مەملەكەتتىك قىزمەتتەردى كورسەتۋ – مەملەكەت پەن قوعامنىڭ ءوزارا ءىس-قيمىلىنىڭ قۇرامداس بولىكتەرىنىڭ ءبىرى. ادام دۇنيەگە كەلگەننەن باستاپ مەملەكەتتىك كورسەتىلەتىن قىزمەتتەرمەن تىعىز بايلانىستا بولادى. بۇگىندە ازاماتتاردىڭ ۋاقىتىن ۇنەمدەۋ, اكىمشىلىك كەدەرگىلەر مەن قاعازباستىلىقتى جويۋ ماقساتىندا ەلەكتروندى كورسەتىلەتىن قىزمەتتەردىڭ ۇلەسى ارتىپ كەلەدى.
وبلىستا 395 مەملەكەتتىك قىزمەت ءتۇرى كورسەتىلەدى. وتكەن جىلى قىزمەت بەرۋشى مەكەمەلەر تاراپىنان 6 ملن-نان استام قىزمەت كورسەتىلسە, سونىڭ 5 ملن 151 مىڭعا جۋىعى جەرگىلىكتى اتقارۋشى ورگاندار, 871 مىڭنان استامى اۋماقتىق مەملەكەتتىك ورگاندار ۇلەسىندە.
ەلەكتروندى تۇردە قىزمەتتەر الۋ كورسەتكىشى 2022 جىلى 97,8 پايىزدى قۇراسا, بىلتىر 98,2 پايىزعا جەتتى. «قازاقستان رەسپۋبليكاسىنىڭ مەملەكەتتىك كورسەتىلەتىن قىزمەتتەر تۋرالى» زاڭىنا سايكەس كەز كەلگەن تۇلعا مەملەكەتتىك كورسەتىلەتىن قىزمەتتى الۋعا جانە قىزمەتتى بەرۋشىنىڭ شەشىمدەرىنە, ارەكەتتەرىنە (ارەكەتسىزدىگىنە) بەلگىلەنگەن تارتىپپەن شاعىمدانۋعا قۇقىلى.
سوندىقتان مەملەكەتتىك قىزمەتتەردى كورسەتەتىن ورگاندار ءۇشىن ءوز قىزمەتىنىڭ ساپاسىن ارتتىرۋ, جەكە جانە زاڭدى تۇلعالاردىڭ قۇقىقتارىنىڭ ساقتالۋى باستى قاعيدا بولۋعا ءتيىس. دەگەنمەن زاڭنامانىڭ بۇزىلۋىنا جول بەرەتىندەر دە جوق ەمەس. وتكەن جىلى مەملەكەتتىك قىزمەت ىستەرى اگەنتتىگىنىڭ قىزىلوردا وبلىسى بويىنشا دەپارتامەنتىنىڭ قاراۋىنا 57 شاعىم تۇسكەن. ونىڭ 19-ىنا دەپارتامەنت تاراپىنان جوسپاردان تىس تەكسەرۋ تاعايىندالسا, 22-ءسى ءتيىستى مەكەمەلەرگە جولداندى. يەسىنىڭ ءوتىنىش حاتىمەن 16 شاعىم توقتاتىلدى. جوسپاردان تىس تەكسەرۋلەر ناتيجەسىندە 3 ازاماتتىڭ ءۋاجى دالەلدەنىپ, قۇقىعى قالپىنا كەلتىرىلدى. شاعىمداردىڭ باسىم بولىگى جەر ۋچاسكەلەرىنىڭ تابىستالۋىنا جانە الەۋمەتتىك قامسىزداندىرۋ سالاسىنا قاتىستى.
