مەملەكەت باسشىسىنىڭ قاتىسۋىمەن ۇكىمەتتىڭ كەڭەيتىلگەن وتىرىسى ءوتتى. ءبىر-اق كۇندە جاڭا ۇكىمەت كەلدى.
«جالپى, وتكەن جىلى ەكونوميكامىز 5,1 پايىزعا ءوستى. ەڭ باستىسى, ەلىمىزدىڭ دامۋ قارقىنى باسەڭدەگەن جوق. الدىڭعى ۇكىمەت وسى باعىتتا ءبىراز جۇمىس ىستەدى. كەشە مەن بۇرىنعى پرەمەر-مينيستر ءاليحان سمايىلوۆقا العىسىمدى ءبىلدىردىم. بىراق قازىر جايباراقات وتىرۋعا بولمايدى, سەبەبى الدىمىزدا اۋقىمدى جۇمىس تۇر. سوندىقتان ۇكىمەتتىڭ جۇمىسىنا جاڭا سەرپىن بەرۋ قاجەت», دەدى پرەزيدەنت.
سمايىلوۆ ۇكىمەتىنىڭ قانشالىقتى ءتيىمدى بولعانىنا تاريح ءوز باعاسىن بەرەدى. ەندى كەلگەن ۇكىمەتتىڭ الدىندا قانداي مىندەتتەر تۇر؟ پرەزيدەنتتىڭ قويعان مەجەسى بويىنشا, الدىمىزدا 2029 جىلعا قاراي ەكونوميكامىزدىڭ كولەمىن 450 ملرد دوللارعا جەتكىزۋ, ىشكى جالپى ءونىمنىڭ جىل سايىنعى ءوسىمىن كەمىندە 6 پايىزعا ءوسىرۋ مىندەتى تۇر. بىلتىر 5 پايىزدان استى. سونداي-اق ماكروەكونوميكالىق كورسەتكىشتەرمەن قاتار, حالىقتىڭ ناقتى تابىسى دا قارقىندى تۇردە ارتۋى كەرەك.
تابىس اتاۋلى تابىس جانە ناقتى تابىس بولىپ بولىنەدى. اتاۋلى تابىستىڭ وسكەنىنەن حالىقتىڭ جاعدايى جاقسارمايدى. وتكەن جىلى ءسىز تابىسىڭىزعا قانشا تاۋارلار مەن قىزمەتتەردى پايدالانا الاتىن ەدىڭىز, بيىل سول تاۋارلار مەن قىزمەتتەردىڭ كولەمى ءوسىپ جاتىر ما؟ وسپەگەن كۇننىڭ وزىندە, ەڭ بولماسا, ساقتالىپ قالدى ما؟ الدە كەرى كەتىپ جاتىر ما؟ وسى سۇراقتار ماڭىزدى.
جاڭا ۇكىمەتتىڭ ەكونوميكالىق باعدارلاماسى حالىقتىڭ ءال-اۋقاتىن جاقسارتۋ دەگەن سوزدەرمەن باستالىپ, ناقتى ىستەرگە ۇلاسۋى قاجەت. ءسوز بەن سانداردى ادەمى قىلىپ كورسەتەتىن ۇكىمەت بىزگە قاجەت ەمەس, ناقتى ىسپەن جۇمىس كورسەتەتىن ۇكىمەت قاجەت.
ياعني بيۋروكراتيانى توقتاتۋ, ناقتى ناتيجەگە قول جەتكىزۋ كەرەك. ۇكىمەت پەن اكىمدەر جۇمىس ىستەۋ ءتاسىلىن تۇبەگەيلى وزگەرتۋگە ءتيىس. حالىقپەن كوممۋنيكاتسيالىق بايلانىس جوعارى دارەجەدە جۇرگىزىلگەنى ءجون. ماسەلەنى جەدەل شەشۋمەن قاتار, ەكونوميكانىڭ ۇزاقمەرزىمدى دامۋىن قامتاماسىز ەتۋ وتە ماڭىزدى.
سونىمەن قاتار ۇكىمەت وتىرىسىندا ايتىلعان اگرارلىق-كرەديتتىك كورپوراتسيانىڭ الەۋەتىن كۇشەيتۋ جانە وعان اۋىل شارۋاشىلىعىن سۋبسيديالاۋ جونىندەگى اكىمدىكتەردىڭ فۋنكتسيالارىن بەرۋ قاجەتتىگى – ورىندى يدەيا. ول ءۇشىن ءبىر تسيفرلىق پلاتفورما اياسىندا اوك سۋبەكتىلەرىن جەڭىلدەتىلگەن كرەديتتەۋ جانە سۋبسيديالاۋ قىزمەتتەرىن بىرىكتىرۋ قاجەت.
ماقسات حالىق,
ەكونوميست