ماقالانى قولدان-قولعا تاراتىپ, قايراتتانىپ قالدىق. «بولاشاعى جوق اۋىل» اتانىپ, ساعىمىز سىنىپ, جاعدايى بارى كەتىپ, جوعى امالسىز قالىپ جاتقان كەز ەدى عوي. سودان اۋىلىمىزدا كۇرت قوزعالىس باستالدى. ءوز كوزىمىزگە ءوزىمىز سەنبەي, دىبىسىمىزدى شىعارىپ قۋانۋعا دا قورقىپ جۇردىك باسىندا. ەندى قايتەيىك, قىس بولسا بۇرسەڭدەپ, سالقىن ءۇيدىڭ ءبىر بولمەسىندە وتىراتىن ءبىز, گاز كەلىپ ارقا-جارقا بولدىقتا قالدىق. ودان كەشىكپەي اۋىزسۋ دا جەتتى. ۇيىمىزگە كادىمگى قالاداعىداي قولايلى جاعداي جاساپ الۋعا كىرىستىك, ينتەرنەت تە ورناتىلدى قوس مۇناراسىمەن. باسىندا كوشىپ كەتكەن اۋىلداستار قايتادان ءۇي ساتىپ الىپ, قارا ورىنعا قايتىپ كەلۋدى ارمانداپ ءجۇر ەندى. «سەندەر ءۇشىن ءۇي باعاسى قىمبات بولادى» دەپ قالجىڭداپ قويامىز, الدى كوشىپ تە كەلىپ جاتىر», دەيدى تالدىقۇدىقتىقتار. نە نارسە دە كوڭىلگە بايلانىستى عوي, ۇكىمەتتىڭ قولداۋىن كورگەن سوڭ ەل رۋحتانىپ, ىسكە كىرىسكەن. شارۋا وڭالىپ, مال باسى ءوسىپ, جەكە كاسىپكەر قاتارى كوبەيە باستاعان. جەكە ازاماتتاردىڭ ءوز كۇشىمەن جاڭادان سالىنعان ەكى ءۇي ەرەكشە كوزگە تۇسەدى, توزىپ كەتە جازداعان اۋىلدا مۇنداي قۇرىلىس – قۇبىلىس.
تالدىقۇدىق – تاريحى تەرەڭ شەجىرەلى اۋىل. جەرى شۇرايلى, ادامى شىرايلى قاسيەت قونعان ايماق ءبىر. ايگىلى سارمالاي (سادىق) سىبىزعىشى, شامعون قاجىعاليەۆتىڭ, جۇمەكەن ناجىمەدەنوۆتىڭ قولىنا العاش دومبىرا ۇستاتىپ, ۇستازى بولعان «تەسىك تاماق» سابىر كۇيشى – وسى تالدىقۇدىقتىڭ پەرزەنتى. سابىر مۇقاتوۆتىڭ زيراتى وسى اۋىلدىڭ قورىمىندا.
ەسىن جيىپ, وتكەن-كەتكەنىن تۇگەلدەپ دەگەندەي, تالدىقۇدىق تالاي دۇنيەنى جوسپارلاپ وتىر ەندى. باستىسى, جىگەرلەنىپ العان. بىرلەسە قيمىلدايدى. ءار جىلعى تۇلەكتەرىنىڭ كومەك-ىقىلاسى دا سايراپ جاتىر. جاڭادان مادەنيەت ءۇيىن سالۋ قاراستىرىلىپ جاتقان كورىنەدى, وعان دەيىن جاستار ءوز كۇشىمەن اشىق الاڭعا ساحنا قۇرىپ, مادەني ءىس-شارالارعا جاعداي جاساپ قويعان.
«وسىنىڭ ءبارى «ەگەمەننىڭ ەكپىنىنەن» باستالدى» دەپ ك ۇلىپ قويادى وزدەرى, اينالدىرعان ەكى-ءۇش جىلدىڭ ىشىندە ءومىر وزگەرىپ كەتتى. انە-مىنە دەگەنشە, اسفالت جول دا سالىنىپ قالار, بالكىم. «جالپاقتال-ورال» تراسساسىنا نەبارى 60 شاقىرىمعا جەتپەيتىن جەردەمىز عوي...»
«كورىنگەن تاۋدىڭ الىستىعى جوق, ول كۇنگە دە جەتەرسىز, جىلعا 20 شاقىرىمنان ءبولىپ جاساسا دا», دەپ ءازىل-شىندى ارالاستىرا قوشتاستىم.
جازىلعان جايدىڭ جەردە قالماعانى قانداي جاقسى. «Egemen Qazaqstan»-دا كوتەرىلگەن ماسەلەگە سەرگەك قاراعان ۇكىمەتكە ۇلكەن راحمەت.
تالدىقۇدىقتا تاڭ اتتى ارايلاپ, اۋىلدارعا جان كىرە باستادى وسىلاي. ەندى جولدىڭ كۇرمەۋى شەشىلسە, قيىندىقتان ءبىرجولا قۇتىلادى.
داريعا مۇشتانوۆا,
قازتالوۆ اۋدانىنىڭ قۇرمەتتى ازاماتى
باتىس قازاقستان وبلىسى