«ەلدى مەكەندەر شەگىندە وبەكتى سالۋ ءۇشىن جەر ۋچاسكەلەرىن بەرۋ» مەملەكەتتىك قىزمەتىن كورسەتۋدە وبلىس ورتالىعى تۇرعىنىنىڭ شاعىمى نەگىزىندە قىزىلوردا قالاسى اكىمى اپپاراتىنا, قالالىق ساۋلەت جانە قالا قۇرىلىسى, اۋىل شارۋاشىلىعى جانە جەر قاتىناستارى بولىمدەرىنە جوسپاردان تىس تەكسەرۋ جۇرگىزىلدى. تەكسەرۋ بارىسىندا قالالىق ساۋلەت جانە قالا قۇرىلىسى ءبولىمى تاراپىنان كەلىسۋشى ورگاندارعا قىزمەت الۋشىنىڭ قۇجاتتارىن 111 كۇنگە كەشىكتىرىپ جولداپ, مەملەكەتتىك قىزمەتتى كورسەتۋ ءتارتىبىنىڭ بۇزىلعانى انىقتالسا, قالالىق جەر قاتىناستارى ءبولىمى ءتيىستى شەشىم جوباسىن قالا اكىمى اپپاراتىنا جولداماعانى بەلگىلى بولىپ وتىر. مەملەكەتتىك ورگاندار قىزمەت كورسەتۋ مەرزىمىن ساقتاماي, ازاماتتاردىڭ قۇقىعىن بۇزعان.
اتالعان فاكتى بويىنشا قالالىق ساۋلەت جانە قالا قۇرىلىسى ءبولىمىنىڭ جاۋاپتى مامانىنا تارتىپتىك جازا قولدانىلسا, قالالىق اۋىل شارۋاشىلىعى جانە جەر قاتىناستارى ءبولىمىنىڭ باسشىسى اكىمشىلىك جاۋاپكەرشىلىككە تارتىلدى. تەكسەرۋ ناتيجەسىندە دەپارتامەنت تاراپىنان ەنگىزىلگەن ۇسىنىم نەگىزىندە قىزمەت الۋشىنىڭ قۇقىقتارى قالپىنا كەلتىرىلدى.
2022 جىلدىڭ شىلدە ايىنان باستاپ ازاماتتارعا مەملەكەتتىك قىزمەتتەردى كورسەتۋ بارىسىندا ورىن العان بۇزۋشىلىقتاردى انىقتاۋ فۋنكتسياسى اگەنتتىككە بەرىلدى. وسى كەزەڭنەن باستاپ دەپارتامەنت تاراپىنان مەملەكەتتىك ورگانداردىڭ اقپاراتتىق جۇيەلەرىنە قاشىقتان مونيتورينگ جۇمىستارى جۇرگىزىلىپ جاتىر. وتكەن جىلى قاشىقتان باقىلاۋ ءتارتىبىن بۇزعان 132 دەرەك انىقتالدى. وسىعان بايلانىستى مەملەكەتتىك ورگانداردىڭ باسشىلارىنا 21 اكىمشىلىك حاتتاما تولتىرىلىپ, بيۋدجەت كىرىسىنە 724 500 تەڭگە ايىپپۇل ءوندىرىلدى.
قاشىقتان مونيتورينگ جۇرگىزۋ بارىسىندا جالاعاش اۋدانىنىڭ بۇقارباي اۋىلدىق وكرۋگى اكىمى اپپاراتى تاراپىنان «جەر ۋچاسكەسىنىڭ نىسانالى ماقساتىن وزگەرتۋ» مەملەكەتتىك قىزمەتىن كورسەتۋ مەرزىمى بۇزىلعانى انىقتالدى. دەپارتامەنت تاراپىنان شۇعىل تۇردە جالاعاش اۋدانى اكىمدىگىنە ەسكەرتپە حات جولدانىپ, قىزمەت كورسەتۋ مەرزىمدەرىن ساقتاماي, قاۋلىنى 5 جۇمىس كۇنىنە كەشىكتىرىپ ۇسىنعانى ءۇشىن اۋىلدىق وكرۋگ اكىمىنە اكىمشىلىك ايىپپۇل سالىندى جانە اۋىلدىق وكرۋگ اكىمى اپپاراتىنىڭ باس مامانىنا تارتىپتىك جازا بەرىلدى.
بىلتىر قاشىقتان مونيتورينگ جاساۋ جۇمىستارىنىڭ ناتيجەسىندە 6 قىزمەت الۋشىنىڭ بۇزىلعان قۇقىعى قالپىنا كەلتىرىلدى.
ەرلەگەن مەڭداليەۆ,
مەملەكەتتىك قىزمەت ىستەرى اگەنتتىگى قىزىلوردا وبلىسى بويىنشا دەپارتامەنتىنىڭ باسشىسى