قىس – قاتال سىنشى. بۇل مەزگىلدىڭ ءبىر سىن ساعاتى قولدان كەلەر قايران بولماي, قار قۇرساۋىندا قايراڭداپ قالعاندا تۋادى. مۇنداي قيىن جاعدايعا تاپ كەلگەن جانعا سۋىق ءتيىپ, ۇسىك شالىپ, ومىرىنە قاۋىپ ءتونۋى مۇمكىن. بۇگىندە وسىنداي قاۋىپ-قاتەرمەن بەتپە-بەت كەلىپ, قولايسىز اۋا رايىندا ايدالادا قالىپ قويعان ازاماتتار از بولماي تۇر. قۋانىشتىسى, بۇل شاراسىز جانداردىڭ قاسىنان شيراق ءارى شەشىمتال قۇتقارۋشىلار تابىلىپ, قانشاما ءومىردى اراشالاپ قالدى.
وسى قىستا توتەنشە جاعدايلار مينيسترلىگىنىڭ قۇتقارۋ بولىمشەلەرى قار قۇرساۋىنان 10 مىڭنان اسا ادامدى, ونىڭ ىشىندە 488 بالانى قۇتقارىپ, قاۋىپسىز جەرگە جەتكىزدى. بۇعان قوسا 1 266 بىرلىك تەحنيكا دە تەگىس جولعا شىعارىلدى. بۇگىندە ەلىمىزدىڭ تۇكپىر-تۇكپىرىندە جەدەل شتابتار جۇمىس ىستەپ جاتىر. بۇلارعا مينيسترلىكتىڭ رەسپۋبليكالىق شتابى باسشىلىق ەتەدى. 13 وڭىردە رەسپۋبليكالىق جانە وبلىستىق ماڭىزى بار اۆتوجولداردا بلوك-بەكەتتەر قويىلىپ, كولىكتىڭ بارلىق ءتۇرى ءۇشىن قوزعالىس شەكتەلدى. اقتوبە, اقمولا, قوستاناي, پاۆلودار, ۇلىتاۋ وبلىستارىنىڭ ۋاقىتشا ورنالاستىرۋ پۋنكتتەرىندە 1 107 ادام بار.
جالپى, 7-9 اقپان ارالىعىندا قۇتقارۋشىلار بۇكىل ەل كولەمىندە قار قۇرساۋىنان 1 426 ازاماتتى قۇتقارىپ, ەۆاكۋاتسيالادى جانە 64 كولىك قۇرالىن الىپ شىقتى. وسى ورايدا توتەنشە جاعدايلار مينيسترلىگى ازاماتتاردى قىس مەزگىلىندە اۆتوجولداردا قاۋىپسىزدىك شارالارىن ساقتاۋعا شاقىرۋدان تانبايدى. مۇنداي جاعدايدا 112 حابارلامالارىن نازارعا الىپ, داۋىلدى ەسكەرتۋ كەزەڭىندە جانە مەتەوجاعدايلار ناشارلاعان كەزدە ەلدى مەكەندەردەن الىس ساپارلارعا شىقپاي, شالعاي جاققا جاياۋ جۇرۋدەن دە ساق بولعان ءجون.